1. السلام عليكم ورحمة الله وبركاته


2. شخباركم يا الربع؟!!

السلام عليكم ورحمة الله وبركاته

شخباركم يا الربع؟!!

الله يسلمكم آنا رجعت الأسبوع الي فات من رحلة سيشل احلى رحله في حياتي!! رحلة الروقان والريلاكس والبال الخالي.. خليني أوصف لكم الرحله والمكان والجو وأعطيكم فكره عن الأسعار وطبيعة الناس وبعض المعلومات الي إن شاء الله تفيدكم لو فكرتو تزورون سيشل..
رحلتي كانت إلى ثاني أكبر جزيره في سيشل وهي جزيرة براسلين ((تلفظ برالين)).. مثل ما قلت هي ثاني أكبر جزيره في الأرخبيل السيشلي بعد جزيرة ماهي إلي فيها العاصمة فيكتوريا والمطار الدولي.. وصلنا ماهي بعد رحلة طيران دامت 4 ساعات ونص تقريباً من مطار الدوحه على القطرية.. وصلنا الصبح المطار كان صغير وهادي جداً مافيه زحمه والموظفين كانو في منتهى الذوق والاحترام.. الجو كان رطب وحار الصراحه آنا إنصدمت بس الحمدلله كان هذا اليوم إستثنائي بلنسبه للجو لأن باقي الأيام كان الجو حلو جداً يعني الشمس كانت حاره وساطعه إذا الواحد يمشي فيها بس في الظل تكون النسمات بارده وماتحسون بلحر أبد.. ومن ييجي العصر يكون الجو خيالي نسمات حلوه والسما زرقه وفي شي في الجو العام يشرح الصدر.. الديره شرحه وبلرغم إن مافيها كثير برامج خصوصاً لجماعه مثلنا((3 نسوان ثنتين منهم فوق الخمسين سنه أمي وخالتي)) يعني لو كان الجروب شبابي أكثر كان ممكن يكون في برامج أكثر مثل رحلات الغوص أو الصيد أو لعب الجولف في أكبر ملعب جولف في المحيط الهندي وهو ملعب فندق لومييرا في براسلين.. ((حديقة هذا الفندق الي فيه الملعب خيال وتابع للفندق بيج أسمه سانت جورجيت في منتهى الجمال لكن لازم قبل ما الواحد يروح لهذا البيج يتصل بلفندق ياخذ موعد ((بدون رسوم ولا فلوس ولا شي)) موعد بس لأنهم حريصين إن البيج يكون رايق ومافيه زحمه)).. ولكن بلرغم من قل البرامج وطول فترة الرحله الي دامت 13 يوم ما حسينا بلملل أبد!!! الرحله رايقه وجددت نفسيتنا تماماً.. كل شي فيها يهدي الأعصاب جمال الطبيعة وزرقة البحر والجو المريح وأهم شي طبيعة الناس المحليين!!!
الناس مريحين جداً وأمينين للغايه!!! يعني بلرغم من إن كنا 3 نسوان لحالنا ما حسينا بلوحشه أو بإن ممكن نتعرض لأي مشكله بسبب الناس الطيبين إلي مستعدين يساعدون بدون ما ينتظرون أي مقابل!!! والأمانه الناس أمينين جداً يعني إذا كنا في البيج ودخلنا البحر نخلي أغراضنا وكيمراتنا وفلوسنا بلشنطه على البيج ولا ندري عنها محد يلمسها ولا ييجي ناحيتها!! بلعون ما صارت في البلدان الثانيه معلقه على كتفنا وبعد مانسلم على الي فيها!! وغير هذا الناس ما يخوفون يعني تبان عليهم البراءة مو عنيفين وحياتهم سهله جداً ومنعكسه على نفسيتهم.. مسالمين جداً حتى الشباب الي أشكالهم تخوف الي شعرهم معجف كأنهم حشاشه الله يعزكم مسالمين ويمشون ويسلمون على الطاير ويبتسمون يسألون إذا عجبتنا الديره وخلاص باي باي!!! يعني مو دبق ومو خطرين.. برالين هذي فيها يمكن 10 آلاف نسمه بس.. هي محميه طبيعيه وتعتبر إرث طبيعي مسئوله عنه الأمم المتحده.. فيها غابه ممتده على كبر الجزيره أسمها وادي البحر أو((Vallee de Mai)) وهي المحمية الي تضم نوع من أشجار النخيل مافي مثلها في العالم والي أسمها كوكو دي مي ((Coco de Mai)) هذي الشجرة ما تغيرت من أيام الديناصورات وفي الغابه هذي أنواع من الطيور النادره منها الببغاء الأسود.. طبعاً رحنا شفنا هذي المحميه وسمعنا صوت الطيور بس ما شفناها لأن ما كان عندنا وقت كفاية نجلس وننتظر الين يتطمنون الطيور ويقربون منا..
