ماشاء الله اخوي حمود مخطط راائع.
واذا عندي تعليقات راح تكون بسيطة
ولي عودة معك باذن الله

ما شاء الله برنامجك مرتب اصعب ما فيه ثنتين الاولى : الذهاب الى فينيسيا والعودة بنفس اليوم وهذي مالها حل وفينيسيا تستاهل
الثانيه : الذهاب من انترلاكن الى شلال الراين وبريقنز وزيورخ والشلال جميل ويستاهل العنوه ولكن ما يجي لك تضيف محطه يومين بمنطقة كونستانس بحيث تخصص يوم للامكان اللي ذكرتها ويوم لليورب بارك ساعتين من كونستانس بصراحه اصرف من الفوكس تاون وسويسرا المصغره يعني تسحب يوم من ميلان واليوم حق انترلاكن اللي خصصته للشلال واليورب بارك افضل من الفوكس ومتحف سويسرا المصغر والقرار يعود لك وما شاء الله عليك راح تعرف تختار ان شاء الله تقبل مروري وتحياتي

الف شكر على اهتمامك
بالنسبة لرحلة شلالات الراين راح تكون هي الهدف الاساسي اما زيورخ ولونجيرن فقط مرور وجولة سريعة
اما الفوكس تاون فيني فيني عشان المدام
فينيسيا اذا ناسب الوقت جولة يوم واحد بالقطار كثير من الاعضاء جربوها
اشكرك كثيراً على مرورك

اخويا حمود ..المعذرة والله ..
عندي مشكلة بايميلي ما تاصلني رسائل المواضيع المشترك فيها .
خيرة ان شاء الله .
مخططك ما شاء الله تبارك الرحمن متعوب عليه ومرتب الصلاة على النبي .
التعليقات هي :
اليوم الثاني ..حجز تذاكر القطار راح يكون عليك اوفر اذا حجزتها من النت على موقع القطارات الايطالية من ميلانو الى فينيسيا .
وان شاء الله تلقى الاوقات المناسبة لك .
بشرط ان مواعيد التذكرة لا يمكن تغييرها ..اذا كانت غير مستردة ..يعني زي العرض التشجيعي ما يمديك تغير مواعيده .
والفلكسبل للشخص 75 يورو ذهاب وعودة .
بينما في الانترنت للغير مسترد يوم شيكت عليها كانت تبدأ من 18 يورو .
والفرق مو هين .
ولك الخيار .
اليوم الثالث : ممكن وصولك الى لوقانو قبل موعد التشيك ان ..وراح يكون عندك يوم طويل ..وانصحك بزيارة خفيفة على كومو ..تستاهل وجميلة .
اليوم الرابع..سبحان الله كان نفس مخططي ..بس خليت الميني سويس بالاول ثم رحت الفوكس تاون .
وانتبه لا تضيع مفرق مليدا لأنه راح يجي بعد النفق على طول ..تسوي زي صاحبنا ..طلعت عيونه الين لقى رجعة .
اليوم الخامس : موعد التشيك ان راح يكون متأخر ..اذا كان خروجك من لوقانو في الصباح بدري .
وانصحك بزيارة المطل الهاردر كلم قبل لا تروح للشقة .
فيه مقترح وهو كالتالي :
الخط السريع بين لوقانو وانترلكن راح يمر فيك بالقرب من لوزيرن ..وقريب من لوزيرن التلفريك المكشوف .
فبدل ماتروح وترجع ..اطلع من لوقانو وزور التلفريك المكشوف ثم لوزيرن ..وارجع بعد كذا لأنترلكن .
وهنا لازم تعطي خبر لأصحاب الشقة ان وصولك راح يكون متأخر الى نهاية النهار مثلا .
والهاردركلم موجود في سنتر انترلكن ..قريب جدا ..وممكن تعمله في اي يوم .
هذا المقترح فقط لتخفيف المشاوير ..ولك الخيار في اعتماده .
==
بالنسبة لأنشطة انترلكن ..انصحك في يوم يكون نشاط بعيد ويوم نشاط قريب .
مثلا القمة والشلالات والبحيرتين قريبة .
لكن الراين وزيورخ ولوزيرن بعيدة .
===
حاس والله اني لخبطتك ..وهذا ترتيب لنفس الاماكن لكن بوضع مختلف :
انترلكن :
نبدأ من اليوم الخامس الى اليوم العاشر :
اليوم الخامس يوم الخروج من لوقانو والمرور على التلفريك المكشوف ثم لوزيرن ثم انترلكن .
اليوم السادس :
زيارة شلال التروميل باخ + قمة اوروبا من قرية وادي لوتربرونن .
اليوم السابع :
شلالات الراين + زيورخ .
اليوم الثامن :
زيارة مطل الهاردر كلم + شلال الجس باخ + قرية جريندلوالد (ويوجد مطل في القرية) .
اليوم التاسع :
زيارة بحيرة الاوشنسي والبلاوسيه .
اليوم العاشر :
لك حرية اختيار الانشطة .
مثلا زيارة كهوف ساينت بيتس الملحية + قمة روثورن بالقطار البخاري
خوانق نهر الار وشلال الريخن باخ + متحف البالينبيرج
وغيرها .
===========================
اذا بقيت على مخططك ..فجميل ايضا .
والله يكتب لك اللي فيه الخير .
وبالتوفيق أخوي

اعجز عن الشكر اخوي ميدو
ملاحظاتك كلها في محلها وراح آخذ فيها
بالنسبة للتذاكر راح آخذها من النت بس رأيك كم ساعة ممكن تكفي فينيسيا
الاسعار طلعت 185 يورو 3 رحلات لشخصين من ميلان الى فينيسيا ذهاب وعودة ورحلة الى لوغانو ذهاب فقط هل السعر مناسب
الشكر الجزيل لك ميدو

بما انك سوف تخصص يوم لشلال الراين وزيورخ والمسافه من انترلاكن اكثر من ساعتين وانت راح تقطع المسافه وتعود مره اخرى لا زلت اشد عليك و انصحك تضيف محطة كونتانس يومين بحيث عند الانتقال من لوقانوا يمكنك التوقف عندر ريف هايدي ومن بعده بريقنز النمساويه ثم الى سكنك في منطقة كونستانس (حاول يكون السكن على طرف البحيره باتجاه المانيا وشلال الراين ) اليوم الثاني الى اليورب بارك ساعتين او اقل حسب موقع سكنك في كونستانس وعند العوده المرور على زيورخ وقضاء اخر النهار مع بداية المساء
وعند الانتقال الى انترلاكن التوقف عند شلال الراين فتره ما قبل الظهيره وعند العصر التوقف في لوزيرن تحياتي

جاري البحث عن فنادق مناسبة