لاتنسى عندك طريقه الاندرقرواند الاوفر والاسرع لك داخل لندن
واغلب اماكن اللي داخل السنترال لندن تقدر تروحلها مشي والمشي داخلها استمتاع بحد ذاته
لانك تشوف المحلات والسواح
بس ياليتنا تقولنا الاماكن اللي تبي تزورها علشان نقدر نفيدك بطريقه المواصلات

الاماكن طال عمرك هي التالي ::
1- اكسفورد والمحلات اللي فيه طبعا
2- بيق بين
3- الهايد بارك
4- قصر بيكنغهام
5- ترافلجار
6- ساحه البيكادلي
7- لندن اي
8- هاوردز
9- متحف الشمع
10- قصر كنجستون
هذي طال عمرك الاماكن اللي احسها مهمه هناك واذا فيه شيء مهم وانا نسيته ياليت تذكرني فيه
والاهم هو كيف اتنقل بين هالاماكن عن طريق الباصات او القطار وكيف طريقه القطار واسعاره
علما باني حاجز في فندق اسمه سنترال بارك انا عارف انه داج بس يقولون انه قريب جدا للاكسفورد
وازيدك من الشعر بيت انا بروح من كندا الى لندن وانتظر ردك علي واعذرني ان كاني كلفت عليك ..

^^^
الغالي ولد الغالي ..
كل الأماكن هذي تقدر اتروح لها مشي ..
وإذا تبي تجمع فخل البيق بين + لندن أي + هارودز + قصر بكينقهام مع بعض لأنها قريبه من بعض ..
الهايدبارك في وسط كل هالأماكن وتجمعهم كلهم ..
والجو عجيب هناك وانصحك بالمشي الغالي
وأي خدمه احنا تحت امرك ..

والله نفس ما اقول تقدر تروح الاماكن هذي مشي
او عن طريق الاندر قرواند او اللي يسمونه الدول الثانيه ميترو او سب واي
طريق الاندرقرواند الاسهل والافضل وهذي اللي اعرفها
اذا حاب افيدك بالاندرقرواند ماعندي مشكله استطيع الشرح على طلبك وازودك بالخرايط بعد
واعطيك كل مكان كتبته اسمه المحطه اللي عنده
بس انت شنو اللي تامرني فيه وانا حاظر

^^^
ياحلو ياأنا وفعلاً انت حلو جعلك تسلم ..
عجبني ردك فحبيت أحييك على طيبتك وكرم أخلاقك ..
جعلك ذخر دوم ان شاءالله ..

هذي صوره خريطه الاندرقرواند
http://www.oxfordtube.com/assets/london/underground_map.jpg
هذا رابطهم اوضح لك شوي وتقدر تسوي زومات لين تعجبك
اكسفورد والمحلات اللي فيها اسم المحطه اكسفورد سيركس Oxford circus
تحصلها على الخط البني او Bakerloo line هذا اسم الخط
وتقدر توصلها بعد عن طريق محطه البوند ستريتBond Street بالخط الرصاصيJubli line
بيق بين ولندن اي ومبنى البرلمان كلهم نفس المحطه وجنب بعض اسم المحطهWistimister تحصلهم بالخريطه بالخط الرصاصيJubli line
الهايد بارك بالخط الكحلي اسم المحطه هايد بارك كورنر Hyde park corner
قصر بيكنغهام الخط الرصاصي والكحلي والازرق الفاتح اسم المحطه قرين بارك Green park
ترافلجار تطلعلها مشي من محطه البكاديلي او مشي من ساعه البيغ بين او تاخذ محطه الشيرنغ كروس على الخط الاسود والبني
ساحه البيكادلي عندك محطتين للوصول محطه البكاديلي بالخط الكحلي او البني او محطه ليستر سكوي بالخط الاسود او الخط الكحلي او مشي من البغ بين او الاكسفورد ستريت
هاوردز محطتها باللون الكحلي اسم المحطه نايتس بريدج او مشي من الهايد بارك 10 دقايق
متحف الشمع توصلها عن طريق محطه البيكر ستريت اسم المتحف مدام تسو ويمر والالوان اللي تمر محطه بيكر ستريت الوردي والبني والرصاصي والاسود والاصفر
قصر كنجستون عاد احرجتني بالقصر هذا لاني مارحتله ولا فكرت ازوره
اي توضيح اخر انا حاظر

القطري من طيبك والله
وانا حبيتك لله فالله
وزياده حبيتك لانك ارسنالي

بالنسبه للرابط فهو مايشتغل ولكن توضيحك للمحطات واضح جدا والصراحه انا عاجز عن شكرك وطيب اخلاقك
واحرجتني والله يالغالي لكن كل اللي اقدر اقوله الله يعطيك الف الف الف عافيه وان شاء الله نقدر نخدمك
في الجايات فانا زي ماقلتلك تراني من سكان فانكوفر فان بغيت بها شيء او احد من ناحيتك فتامرني امر
طال عمرك ..
اخوي القطري الله يطول بعمرك ومشكور على التوضيح يالغالي وماقصرت والله يعافيك حبيبي ..
سؤال بسيط ان كنتوا تعرفون عنه شيء ولا ترى مو ضروري لان ماودي ازعجكم اكثر ...
هل تعرفون فندق سنترال بارك لاني حجزت فيه لانه رخيص ويقولون قريب جدا من اكسفورد والمحلات الثانيه؟؟؟؟؟
وعوافي للجميع

الله يعافيك
ذخر وماتقصر ياخوي واحنا بالخدمه انا وجميع الاعضاء الباقين
سنترال بارك والله مار علي الاسم بس ما اتذكره وين صاير
على العموم فنادق لندن كثيره واذا فندقك جنب الاكسفور فاعرف انك في قلب لندن الحيوي وكل شي منك قريب ومشي
ولو عندي معلومات كان فدتك فيها
بس ان شاء الله الاخوان مايقصرون ويفيدونك