بلنسبه للسكن طبعاً من المعلومات المعروفه عن سيشل إنها غاليه خصوصاً السكن والفنادق.. أحنا سكنا في شاليه مكون من غرفتين نوم كبار مع حماماتهم ((حمامين)) بلكونه كبيره ومطبخ كامل فيه فرن وغاز للطبخ وثلاجه كبيره ومواعين وأواني الطبخ كامله سكاكين وملاعق وصحون أحجام وطناجر طبخ ومقالي.. البيت مرتب ونظيف ومريح إلى آخر درجه:8888:.. الحمامات فيها ماي ساخن وبارد مائهم عذب ما شاء الله حتى الصابون ما يطير من الجسم بسهاله!! ويترك البشره ناعمه ونظره حتى كريمات ما تحتاج.. الغرف مكيفه طبعاً وفيها تلفزيونات وكيبل بس ما يطلع قنوات عربيه.. أفتكينا من الأخبار ويمكن هذا الي ساعدنا أكثر على الأسترخاء والروقان.. الشاليه في كمبون مسيج وفي فلتين ثانيين وحده أكبر والثانيه أصغر ساكنين فيها 3 موظفين((الحارس وزوجته وبنتهم الصغيره)) وحارس ثاني.. هذيلين الموظفين ينظفون البيت مره في اليوم يغسلون الملابس ويكوونهم.. الحرمه تطبخ حسب الطلب وطبخها شي تمام.. المطبخ الكريولي مشابه للطبخ الهندي لكنه أخف دهون وأقل بهارات ((على فكره بهاراتهم فرش وريحتها عجيبه في الطبخ مره سويت برياني دجاج طلع عجبه!!!!)) المهم نرجع للبيت.. له حديقه متوسطة الحجم لها بابين واحد على الشارع والثاني على البحر.. المنظر من نطلع من البيت خيالي كأن نمشي في مجله!!! أشجار جوز الهند مرصوصين على كبر الساحل ومعاها شجر لوز وأنواع شجر ثانيه الي تتسلق على السياج.. الشجر أخضر خضره غامقه راويه تلمع.. وييجي بعدها مساحه من الرمل الابيض العاجي.. مافيه حصاه وحده ساعات نمشي في الليل ظلام دامس ولا نلبس في رجلنا شي نمشي حفايا ولا نخاف يجرحنا حجر أو قزازه أو شي صلب اللهم مره كان السراطين ((القباقب)) ساحبين أسماك ميته وماكلينها وبقت العظام.. وبعد صف الخضره والرمل الأبيض ييجي البحر.. الصراحه البحر الي كان جنب بيتنا ماكان لونه بلزرقه والصفاء الي نلاقيه في الأبياج الثانيه مثل آنز لازيو أو سانت جورجيت.. البحر عادي لونه بس هادي ومع الرمل والشجر مسوي منظر اخاذ.. المهم نرجع للحديقه فيها جيكوزي في الهواء الطلق ((ما أستخدمته إلا مره وحده لكن فعلاً شي رايق)) الماي يدلك الجسم وصوت العصافير والنسايم البارده والشجر حوالينك والسما الزرقا!!! شي يغسل الكبد الصراحه.. المهم نرجع للسعر هذا الشاليه بلخدمه الي تكلمت عنها ((الحراسه والتنظيف وغسل الملابس وكويها)) ب 150 يورو الليله + 10% ضرايب يعني ب165 يورو.. بس الطبخ إذا بتطبخ زوجة الحارس بلمواد الي تستخدمها من عندها ((رز وسمك وسلطات وخضار)) تكلف الوجبه ل 3 أشخاص ما يقارب 20 أو 25 يورو.. آنا أحس إن السعر مناسب جداً لأن البيت كان مستوى الصراحه وكل شي فيه أكثر من ممتاز:x1:.. أما الفنادق فما أضن فيها زود على البيوت أو الشاليهات إلا الصيت وتاخذ فلوس كثيره.. لأن فنادقهم عموماً دايمن نظام شاليهات يعني مافي فنادق إلي تيجي طوابق ورخام ولوبي كبير وفخامه.. لا الفنادق دايمن علبساطه البساطه.. فمافي داعي الواحد يخسر كثير إذا يقدر يلاقي شي يعطي نفس المستوى وبسعر أقل..
نيجي للتنقل من الجزيره الأم ماهي الى برالسلين، طبعاً في طيارات نقل صغيره تنقل من مطار ماهي مباشره لمطار براسلين.. أو هوليكبتر.. هذي الوسيلتين ما أعرف أسعارها لأن أخذنا عباره ((أحنا نخاف من الطياير ونتجنبها قدر المستطاع)) العبارة الي خذناها من شركه أسمها كات كوكاس Cat Cocas وهي عباره طابقين تشيل لها تقريباً فوق ال150 راكب بلراحه.. مكيفه وتعرض أفلام أثناء الرحله.. التذكره رايح راجع من والى ماهي ب80 يورو.. هذي للدرجه السياحيه وبعدين عرفت أن فيها درجه أولى ورجال أعمال بس ماعرفت سعرهم.. بس حتى الدرجه السياحيه كانت مستوى الصراحه شي مرتب ومحترم.. ومن البدايه آنا كنت أتصل بوحده سيشليه هي الي حجزت لنا البيت والتذاكر الله يذكرها بلخير إنسانه مريحه وإخدمتني كثير وبدون مقابل!! المهم لما وصلنا المطار جات أستقبلتنا وعطتنا تذاكر العباره وإحنا في المطار جاتنا سياره باص مكيف وسيع عند المطار تابع لشركة العباره يعني من ضمن سعر التذاكر وحملو حقايبنا بنفسهم من المطار الى العباره بدون ما ياخذو فلس واحد زياده ولما وصلنا الى برالين نزلو أغراضنا وشالها سايق التاكسي يعني ما حصلنا مشكله في حمل الأغراض ونقلها.. والرحله كانت هادئه ومريحه وأخذت ساعه تقريباً..
أما التكسيات فيتراوح أسعارها على حسب المشوار يعني في مشوار أبو 10 أو 15 دقيقه ممكن ياخذ 10 أو 15 يورو أما المشوار أبو 20 أو 30 دقيقه ممكن ياخذ 20 يورو أو 25.. أحنا كنا ناخذ التاكسي نفسه تقريباً كل يوم من منطقتنا إلي أسمها جراند آناس إلى بيج آنز لازيو رايح راجع وأوقات نتوقف عند بقاله نشتري أغراض يكلفنا 40 يورو..
المطاعم تختلف أسعارها من واحد إلى الثاني يعني في مطاعم ممكن يكلف الشخص 60 يورو وفي مطاعم يكلف الشخص 17 يورو.. أما إذا جلست تشرب عصير أو شاي مشاريب بس فممكن يكلف الشخص من 5 إلى 7 يورو..
