- الجزء الأول :
- كانت زحمة ماكنت أتوقعها الصورة الثانية راح تتحدث عن نفسها
- وهذه صور لجاكرتا من جهة البحر
- لحظة الهبوط
بسم الله الرحمن الرحيم
السلام عليكم ورحمة الله وبركاته
جالس لي خمس دقايق , أحاول أجيب مقدمة زينة , للأسف القريحة ماطلعت بشيء
قلت يابو خاطر شرايك بالتنميق والتضبيط الزين لإخواننا واخواتنا في المسافرون العرب قلت ياولد مايبي لهاش
سوالفي وهرجتي كلها راح تكون باللهجة العامية , على لغة عربية فصحى تأثرت منها بواحد رجع معنا من اندونيسيا
أبتكلم عن الرحلة بشكل عام , مع إني مهما كتبت في التقرير راح أكون مقصر فيه لأن اللي شاف ماهو مثل اللي سمع وراح يكون التقرير بالتفصيل الممل ..
بصراحة ما توقعت إن الأمور راح تكون تمام , ولا توقعت إن الأمور راح تتسهل لي ولصاحبي الغالي أبو عايد ..
بدايتها فكرة كانت تمر علينا تطق هرن بس بالعادة تكون مزعجة لكن هالفكرة أعجبتني ,فكرة السفر إلى بلاد الإندومي من بعد ما قرأت الكثير في المسافرون العرب ,
من جهة أخرى , كنت متخوف ومتردد من السفرة بسبب التحذيرات التي ذكرت في الموقع , لكن يمكن هي كانت الدافع الأول لنا للسفر والتجربة بأنفسنا ..
طبعا أي رحلة لأي شخص تمر عليه مواقف طريفة و حزينة , لكن مايتبقى لنا منها سوى الذكريات ...
بالنسبة لأبو خاطر محاكيكم أقول هالمواقف كلها راح تكتب بشكل خاص وحصري للمسافرون العرب , و
هذا عربون شكر مني و كأقل شيء أقدمه للأعضاء والزوار ومن مراقبين ومشرفين على الموقع ...
التقرير راح يكون متعدد الأجزاء , ومشوق حسب ماقاله صاحبي , اذا طلع بايخ لا أحد يلومني ... :biggrin:
الجزء الأول :
يوم الإثنين والثلاثاء طبعا الموافق بتاريخ 26 و 27 ميلادي شهر يناير كان فيه مشكلة عندنا بالنوم وكله تفكير بهالسفرة الأولى إلى بلاد العمة , بديت أحس ان الدقايق والثواني تمر كأنها ساعة , من زود الحماس .. يوم الأربعاء الموعود يوم الرحلة رحنا صرفنا دولارات من صرافة بنك سامبا لأنها الطريقة الأسهل لنا , طبعا رحنا للمطار قبل الرحلة بأربع ساعات مرتزين في المطار مستعجلين ع الركوب بالطيارة :biggrin: , طبعا من شاف شناطنا قال إننا بنجلس شهرين في اندونيسيا .. قصينا البوردنق وشلينا عفوشنا معنا ماشحنا ولا شنطة خايفين من السرقات , رحنا نشوف عملة أصغر بالبنك الموجود في المطار , شفت شيء عجيب اثنين الله يوسع صدورهم اللي شفته معهم واللي كان واضح أرز بسمتي 10 كيلو :8888:
طبعا مالقينا عملة صغيرة , إتجهنا للجوازات ختمنا على الجواز ...عدها ذهبنا للبوابة
كانت زحمة ماكنت أتوقعها الصورة الثانية راح تتحدث عن نفسها
للأسف تفاجأت , لكن خلني اسكت واخلي التعليق لكم على الصورة السابقة ... اللي يطلع الإجابة له هدية
إنتظرنا طقة نت وسوالف مع أبو عايد , لين قبل الرحلة ب45 دقيقة , أول ماركبنا الطيارة وكلن زبن في مكانه نسمع الكابتن يقول أربطو أحزمتكم وشدو حزامكم سوف نقلع , افضل شيء صار لنا إن ما كان فيه أحد جنبنا , يعني بناخذ راحتنا ...أقلعت الطيارة وسلمونا هالإستمارة (الفيزا) عشان نملأها بالبيانات ..
