ياخي الكريم كيف الميزانيه ماتكفي انت صراحه بتسد نفس الي بيسافر قريبي سافر مع زوجته وبنت وولدين واخذا تقريبا 15يوما في النمسا ولم تكلفه الرحله الا في حدود 20000الف علما نه يصرف كثير ياخي التبذير والبذخ ماهو زين شكرا قل ياخي مثلا الايجار بحوالي 12000ريال والباقي يطخطخ فيه في مدة اسبوعين معقول بيصرف هذا المبلغ هذا وجهة نظر فقط واحترم وجهة نظر كل الاخوان جميع

شف يالغالي
بالنسبة للميزانية على حسب الصرف
انا 30000 ريال يالله كفتني انا وزوجتي
اما بالنسبة لاستأجار السيارة اخذ في بالك انهم بايخذ منك تامين 700 يورو
بس عندي سوال وين بيكون تسليم سيارتك ؟؟
وافضل انك تستخدم الفيزا ( طبعا المبلغ بيحجز عليك في الفيزا ولا هو راجع الا بعد 30 يوم من العملية )
اما زيلامسي معشوقة السياح
افضل انك تاخذ شقة هناك
طبعا عشان ماتنصدم عند مغادرة الشقق ياخذون منك يورو ضريبة لكل شخص بعدد الايام يعني احسب حسابك على 32 يورو ضريبة + 40 يورو تنظيف
يعني لاتتعب نفسك وتقول ابنظف الشقة
خلها زي ماهي
طبعا الجو والترفية 100%
فيه مطعم تركي في زيلامسي مقابل مركز الشرطة حلو واكلهم مره لذيذ
اذا خليت المطعم على يسراك والشرطة على اليمين يجيك 2 شارع على اليمين ادخل معه تمشي حوالي 100 م تلاقي بقالة عربية فيها كل احتياجاتنا العربية وبجوارها مطعم هندي مره مشطشط ياحبذا انك تجيه وقت المطر
ميونخ ماجيتها

الى اين
اخوي شكرا على مرورك بس ليه ماتكفي يعني تتوقع كم بتكفي

salah2010
ههه اخوي صالح وانا معاك بكل الكلام اللي قلته بس يمكن قصده مع التذاكر ماتكفي انا قصدي 25 الف ريال بدون تذاكر

بندر ابونواف
مشكور وماقصرت على المرور وافدتني بصراحة على الدقة
لكن عندي استفسارات قصدك 30000 بدون تذاكر يعني سكن ومعيشة بس
النقطة الثانية بالنسبة لاجار السيارة باخذها من فيينا وارجع اسلمها بميونخ وبالنسبة لحجز المبلغ عادي خله يحجز بالفيزا
بالنسبة للضريبة وتنظيف الشقة عادي يعني بتكون 500 ريال
اما الشقة والله انها براسي عشان ناخذ راحتنا بحكم انه اطول الايام بنجلس فيها هي زيلامسي
واذا قربت ابروح ابشغلك بالخاص شكلك نفس طبعي بالاكل

دام فيها دعوه بنرد
مايصير نشوف الموضوع وماندلي بدلونا
شوف ونا اخوك المبلغ ان شاء الله يكفي
والاخ الي يقول مايكفي لانه توقع انك تقصد التذاكر والفنادق ومعه حق
بس لو تعدل تعديل بسيط في البرنامج
يعني تضيف سالسبورق والله تستاهل
يعني يكون البرنامج كالتالي
3 فينا
7 زيلامسي
2 سالسبورق
3 ميونخ
وقمه المتعه راح تكون في استيجار السياره
سواء اخذتها من فينا اخر يوم وتسلمها في سالسبورق اخر يوم وتطلع ميونخ بالقطار
او اذا تبي الاوفر تاخذه من القريه الالمانيه القريبه من سالسبورق بس تعدل في البرنامج
ويصير فينا سالسبورق زيلامسي ميونخ وتسليم السايره يكون اول ماتوصل ميونخ
بس عن تجربه شخصيه المسار الاول افضل اولا لان الطريق من فينا الى زيلامسي متعه مابعدها متعه وبعدها تطلع الى سالسبيرق وتسلم السياره بكل سهوله لانها مو كبيره وبعدين تطلع بالقطار الى ميونخ وتنزل بالسنتر
وحاول يكون الفندق قريب من محطه القطارات الرئيسيه مثل السوفتيل و انتر ستي و anna وغيرها
لانه من تطلع من البوابه تمشي برجولك للفنادق وكل شي حولك الاسواق وساحه مارين بلاتز

المسافر نت
قل امين الله يوسعها لك ويفتح لك ابواب رزقك بهالشهر الكريم انا حجزت طيران وخلصت وخليت البرنامج مثل ماقلت
3 فينا
7 زيلامسي
2 سالسبورق
3 ميونخ
بس الحين باقي لي اجار السيارة والسكن مسافر واللي يرحم والديك تقدر تساعدني

انا اتوقع المخطط يكون كذا افضل
فيينا 3 ايام
سالزبورغ يومين
زيلامسي 7 ايام
ميونخ 3 ايام
تروح بالقطار من فيينا الى سالزبورغ وتنزل اهلك بالفندق وتروح بالتاكسي الى القريه الالمانيه القريبه من سالزبورغ وتستلم السياره وبعدين اول ماتوصل ميونخ تسلم السياره
لعلمك السكن في ميونخ غالي هالفتره بسبب مهرجان عندهم حط هالشي في بالك
مهم نعرف اعمار الاطفال لان اذا اكانوا كبار نادرا ماتلقى غرفه تقبل طفلين معاك كلهم بين 8 و12 سنه مثلا وفيه بعض الفنادق بالغرفه الثنائيه ماتقبل الا طفل واحد اقل من 12 سنه
والشي الاخير لما تحجز السياره والسكن شوف كم راح تكلفك وقتها راح تعرف كم الميزانيه اللي تكفيك وترى اذا بتاكلون من المطاعم غالبا ماراح يكفيكم هالمبلغ لان الاكل بالمطاعم غالي هناك خصوصا العربيه والهنديه وكمان لو كان المبلغ شامل التسوق ما راح يكفي
وانا افضل بزيلامسي تاخذون شقه وتطبخون بنفسكم وكمان بميونخ فيه شقق اعرفها ان شاء الله ماتكون فل
اعطيني تاريخ العوده متى واعمار الاطفال وانا اجيب لك خيارات السكن ويهمني اعرف كم اقصى حد للسكن بالليله عشان اجيب لك شي قريب منه