1. انا رتبت الرحله هكذا ..

السلام عليكم
.
.
شخباركم .. انا ترى مو يديده اصلا من افكر اسافر اطل هني وما استغني ابدا وحتى لو بخاطري بس اسافر اشوف مواضيعكم واشبع رغبتي السفريه لفتره محدوده
رحت شهر العسل الى بالي (اندونيسيا) من بعد الله ثم عضو اسمه كويتي شي جذي اقتنعت وقريت لين قلت بس والصراحه ماخاب من سأل ,, صح مارتبت السياحه من هني بس طبعت كل شي وخذيته وياي وكل يوم قبل لا ارقد بالفندق نقعد انا و زوجي ونقراا بهالاوراق علشان نختار الاماكن واليوم الثاني الصبح نقول للسواق وهو يرتب لنا رحلتنا اذا فيها شي غلط ,, استمتعت و زوجي استانس الحمدلله
بس عيزت اقوله نسافر ويقولي ماعندي لغه مابي اروح مكان
حتى انا لغتي مو لي ذاك الزود بس قاعده اتعلم واقرا علشان اثقف نفسي و اقنعه بالسفر في المستقبل حتى الى اوروبا بكل أمان ,,
الموهيم ان رضى بالاخير نروح تركيا والحمدلله رب العالمين
عاد انا خاطري اروح بالشتويه والعب بالثلج واتزلج بعد مع اني ماعرف ههه بس احب المغامرات والتجارب
قريت وايد لين انفقع راسي واحس ضعت قلت لازم اسأل قبل وبعدين اخلص قراءه
انا الحين مابي الاماكن السياحه لان بصراحه ماحب احد يقولي روحي هني ولا تروحين هناك
احب بروحي اشوف واقتنع بالمكان اللي ابي ازوره واقسم الاشياء
يعني اكثر التقارير رحلات شخصيه والترتيبات للجداول بعد اماكن محدده
انا ابي اروح اشوف اثار وشوي اتمشى وشوي متاحف و شوي حدايق و شوي ثلج وطبيعه وغيره ..
المهم ان رحلتي كامله ان شاء الله بتكون 8 ايام (7 ليالي)
بس ماعرف شلون اقسمها وهل تقسيمي لها صحيح ؟
ماحددت التواريخ لاني للحين قاعده اشوف الرحلات واسعارها على حسب كل طيران
بس بيكون من بدايه شهر فبراير حتى نهايه شهر مارس (بهالحدود)
حاليا حصلت ارخص طيران من تاريخ 19 الى 26 .. بس بنطر اسبوع وبعدها بحجز ان شاء الله

انا رتبت الرحله هكذا ..

• الوصول الى اسطنبول (السكن في السلطان احمد) يومان
• السفر الى بورصه عن طريق العباره ومن ميناء kabatas لان عندهم رحلات كل ساعتين والميناء الثاني رحلتين فقط واوقاتهم مو حلوه ..
• المكوث في بورصه لمده يومان
• من بورصه الى يلوا (مو عارفه شلون اروح لها وشنو احسن طريقه) ارجوا منكم النصيحه ..

بقعد فيها يومين

• الرجوع من يلوا الى اسطنبول (تقسيم) السكن ليوم واحد ثم الرجوع الى البلاد

انا ماعرف اذا كان جدولي حاليا مرتب او لا ؟
وهل يلوا جميله ؟ لان كان خاطري اروح اوزنجول حبيتها اكثر بس قريت انها بعيده وتبي تقريبا 14 ساعه للوصول .. انا معاي بنتي عمرها سنتين و شهرين وبعدين مابي يضيع علي اليوم بما اني مابقعد وايد بتركيا ..
هل تنصحون بيلوا او ابدلها بمنطقه ثانيه تكون قريبه لأسطنبول ؟؟
وممكن اعرف شنو فيها ؟ يعني اوزنجول طبيعتها جميله جداً .. وقريت انها بتكون بارده في الموسم اللي بروحه والصراحه انا ابي الثلج بكل مكان لاني مسافره علشانه ,, وتركت التمشيه والتنزه لأسطنبول ..
.
.
اشكر لكم مساعدتكم مقدماً