- بسم الله نبدأ
- 1- بوقف سيارتي بمطار الكويت ؟ كيف؟ وبكم السعر؟
- 3- ميونخ و سالزبورق هل فيهم اسواق الاوت لت ؟
- 4- النقاب في المانيا والنمسا ؟
- نصايح عامة :-
- 6- Free Tax التاكس فري (الاعفاء الضريبي)... ؟
- 7- اجراءات (الاعفاء الضريبي) FREE TAX
-----اخواني اخواتي المميزيين في هذا المنتدى المميز الذي استفدت منه الكثير بفضل الله ثم بمشاركاتكم المفيده000
سفرتي كانت في نصف مايو 2013 قبل ثلاث اسابيع من الكويت الغاليه – ميونخ – سالزبورق – زيلامسي – الكويت الحبيبه
و كشي يسير من رد الجميل لكم راح اكتب موضوع بسيط ليس عن الرحلة.. اللي قبلي ماشاء الله ما خلو شي... ولكن عن أجوبة لبعض الاسئلة اللي اشغلتني قبل السفر و انا متأكد انها مشغلة الكثيير الان.... الاجوبة من واقع تجربة شخصيه وليست منقوله...
بسم الله نبدأ
1- بوقف سيارتي بمطار الكويت ؟ كيف؟ وبكم السعر؟
هناك مواقف المدى الطويل توقف سيارتك عند صالة المغادرة ونزل اغراضك وتحصل عامل واقف عند البوابة بس اشر له وهو بياخذ السياره ويعطونك بطاقة(وصل استلام)بكل بساطة...بالنسبة للسعر اليوم الاول بدينارين وباقي الايام بدينار.. اذا رجعت بالسلامة عند بوابة الوصول تلقى العامل حق الشركة عند الباب عطه الوصل وهو بيجيب السيارة عندك..خدمة جدا رائعه وسعر مناسب.. احبك ياكوييت...
2- افضل في المانيا و النمسا استأجر سيارة والا استخدم النقل العام (الباص والقطار)؟
طبعا هي ترجع لهواية المسافر نفسة... واحد كاتب في منتدى اذا ما تستأجر سيارة لاتروح احسن!!!!! السيارة لها متعتها ما قلنا شي..لكن مو كل واحد لازم يوافق هذا الرأي...
انا شخصيا استمتعت بالباص من المطار لستي سنتر في ميونخ (باص نظيف ومرتفع ويفر فيك الديرة بدل ما تبتلش بالاحداثيات والموقع) ومن ميونخ لزلامسي بالقطار (السريع والعادي) وفي زلامسي اكثرها مشي ... يوم واحد اخذت تاكسي 120يورو اخذنا بجولة لشلالات كريميل و كابرون و الزحليقات الصيفيه....والرجعة نفس الشي قطار لسالزبورق وباصات داخلها وبعدها بالقطار لميونخ..
اللي ابي اقوله الشغله تعتمد على اللي ترغب فيه شخصيا ما عليك من غيرك ... وكل خيارات التنقل متوفره... -----
3- ميونخ و سالزبورق هل فيهم اسواق الاوت لت ؟
ميونخ كمدينة مافيها سوق اوت لت..خوذوها عني.. طقيت مشوار مهو سهل بقطار الاندرقراوند ونزلت بمحطة (ريم) ومشيت اخرتها طلع مبنى اداري لماركة (اسكادا) الموظفة اللي بسكادا شكلي كسرت خاطرها..قالت لي الاوت لت مسافة ساعة ونص من هنا بمدينة اسمها انجلوشتات وليست في ميونخ ... اكلتها صح.. المرأه ماقصرت كلمت لنا تكسي ودانا مجمع (مول) مش بطال (هالمول لاتروحون له مايسوى المشوار) مسافة عشر دقايق... المشكلة اني لما سألت اللي بالفندق عن السوق اللي ماعرفة اصلا واللي وصف لي المجمع اللي عند محطة (ريم) يعني مش اوت لت.......
اما بالنسبة لسالزبورق نعم فيها سوق الاوت لت جنب المطار ...من محطة القطارات الرئسية بسالزبورق اركب الباص رقم 2 ويوديك ب2ونص يورو تقريبا...