خلصناها و من زود الفضاوة نشوف اللي ورانا يبونا نملي لهم إستماراتهم >مسوي دافور :8888:
بصراحة الرحلة طويلة وحسينا ان الوقت ما يمشي , نمنا صحينا كلن ينقلب ع جهة لكن الوقت هو نفسه , كنت في البداية اسولف مع ابو عايد و اخطط وش راح نسوي لكن من درجة الفضاوة خلصنا تخطيطنا لرحلتنا هذي وكنا نخطط لرحلة ثانيه خلال الثلاث الشهور المقبلة
طبعا هذي صور من الطائرة ..
هذه صوره للجزر القريبة من جاكرتا
وهذه صوره قوارب على الشاطيء
وهذه صور لجاكرتا من جهة البحر
لحظة الهبوط
وصلنا جاكرتا الساعه 11:30 صباحا بتوقيت جاكرتا , كان الجو غائم جدا , دخلنا المطار و إتجهنا إلى حقين الفيز ودفعنا عني وعن صاحبي 50 دولار ينطح دولار , كان السعوديين ينعدون على الاصابع اللي معنا بالرحلة , لكن هناك شيء أحب ذكره لكم , لاتحاولون إنكم تستخدمون عملات كبيرة , لأن اللي بحقين الفيز راح يقولون مافيه صرف وانتظر أو أنك تروح وتترك الباقي عندهم ! صارت لسعوديين أمامي في السرا
بعدها مسكنا سرا عند الجوازات حقتهم , قبل مانختم على الجوازات جانا واحد اندونيسي يتحدث بلغة عربي مكسرة , يقول تبون أمشيكم , لازم هدية حق مدير أنا طبعا الشيطان ملعون كنت محاكيكم بعطيه لكن صاحبي ابو عايد رفض هالفكرة ومسكنا السرى وختمنا وكانت اجرائاتهم روتينية سهله مااخذت عشر دقايق , وعدينا الجمارك , ومن بعدها رحنا للصرافين , كلن يصايح من جهة يبي نصرف عندها تذكرت أبو محمد الله يهديه وصياحه في حراج بن قاسم :36_15_24:
صرفنا واتجهنا لمكاتب الفنادق والتكاسي واكثرهم كان الحريم , طبعا أخوكم ابو خاطر ملتزم >يتميلح عشان يرخصون الأسعار
طبعا أخذنا بفندق أويسيس أمير غرفة مزودجة , كانت عن طريق مكتب كاها ب470 ألف روبية , و أخذنا التاكسي عن طريقهم ب170 ألف روبية ...
المهم طلعنا من المطار وماكان عندي وقت اصور اول شيء من الصياح اللي حولي ثاني شيء أبي اخلص كل شيء بيدي , هذي صورة خارجية للمطار
جانا السواق بالسيارة فولفو موديل 1996م , فتح الباب لهم وركبو الشيوخ أبو عايد و أبو خاطر مرتزين بهالفولفو , كان السائق ممتاز يتكلم اللغة الإنجليزية إسمه منير وسوف أورد أرقام الذين تعاملنا معهم بآخر التقرير ... طبعا قعدنا نسولف معه وفلة حجاج وفصفص وبيبسي >>:biggrin:
هذه مجموعة صور و احنا على طريق المطار و من داخل جاكرتا
(هذي ودي إنها عندنا بالبطحاء):biggrin:طبعا وصلنا فندق اويسيس امير وكان الإستقبال بإبتسامة لم أجدها طيلة عمري
أعطينا الفوتشر إلى موظف الإستقبال , ماصرنا نشوف شيء نبي النوم , أخذنا كرت دخول الغرفة , دخلو عفوشنا الغرفة , و انتظر عند الباب يبي البخشيش وتقفل الباب في وجهه
هذي الصور لجاكرتا من الغرفة
طبعا نمنا وصحينا الساعه 8 مساء بتوقيت جاكرتا كان الجو ممطر , بصراحة جو روعة ماتعودنا عليه ماتعودنا إلا على غبرة الرياض الله يخليها لنا
رحنا لسوق أتريوم بس عشان نتعشى وكان قريب من الفندق حوالي 200 متر منه
هذه الصوره الوحيدة لسوق أتريوم لأن الجوع وقتها كان مأثر علينا
تعشينا بكنتاكي وكان سيء بدرجة مااتتوقعونها .. بعد العشاء أنا صرت أدور على الفندق بأقرب وقت , لأن الأمر مايستحمل ...
مكالمة لسويسرآآ:redface:,...........................
ترقبو الجزء الثاني >يسمع بالتشويق:36_1_20:
وبدايه قويه في التقرير
بس اخوي ياليت تفصل اكثر من ناحيه الاسعار كم التكسي وكم الفندق و و و وو
واستمرر ونحن متابعين