1. احبة حتى فى الخصام و بعده عنى يا ناس حرام


2. اسفة الطرب واخدنى مقدرش اقاوم سيد درويش .

.زميلى الفلسطينى اللى ساكن فى القدس جه مصر فى زيارة و طلب منىعمل جولة فى يوم واحد هو اللى فاضله بعد ما يخلص شغل تخيلوا كان يوم جامد مستعدين :-
اتقابلنا قدام الجامعة الامريكية و يسالنى نتقابل فين دايما اقول قصاد الجامعة الامريكية ليا معاها ذكريات اتقابلنا الساعة عشرة الصبح لاقيته يا عينى لم يتناول الافطار .
قمنا طلعنا على جاد طبعا كلنا عارفين جاد و اديناها فول و طعمية و بيض و بهدلنا الدنيا و عملت فيه مقلب جامد كان بيشرب بيبسى قمت حطيت له لبان بالنعناع و فار و الدنيا باظت .
بعد الفطار طلعنا على المتحف المصرى و الامن كان رخم جدا الاستاذ منين و يقربلك ايه و بطاقتك و بسبورك حسسونى اننا خاطفاة .
المهم بعد عناء مع الامن و تفتيش دخلنا المتحف اسيبة لا طبعا اختكم عندها معلومات تاريخية هايلة اصل انا مجنونة كتب و خصوصا تاريخ و يا سلام لو تاريخ فرعونى .
بس بجد الواحد بيشعر بالفخر لما يشوف الحضارة العظيمة دى و قعدت اشرحلة حاجات عن الفراعنة و عاداتهم و حظنا كان حلو شفنا قناع توت عنخ امون الذهبى و مقتنياته كان لسه راجع من اعارة بس مش اعارة مدرسين مصريين فى الخليج ههه لا اعارة الى دول اوروبا و امريكا لتعريفهم بالحضارة الفرعونية ال يعنى هما مش عارفين الحضارة الفرعونية هى الحضارة الوحيدة اللى ليها علم يدرس فى جامعات اوروبا و امريكا و حتى الدول الاسيوية اسمه علم المصريات و يقولك تعريف حاجة تخنق .
خلصنا المتحف و زرنا النيل العظيم سر حياة و حضارة الفراعنة بس لما اروح النيل و افتكرت نيل اسوان اعرف قد ايه احنا فى القاهرة ظالمين النيل الا ان فيه حته تحفة و هادية و الهواء هناك يرد الروح و يشفى الهموم بحب اروح فيها دايما اخدته هناك و قعدنا استجمام شوية قبل المجهود الجبار اللى جاى .
بعد ما ارتاحنا طلعنا على سور الازبكية و ده سوق الكتب القديمة فى مقرة الجديد فى العتبة اصله كان عايز شوية كتب اصله مجنون كتب زى حالاتى مثقفين بقى ههه و اشترينا مجلات قديمة تاريخها يعود الى فترة الستينيات و الخمسينيات كانت المصور و الاثنين و الكواكب و اشترينا كتاب الف ليلة و ليلة .
بعد كده طلعنا على الحسين و قعدنا على قهوة الفيشاوى كان فيه راجل بعود خليته يعزف و يغنى دور انا هويت و انتهيت و خدتنى الجلالة و قعدت اغنى معاه الله عليك يا سيد يا درويش رائع طول عمرك .
انا و حبيبى مفيش كده ولا فى الخيال انا و حبيبى

احبة حتى فى الخصام و بعده عنى يا ناس حرام

اسفة الطرب واخدنى مقدرش اقاوم سيد درويش .

و بعد كده اتمشينا فى شارع المعز لدين الله الفاطمى تحفة فنية رائعة و جميلة و مسيبناش مكان الا و دخلناه الواحد بيتخنق لما يشوف البراح و الجمال اللى كان عايش فيه اجدانا و البيوت الفاقدة للذوق و الجمال اللى عايشين فيها دلوقتى .
بعد كده رجعنا للوكالة كان فيها فرقة الطبول النوبية دخلنا و رغم انى من عرب اسوان او الجعافرة الا انى اعشق النوبة و الفن النوبى فهم ابناء عمومتنا و انسباء لنا نحن عرب اسوان .
العزف كان رائع و الاغانى تحفة و كنت بترجم الكلام اللى بفهمة لصديقى الفلسطينى و قضيناها غناء و استمتاع و رقص نوبى مع الفرقة كانت امسية ممتعة ما احلى الفن النوبى لا ينافسه سوى الفن الجعفرى
و بعد ما خلصت فرقة الطبول النوبية اخدناها مشى لحد ميدان العتبة من الوكالة و ودعته و ركبته تاكسى من ابو عداد اللى ابيض ده و رحت ركبت المترو عشان اروح .
و كده خلص اليوم كان يوم ممتعو طبعا قعدت اقله ايه اخر النكات اللى فى مصر