1. رحت يومين للبنان من الاربعاء للجمعة بس ما فيه احلى منها


2. يعني ماشين ماشين


3. في خلال يومين شفت حوالي خمس حوادث بس


4. المهم طلعنا من بيروت وعلى جونية تمشينا هناك إلى الساعة 11 وعلى الفراش

تحياتي للجميع

رحت يومين للبنان من الاربعاء للجمعة بس ما فيه احلى منها

وصلت الاربعاء المغرب وكان فية واحد من الشباب ينتظرني أو انا اللي انتظرتة ساعة في المطار بسبب الزحمة الحقيقة لبنان تغيرت لأن اول روحه لي عام 95 واخر روحه في 98 البلد حلو جداً جداً بس الجو حار حبتين
طلعنا من المطار ونروح لمحل يقال له الهرواي عنده عصير ما ودك الا تناظرة ساعة بعدين تشربه- بس- بشويش، طعم ولا احلى (لا احد يحرجني ويقول لي وينه فيه) تمشيت في بيروت والشي الغريب ان الشوارع كانت فاضية إلى الساعة 9 او 10 بعدين ما تقدر تمشي ابد وخاصة في السوليدير الجو حلو وميزته كثرة المقاهي والعالم ما تنام ابد هناك رجعنا على الساعة 2 نمنا 3 والساعة 7 الصباح قايمين ونروح لبيروت خلصنا شغلتين في الخارجية اللبنانية والسفارة السعودية -طبعاً ساكن في جونيه- ومنها على صيدا ومن صيدا لصور ونوصل إلى الحدود الاسرائيلية اللي معي ملقوف الله يهدية الا بيشوف الحدود بس قبل الحدود بمسافة فية عساكر ويمنعون اي واحد اجنبي يدخل في المنطقة هذي الا بتصريح رجعنا وكان معنا واحد لبناني من اهل الجنوب تغدينا عندة وطلعنا على العصر لبيروت طبعاً رايحين مع طريق بس ماهو سريع فيه مناظر حلوة ومحلات الفاكهه على (افا من يشيل)
فية حاجات ترفع الظغط هناك ومنها السواقة - سواقة السيارات - انا في حياتي ما شفت ناس ما تحترم النظام مثل اللبنانيين، الاشارة ان كانت حمراء يمشون وان كانت خضرا يمشون بس منتبهين يعني بشويش

يعني ماشين ماشين

في خلال يومين شفت حوالي خمس حوادث بس

والحاجة الثانية ان قبر رفيق الحريري صار مزار للآسف وحاطين شاشة فيها عدد الايام اللي راحت على وفاته والحقيقة شي يحز في النفس حبتين، الملك فهد مات الله يرحمة ودفنوة في قبر عادي اما هناك في بعض البدع والاعتقادات اللي لك عليها.

المهم طلعنا من بيروت وعلى جونية تمشينا هناك إلى الساعة 11 وعلى الفراش

ومن بكرة الصباح رحنا للسفارة خلصنا اشغالنا ونطلع لجونية نتمشى فيها رحنا لقلعة قديمة ما اعرفها ومنها على طرابلس خذنا لفتين فيها وطلعنا لحريصا اخذنا لفتين على كم حبة تين وبرتقال وعنب ونطلع للجبل لبحمدون وبعبدا تمشينا بالسيارة نزلنا في مقهى فية مطل حلو على الظهرية شربنا شاهي بالنعناع يحبة قلبك على حبتين زيتون وجينا راجعين لبيروت ومن بيروت للمطار.
طبعاً رجعت لحالي مثل ماجيت لحالي بس حقيقة يومين ما خلينا فيها مكان
علماً انه سبق وان رحت اول مرة للبنان مثل ما قلت عام 95 بس كل شي تغير علي ما هو مثل اول
عندي كم صورة مناظر في جونيه بس والله ما قدرت انزلها على الجهاز بحاول انزلها ان قدرت بس في وقت ثاني واعذروني على عدم ترابط الافكار لأني في المكتب وما عندي وقت.
وسلامتكم