ياغالي السلام عليكم
انا وربي مازرت المالديف ولكن انا ايضاً ان شاء الله مسافر لها بشهر 7 لهذه السنه
وحسب بحثي وسؤالي اكتشفت ان مالديفز جوها على مدار السنه معتدل الا في شهر 7 و8 هناك ريال موسميه تصاحبها امطار
وطبعاً انا مالي مطول 3 ايام بس وطالع منها وربك يستر لكن تستاهل اكثر بس غويله شوي وممله بعض الشي لانها حقت استرخاء ورمنسيه ودلع

يا هلا و مرحبا فيك أخوي العمدة ..
مثل ما تفضل أخوي الفاضل أمير بكلمتي , قلة السياح بسبب ارتفاع معدل هطول الأمطار و المالديف مناخها استوائي على مدار العام , بالنسبة لبرنامج الرحلة اقترح عليك انك تزور احد مكاتب الإماراتية وهي أفضل في نظري و يسوون لك باكج مبدئي حسب رغبتك و تاخذ فيه رأي الإخوان لأن الأسعار تتغير من وقت لآخر
و ألف ألف مبروك مقدما

اخوي امير بكلمتي ..
تسلم يالغالي على ردك وتواصلك معاي بالموضوع ..
وانا والله اللي مخوفني بس هالمطر اللي اخاف انه يخرب علينا جو السفره ومايخلينا نستمتع بالبحر وبالرياضات البحريه ^_* ..
وللعلم انا من قطر ..
يعني ان شاء الله بنشوفك في قطر قبل المالديف ^_* ..
وانا ناوي ان شاء الله اسافر بتاريخ 11_7 بإذن الله تعالى ..
دمت بود
اخوك
العمده

اشكرك اخوي مدير خطير على مرورك وتواجدك الجميل بالموضوع ..
صحيح سعدت كثيير بتواجدك ورأيك خصوصا انك راعي التقرير العجيب ^_* ..
تسلم على كل شي والتقرير ماشاء الله كفى ووفى ..
وان شاء الله بنزور فندق الw بإذن الله تعالى ..
دمت بود ..
أخوك
العمده

بس ياليت اخوي امير واخوي الخطير ..
احد يفيدني بالأسعار حتى لو تقريبيه ..
وانا في قطر وعندي ان شاء الله خصم على القطريه ..
ولكن اريد المقارنه بين القطريه والإماراتيه لمن له خبره ..
خصوصا ان الخطير سافر على الإماراتيه وامير اظن انك ستسافر ان شاء الله على القطريه ..
واكون لكم شاكر ^_^ ..

سبحان الله ... انا بعد مسافر يوم 11 خ ...
بس اخوي انا مالقيت على القطريه يوم 11 .. فالبتالي بيكون في يوم 12- 7 .. ولسه اليوم خلصت التذاكر
واتوقع انها رحلتين اسبوعياً او كذا
بالنسبه للأسعار اخوي العمده ... انا مسار رحلتي مختلف ... انا بطلع من الرياض الى الدوحه ومن الدوله الى المالديف .. ب 3900 ريال سعودي .. ماادري وربي كم قطري
بس اتوقع انته بتكون ارخص يعني في حدود 2800 ريال كذا ..
وربي يوفقكم ان شاء الله وجلعها رحله موفقه
تحياتي لك

اخوي العمده
حاول تكون زيارتك للمالديف مربوطه بزياره لبلد آخر
اذا انت معزم على المالديف لاتطول فيها اكثر من 4 ليالي وحاول تحجز شاليه مع حمام سباحه خاص فيك عشان تاخذون راحتكم فيه خاصه وانكم في شهر العسل وعقب المالديف روح بلاد غيرها فيها برامج سياحيه وفعاليات
وعلى فكره اذا لقيت أسعار المالديف غاليه عليك أنصحك بتايلند لأن تايلند فيها جزر هاديه وفيها منتجعات راقيه لاتقل عن منتجعات المالديف في الفخامه والخصوصيه وحاول انك تبتعد عن الجزر المزدحمه أو الشواطىء المزدحمه وحاول انك ماتطول في بانكوك أكثر من 3 أيام لأن بانكوك ماتصلح الا للتسوق فقط
ونفس الكلام ينطبق على ماليزيا ترى ماليزيا فيها جزر ومنتجعات ماراحوالها العرب ليومك وفيها خصوصيه وفخامه وبما انك راح تسافر بالصيف ففي ماليزيا بعض المناطق الجبليه البارده مثل جنتنغ وكاميرون هاي لاند
وكذلك يمدحون جزيرة بالي في اندونيسيا بس انا مارحت لها
وحتى سنغافوره يمدحونها ولو اني مازرتها
حاول انك تبحث أكثر في النت عن المنتجعات الاسيويه وعروض شهر العسل
الله يبارك لك في زواجك ويتمم عليك بالذريه الصالحه

سبحان الله ..
والله اسعدتني اخوي امير بكلمتي بتواجدك معاي في (( نفس الرحله ان شاء الله )) ^_* ..
واشكرك على عودتك للموضوع وردك الثاني يالغالي ..
بس عندي استفسار ..
انت حجزت بكج كامل ؟؟
يعني نشاطات وتذاكر والسكن كله يعني كامل من القطريه ؟؟
والا بس تذاكر وسكن والا تذاكر بس ؟؟
وكم كلفك ان كنت ماخذ بكج كامل ؟؟ ..
واشكرك على تواصلك يالغالي ..

اخوي المرواني الجهني ..
تسلم يمناك على الرد الوافي يالغالي ..
وان شاء الله انا مو مطول في المالديف 4 أيام أو 5 بالكثير ..
وبعدها ان شاء الله بشوف دوله غيرها لكن ليلحين ماحددت والله