سافرت الى تركيا لاول مره وكانت سفره جميله جدا وممتعه وان شاء الله ربي يكتب لنا زياره لها مرات جايه....هذي اهم النصائح لزائر تركيا والي استفدت منها كثير وكانت سبب بعد الله في توفيقنا بالرحله...
1- كنت قبل الرحله بشهور اقرأ كثير عن اسطنبول و قريت تقارير كثيره من المنتديات و من كثر ما قريت كأني قد زرتها ,ضروري كل مكان تخططون تزورونه تعرفون باي منطقه وايش اسمه وكيف الطريقه المناسبه له ...(وقفتني سيده خليجيه تسال عن مول في تقسيم قلت لها فيه اكثر من مول وفيه اسواق شعبيه !قالت والله ما ادري فيه هنا سوق يقولون عنه وما اعرف اسمه ؟؟ )طبعا تصرفها غلط وخصوصا معاها بنات واطفال صغار ...
2-كثير من زوار اسطنبول يجي في باله اول شي ( وين اسكن ؟ تقسيم ؟ او السلطان احمد ؟) السطان احمد اهدئ ومناسبه للعوائل اكثر وقليل فيها البارات والمراقص مو مثل تقسيم ,لكن ما تقفل المحلات والمطاعم الساعه 7 مساء مثل ما قريت ..كنا نسهر الى الساعه 12 وانا اقصد بالتحديد الشوارع الي حول المسجد الازرق وايا صوفيا ....ممكن اسكن في الجانب الثاني لكن ابعد عن الميدان وشارع الاستقلال فيه منطقه شيشلي كانت جميله وهاديه
غير كذا الي يزور اسطنبول اول مره وحاط في جدول رحلته (المسجد الازرق وايا صوفيا وتوبكابي والاكواريوم وفيا لاند والسوق المسقوف والسوق المصري )فالافضل له يسكن في السلطان احمد حتكون قريبه منه هالاماكن ...غير ان المولات (مرمره مول واوليفيوم وفورم اسطنبول ) كلها في هالجانب وبعيده عن تقسيم
3-كانت رحلتي مده 10 ايام كلها قضيتها في اسطنبول وحسيت انها قليله عليها اتوقع شهر كامل ما تكفي لها..وكثير كانوا يقولون الافضل يوم تطلعين بورصه او يلوا مو بس اسطنبول لكن كانت رافضه لسببين : لاني اول مره ازورها فلازم اكتشفها اكثر ..غير كذا بسبب وجود اطفال صعب جدا التنقلات الكثيره حكتون متعبه لهم
..قضيت يوم كامل في ايوب وكانت جميله وهاديه ويوم ثاني قضيته في قريه بولونزكوي عشت جو الريف وحياه الهدوء وهي قريه في الجانب الاسيوي تبعد عن تقسيم تقريبا 27 كم
4- الجانب الاسيوي جميل جدا وهادي تفاجات فيه كثير وبالذات شارع بغداد كان راقي والمحلات الي فيه حلوه واخف زحمه وكان قليل العرب فيه بالذات الخليجين مع انه مريح لكن فعلا المثل الي يقول (الحشر مع الناس عيد )
5-التكاسي نار نار .. والي ميزانيتهم على قدهم ضروري جدا يسكن في فندق قريب من محطه ترام او مترو ..وفيه بعد بعض المولات والاماكن السياحيه لها باصات معينه توصلك لها ...مثلا بيرلوتي رحنا في المره الاولى في تاكسي لكن اكتشفنا باص يوصلنا الى تلفريك بيرلوتي
6-اغلب المتاحف والمزارات تفتح من الساعه 9 صباحا كنا نقوم بدري ونوقف عند شباك التذاكر من الساعه 8 ونص قبل الزحمه والحوسه والطوابير الطويله الممله
7- الشعب التركي طيب وخدوم مع انهم عصبيين ويتنرزفون بسرعه وما قابلنا الا اثنين ثلاث كانوا معاملتهم جافه وفيها قله ذوق لكن الاغلبيه ودودين ...وبخصوص نظرتهم ومعاملتهم للعرب بصراحه شفت بعض النماذج من اشقاءنا خلتني اقول ( ما ينلامون الاتراك )يعني مره كنا في مطعم راقي وهادي في تقسيم فجاءه دخلوا عائله عربيه وسببوا ازعاج وقلق وصاروا يتناقشون بالاكل الي في المنيو بصوت عالي وكانهم في بيتهم الى ان قاموا بعض زوار المطعم ..ومره كنا في دولمه بهجه وكان عربي مع زوجته وعياله سببوا ازعاج وحوسه للقروب كله وغير تعليقاتهم على القصر بصوت عالي ...اما اخواتي الخليجيات الله يهديهم مدري مين قايل لهم انهم في عرس ؟؟ مكياج وكعب وملابس كلها ترتر واللوان وغير العبايات الي كانها فساتين سهره وكنت اشوف نظرات الاتراك للخليجيات شي يفشل و واضح انه يمسخرون علينا ...ونصيحتي بما انك سائح لازم تكون سفير لبلدك ولدينك و بيئتك وضروري تكون محترم علشان الكل يحترمك ويخدمك ..غير كذا لازم نعرف ان مجتمعنا الخليجي هو الوحيد الي يحب المظاهر والدفاشه والفشخره واغلب المجتمعات الثانيه تميل للبساطه يعني بالعربي (اذا سافرتي موضروري تشيلين معك ساعه روليكس وشنطه سيلين وجزمه برادا )
8- ضروري تكتب اسماء الاماكن الي راح تزورها بالتركي علشان تعطيها لتاكسي او اذا كنت تبي تسأل عنها لان ممكن طريقه نطقنا لها ما يفهمونه الاتراك
9- بخصوص الفنادق ..لا تعتمدون على الي مكتوب في البوكنج مثل الغلايه وكوايه الملابس ..كان مكتوب انها موجوده لكن تفاجأنا انه مافيه بالغرفه لما قلنا لهم قالوا اذا طلبتوا راح نجيبه لكم ..ولما طلبنا كوايه اعطونا في المره الاولى بعدين اخذوها قالوا فيه نزيل يبيها ..ريحنا روسنا واشترينا وحده صغيره ب 50 ليره وغلايه كهرب ب10 ليرات
وفي النهايه اتمنى ان تكون هالنصائح مفيده لغيري مثل ما استفدت انا منها