السلام عليكم ورحمة الله وبركاته
اول شي قولوا لي الحمد لله على السلامه لاني وصلت البارح لوطني الغالي (فديت ترابه بروحي)
قضيت 33 يوم خارج الوطن وكانت الرحله مقسمه الى لبنان ومصر وراح اكتب لكم عن لبنان ومصر راح تكون في قسم مصر ( النظام نظام يا عيني على الولد يتبع النظام)
طلعت من مطار الملك فهد (ولا يهون مطار الملك خالد ) يوم 19/7/2004 على الخطوط اللبنانيه ( وانصحكم محد يروح معهم لان روحتك مع النقل الجماعي افضل واريح من طياراتهم ) ونزلت في مطار بيروت وعلى طول طلعت لشقه اللي حاجزها خويي ( امحق شقه ) . قالوا شقه وطلعت غرفه مقسومه نصين بخشبه . المهم لعنت الساعه اللي وثقت في صاحبي هو وحجزه الزفت . سعرها كان 60 دولار وفي منطقه قريبه جدا من اللروشه ولحمرا ( دريمز سويتس ) لا احد يسكن فيها تراها زفت .
المهم قلت لصاحبي مالي جلسه فيها وجلست اكلم الفنادق وبعد يومين طلعنا منها وسكنا في فندق خمس نجوم ( رادسون ساس مارتنيز ) وكان سعره 190 دولار بس انا خذيته ب 130 لان عندي خصم على اغلب الفنادق خمس نجوم في العالم من قدك يا ولد
الفندق في عين المريسه خلف فندق فانسيا المشهور وقريب جدا من السولدير
لبنان جميلة جدا وفيها مقومات السياحه والشعب اللبناني شعب راقي يجيد التعامل مع السائح . نادرا تجد فئة ( الزعران على قولتهم ) يعني الملاقيف بلهجتنا . ناس تبتسم ويقدرون شي اسمع سعودي
بجد شعب لبنان يحب السعوديه بشكل خاص ولا اعلم السبب.
وهذي بعض الملاحظات واذا احد عنده سؤال ان شاء الله اقدر افيده باللي اعرفه
1) لبنان ليست غاليه جدا كما يصورها البعض وليست رخيصه . يعني تخيل انك في السعوديه واضرب مصروفك ب 1.5 . يعني اللي ب 30 يصير ب45 .
2) السياح الخليججين وللاسف انهم فشلونا وقلبوا مفهوم السياحه راسا على عقب . وبدل ما السياحه راحه واستجمام صارت السياحه فشخره وتباهي بالسيارات والمقتنيات .
يلفت انتباهك السيارات الخليجيه وخاصة السعوديه وخاصه ( اهل الرياض ) . جيوب همر وبورشات فور ويلز والسياره اللي صاحبها يعتبر على قد حاله تكون فياقرا !!!!!!!!!!!!! والخليجيات الله لا يوريكم يتنافسن في لبس الالماس والمجوهرات !!!!!!! سبحان الله رايحه سياحه والا رايحه حفل زفاف
والشباب كل واحد يقول انا اكشخ من الثاني لدرجه ان البعض من زود التشخيص اللي ماهو في وقته يروح يتمشى على الشاطئ مكشخ بلبس رسمي !!!!!!!!! والبنانيين ما تشوفهم الا يضحكون على ربعنا اللي يسمعون في الكشخه ولا هم عرافين وقتها المناسب . ولو اتكلم عن الفشخره ما راح اخلص ابدا
3) السياح الخليجيين في لبنان شوفة نفس ( لو تقول له وخر وراك زعل ) ومدري على ايش اعصابهم مشدوده . يعني الوضع مقلوب رسمي حبتين زياده !!!!!! ليش انا مش عارف يا جماعه
4) السوليدير ,,, فردان ,,, الروشه اماكن حلوه وجميله جدا في بيروت . عاليه ( يسمونها علاي في لبنان ) ومطاعمها جميله جدا وتعتبر هذا الصيف هي ازحم مكان يكتض بالسياح . برمانا وحريصا وبحمدون جميله جدا وخاصة بحمدون اللي تجي في المرتبه الثانيه بعد علاي .
5) افضل اماكن السكن بالنسبه لي هو فندق هولدي ان ديون في فردان ( خاصه للي يحب زحمة الخليجيين وجلساتهم ) او السكن في فندق المغتربين في عاليه ( تحتك كل المطاعم والزحمه بس الله يعينك لو فكرت تنام قبل الفجر ) . طبعا هذي افضل اماكن السكن ماهو من ناحيه النظافه والسعر ولكن من ناحيه تميز الموقع .
6) في لبنان بدون سياره انت مثل الاطرش في الزفه . يعني استاجر سياره احسن لك بكثير وراح توفر كثير .
وتحياتي