اخوي المسافه طويله الصراحه الله يعينك من دبي لين مسقط 4 ساعات تقريبا ومن مسقط لين صلاله حوالي 1000 كيلو وعليك الحسبه من مسقط لين صلاله الطريق اتجاه واحد اذا معك اخويا اوكيه اما بعايلتك مانصح -- مشوار طويل -- هاذا من معلوماتي من الزملاء الي راحوا وانا من كلامهم غيرت رايي اروح بسياره لين صلاله .. وانت استخير الله في ذلك

المسافه من دبي إلى صلالة
دبي إلى منفذ الوجاجه = 100 كم
من منفذ الوجاجه إلى مسقط = 300 كم
ومن مسقط إلى صلاله = 1000 كم
المجموع = 1400 كم

@ابوفيصل@
يؤ يؤ
خوفتني
يعني اكنسل احسن لي برايك
شكرا لنصيحتك ... وياليت يفيدوننا البقيه بهذا الخصوص

مهاجر
تسلم يابطل
وش رايك بحكم خبرتك تستاهل وخاصه ان المشوار كما يبدو تعب

اخوي انت كم افراد عايلتك ؟ وكم يوم تبون تجلسون في كل السفره ؟ عشان اقول لك تفصيل اكثر

حنا اثنين يابوفيصل
انا وزوجتي
المده 17 يوم
الخطه المبدأيه
5 دبي
2 مسقط
4 صلاله
1 مسقط
3 دبي
واسمع عن نزوى ولا اعرف وش فيها يمكن اضيف لها يومين
ارشدنا لاهنت يابوفيصل
وش السواة

اذا الموضوع مايستاهل
اغير الخطه ... واروح من دبي للامارات الشماليه .. مع اني ماعمري سمعت عنها ولا اعرف وش فيها لكن اشوف موضوع مثبت عنها
بس مدري وش طبيعة السياحه هناك هل هي سياحة منتجعات ولاسياحة طبيعه ولاسياحه ترفيهيه زي دبي يعني
وش رايكم ياجماعه افيدونا لانتورط

معليه وانا اخوك شوف الجو مثل ماتشوف حر وزفت والسواقه والله بتدوخون في الطريق اسئل مجرب انا رحت في وقت مو صيف مره وتعبت
وخصوصا انك وياك زوجتك مايصلح ابد -- مخاطر الطريق كثيره واقلها العطل لاسمح الله
احسن شي وانت اختار اما عن طريق العربيه وتسكن في الشارقه ارخص لك ومنها تكسي الي دبي وتفتك من السواقه والزحمه --------- دبي زحمة في كل مكان واذا سيارتك لوحتها سعوديه خذ لك انواع الهرنات واللعانه من الهنود هناك
الفجيره يمكن يكون جوها زين لكن اسواق ماحولك احد دبي والشارقه فقط __ ومن دبي تقدر تاخذ رحله الي مسقط ومنها الي صلاله وتفتك من التعب
هاذا راي اخوك المتواضع مع اني احب السفر بالسياره لكن في مثل هالطقس ابد مايصلح

@ابوفيصل@
تسلم وانا اخوك ... اذا تعب ومخاطره ... زي ماتقول مافيه داعي ابد
اما بخصوص العربيه ... انا الهدف ياخوي اني اروح بسياره وامسك خط وخاصه اني احب الخطوط .. وسيارتي ولله الحمد فخمه ومريحه ... وليس الهدف التوفير لانه ولله الحمد مستوره ...
والله يابوفيصل كلامك بيخليني اعيد كل مخططاتي ..
طيب ماقلت لي شرايك اغير الوجهه من دبي للامارات الشماليه ؟
اذا تعرفها قلي وش فيها ... وش نوع السياحه اللي فيها.؟...