4- النقاب في المانيا والنمسا ؟
الوضع عادي جدا ... سفرتي ما كانت بوقت الموسم ولكن الحمدلله لاحظت كثير من اخواتي الخليجيات متغطياتك كأنك بدولة خليجية... نظرات الاستغراب موجودة ومع توجه الكثير من اخواتنا المنقبات بيكون الوضع عادي عندهم...وانا من هذا المنتدى اسأل الله للجميع التوفيق والهداية واخص بالدعاء لاخواتي المنقبات اللي رضاء الله عندهم ابدى من اي شي لاتثنيهم نظرات ولا غيرها ...Go Ahead ------
5- القطار من ميونخ لزلامسي؟
نعم هناك رحلات (غير مباشره) يعني تاخذ تذكره من ميونخ لسالزبوق و من محطة القطار بسالزبورق تطلع لزلامسي
نصايح عامة :-
o لاتستحي من انك تسأل اذا حسيت انك ضعت او حتى اسأل لتتاكد انك بالمكان و الوقت الصحيح... اسأل اللي شغاليين بمحطة القطار وهم كثير وبكل مكان
o اذا ركبت القطار (ومعك زوجتك) حاول تكون بين الناس ولاتكون بقاطره لحالك ... انا تعرضت لكلام عنصري من مراهقين .. بس سويت نفسي مااسمع... لوكنت بين الناس كان الناس مايخلونهم ويسكتونهم وممكن ترفع قضية عليهم...( خبرة اضيفت لي الحمدلله)
o الالمان فيهم عنصرية شوي ( الشيبان خاصة ) اما النمساويين الطف واكثر قبول للاخر.. يعني الالماني انحش عنه...-----
6- Free Tax التاكس فري (الاعفاء الضريبي)... ؟
جدا ممتاز للي يتسوقون بمبالغ عالية...اذا شريت من محل واحد اكثر من 71 يورو اطلب منه بطاقة الاعفاء من الضرائب(بعض المحلات اذا شافك منت اروبي يذكرك وبعضهم ما يعرض عليك.. وغالبا تلقى علامة الfree taxموجودة عند الكاشير مع مطوية للمعلومات بكل اللغات حتى العربيه)... تزيد نسبة المبلغ المردود لك كلما زادت مشترياتك موجود جدول على نفس الورقة اللي يعطيك... اّذا اقل من 71 يورو ما تستحق الاعفاء... نصيحه فأحسن شي ضبط مشترياتك بحيث تستفيد بأكثر طريقة ممكنه من هذي الميزه... انصح بالمحلات الكبار(تحت اسم واحد) مثل عندنا مارك وسبنسر , وجوه و باريس جاليري ...(مش المولات) فيها عطورات وملابس و وشنط ..الخ لما اتخلص مشترياتك عندهم مكتب TAX FREE يعطيك ورقه عن كل مشترياتك ويذكر فيها المبلغ المفروض يرجع لك....اكتب رقم جوازك وبيانات على الورقة ووقع..
7- اجراءات (الاعفاء الضريبي) FREE TAX
في المطار؟ضروري تحضر بدري شوي اذا انت حريص انك تسترد فلوسك بدون ضغط نفسي من الوقتاحتفظ بالاوراق حقت ال FREE TAX والبطاقة الائتمانيه (اذا كنت ما دفعت كاش)حاول تجمع كل مشترياتك في شنط مخصصه لانك لازم تجيبها معك لدائرة الضرائب في المطار.... لما توصل المطار روح للكونتر لاصدار البوردنق وصعد الشنط اللي مافيها المشتريات .. وقوله عن شنطة المشتريات انك بتاخذها للتاكس فري (الاعفاء الضريبي)... ودائرة الضرائب بيشحنوها لك من عندهم للطياره... بعد مايشفوفوا الاغراض والفواتير بيختم لك عليها وتروح لمكتب لهم ثاني ويرجعون لك الفلوس ( ضروري اتوقع الفواتير وتكتب رقم جوازك و بياناتك عشان ما تتاخر.. خلك جاهز..)
أعذروني على التفصيل الممل لانني يوما ما كنت ادعي للي يكتب بالتفصيل الممل...
الله يعطيكم العافيه واتمنى لكم تجربة سفر وحياة ناجحة وسعيده.....
محبكم.... PAST
فيه نقطتين بعقب عليهم
التاكس فري : انا جربت قبل ، بس شيكو على محتويات البضاعه اللي معنا وماخذوها للشحن عن طريقهم.
بالنسبه للنقاب في اوروبا بشكل عام ، الحجاب افضل لأن بالحجاب مضايقات أقل. ولا يلفت الإنتباه مثل النقاب
وعلى فكره جميع دول اوروبا لابد البعض منهم يعلّق على أي شي غريب يشوفونه ، ماهو مسألة المسلمين فقط ، يعني لو يشوفون مراهقين يهودي حاط جدايل ولابس طاقية اليهود المشهوره كان بعد علّقو عليه وضحكو وغيره من الإصطدامات العنصريه