Mrs_albrahim
22-07-2022 - 03:04 pm
السلام عليكم ورحمه الله وبركاته
وكل عام وانتم بخير ان شاء الله... ويارب ينعاد عليكم
انا اليوم جايبه لكم اخبار عن مطعم الشرفه...و بدخل في الموضوع دوغري بحكم ان ماعندي اسلوب في الكتابه واعذروني على اسلوبي الركيك....
زوجي قال لي اقتراح انه نروح نفطر في الشرفه......... بصراحة ماكنت متحمسه ابداً خصوصاً بعد ما قريت تقرير الاخ ديربي عنه.. وبعد ردود الاخوان ... حسيت ان المطعم ما يسوى
قلت لزوجي انا قريت في المنتدى ان هالمطعم ما يسوى... بس هو اصر...... خصوصاً ان المطعم مسوي عرض بوفيه افطار ب 49 ريال فقط
اتصلنا عليهم عشان نحجز... قالو مافيه حجز .. تفضلو اي وقت المطعم فاضي
المهم بعطيكم وصف للي شفته.....
وصلنا المطعم قبل الاذان بأكثر من ثلث ساعه
المطعم من برا حلو ديكوره ..ومتعوب عليه
المطعم من داخل عادي .. وشكله شعبي..
فيه جلسات خارجيه في الهواء الطلق...
وفيه جلسات داخليه داخل المطعم...
وفيه جلسات في الطابق العلوي على الشرفه في الهواء الطلق ايضا..
زحمه بشكل فظيع (بالموت حصلنا مكان في الطابق الثاني)
العماله من الجنسيه المصريه والبنغاليه والسوريه (لاتعليق)
مافيه ترحيب بالزبون او ادنى اهتمام.. يعني تدخل المطعم ولا عندك احد .. تدور مكان بنفسك .. كل شي تسويه بنفسك لان العماله مشغولين مره ولاهم فاضين لك
تجي الطاوله فيها خمس كراسي.... وصحن لايرى بالعين المجرده في بالظبط ثلاث تمرات معرعرات مغبرات وعدد 2 مويه فقط...
ركزو معي شوي...موقع البوفيه امام باب المطعم... ولكم ان تتخيلو المسافه التي قطعتها عشان اوصل للبوفيه واخذ صحن شوربه...(يعني لازم امشي من الكبينه اللي انا فيها في اخر الطابق الثاني ... وبعدين اقطع ساحه الالعاب وبعدين انزل الدرج يمكن 30 الى 35 درجه..وبعدين اقطع المنطقة الداخليه للمطعم وبعدين اطلع للمنطقة الخارجيه للمطعم اللي فيها البوفيه.... والبوفيه زحمه...والاكل شوي
الاكل... نوعين شوربه فقط... حريره وعدس
الحلويات..(توقعت اشوف قطايف وكنافة وبقلاوه وعصمليه او على الاقل نوعين تمر).. ماكان موجود غير بسبوسه يابسه شكلها من اسبوع... حلى كاسترد الله يكرم النعمه... ولقيمات مدري وش تبي لا عليها شيره ولا عسل
الشراب.... عاملين يمكن 10 دلات قهوه فقط .. لكل زباين المطعم...بارده مسوينها من الصبح
شراب قمر الدين ... شراب توت (بس مو فمتو)كان حامض ماكان حلو
السلطات... حمص وتبوله وسلطه خضرا
الاكل..... مكرونه .. رز... دجاج صينيه.. سمك.. لحم..سمبوسه... كبه... فقط
هذا اكلهم
الكؤؤس بلاستيك ...(وين رايحين استراحه)
الصواني وصخه وصخه وصخه
وقسم بالله بأم عيني شفت الجرسون البنغالي... يجمع حبات اللقيمات الي طاحت على الطاوله من الناس ويرجعها في الصحن...
عامل النظافه عندهم عشان يشيل بواقي الاكل من الطاولات... يدور بزبالته البرتقاليه ويظف الاكل... (بالله هذا منظر مطعم)!!!!!
الجلسه خايسه... اضاءه تجيب المرض... وذا المكيف الصحراوي يهب فوق رؤؤسنا .. صدعنا منها
وبالرغم من الخياس هذا كله.................. فيه 15% خدمه.......... على ايش؟!؟!؟؟!؟!
يعني ما ادري وش يضرهم لو حطو بوفيه في الطابق الثاني... من كثر اطباقهم عاد اللي طابخينها عاد!!!... بس سبحان الله حاطين محاسب.. بس اذا بغيت احد يساعدك ماعندك احد
بإختصار انا اعتبره اخيس مطعم دخلته في تاريخ حياتي...
اللي عنده الفضول يروح يشوفه من برا... ويدخل ويتفرج فقط... بس لاتغامرون وتاكلون... والله حرام ما يسوى 10 ريال عليه... لا ورسوم خدمه بعد.. ماحقرو انفسهم
وان شاء الله يكون كلامي اقنعكم....لان الشئ السئ المفروض نقاطعه.. عشان على الاقل يتعلمون احترام الزبون.. وترتقي مطاعمنا
وان شاء الله اكون افدتكم
مشكوره الله يعطيك العافيه ..
وبصراحة لازم يعيدون حساباتهم أصحاب المطعم لأنه مثل ما تفضلتي ديكوراته حلوه وموقعه حلو ..
ولازم يكون مستواه أفضل من كذا بكثير ..
.