أما إذا الواحد بيطبخ بنفسه فلبيت فأغراض البقاله من ماي وزيت وخضار ((بصل طماط أعشاب عطريه خس وجزر وبصل)) بهارات ((بهار مخلوط وكركم وقرنفل ودارسين وفلفل أسود)) وكيس رز بسمتي أبو كيلو تقريباً ((الرز عندهم من أجود أنواع الرز البسمتي والطبخ فيه ناجح جداً)) مع قطع دجاج مثلج أفخاذ أو صدور أو دجاجه كامله ممكن تكلف هذي المشتريات من 16 إلى 20 يورو حسب الكميه.. آنا كنت آخذ 12 بطل مياه معدنيه وأكياس بهارات صغيره وكيس رز و4 أو 5 قطع دجاج ((صدور)) خسايه وحده كيسين طماط الكيس فيه تقريباً 7 أو 9 طماطات صغيره.. خياره وحده ((خيارهم عملاق عن 6 خيارات!!)) 4 أو 5 جزرات.. 10 أو 12 بصله.. أعشاب عطريه وشوية ثوم وزنجبيل وهذا الي كان يكلفني.. وآنا هناك ما طبخت إلا مرتين فالأغراض كفت ووفت بس إحتجت رز أكثر..
بلنسبة للحوم الحلال إلي كنت خايفه إني ما أحصلها الحمدلله موجوده وبوفره يعني ممكن بقاله مايكون فيها منتج حلال بس البقاله الي جنبها بيكون موجود:8888:.. المنتجات الحلال مكتوب عليها Elles Products يعني منتج حلال.. آنا أستخدمت الدجاج بس ما جربت اللحوم الحمرا.. الدجاج ما شاء الله أحسن حتى من دجاجنا ماله ريحه وينضج بسرعه وطعمه تمام.. حتى مره الطباخه الي عندنا طبخت كاري دجاج وكان لذيذ إلى درجه خليتها تعلمني الطريقه وفعلاً طبختها لنا مره ثانيه قدامي يعني شفتها بحذافيرها ولما رجعت البحرين عملت نفس الطريقه بلضبط بس الدجاج صار له ريحه مو حلوه يعني دجاجهم أحسن..
في مشكله وحده بس هي توافر الخضار يعني أوقات تلاقي جزر أوقات لا أوقات تلاقي باذنجان وأوقات لا يعني الأحسن أن إذا لقيت الخضار المطلوب تاخذ منه كميه إحتياط وتخليها بلبراد.. أما المعلبات فكل الي يخطر في بالكم موجود.. علب التونا والفول والحمص وصلصة الطماط والخل والزيتون والطحين والحليب والبسكوتات الكيك كل المعلبات تقريباً موجوده حتى حليب مكثف نستله لقيت.. لقيت عصير كي دي دي!!
الي مو متوافر هو الزبده والزبادي والأجبان.. هذي تلاقونها في سوبر ماركت جنب المطار هي الي فيها كل شي.. أو خذوها معاكم..
بلنسبه للمنتجات الثانيه من شامبو وصابون وكريمات للبشره وبلسم وحمامات زيت للشعر ومنتجات الحمايه من الشمس وكريمات الحمايه من قرص الحشرات ((البعوض نتفني!!!)) وصابون ملابس ومنعم النسيج وكلوروكس فهي متوافره وفيها كثير منتجات مكتوب عليها بلعربي من المنتجات الي نشوفها بأسواقنا..
بلنسبة للصيدليات موجوده بس الأحسن إن الواحد ياخذ أحتياطه وياخذ معاه ستوك من الأدويه الي ممكن يحتاجها يعني فيتامينات أو أدوية الضغط أو السكر أو مسيلات الدم أو أو يعني ياخذ أدويته معاه وياخذ كميه أحتياط..
الجزيره فيها مستشفى مجهز بلكامل للطوارئ والحالات الي مو كثير خطره.. وإذا كانت الحاله لا قدر الله خطره ممكن نقل المريض للمستشفى الرئيسي في ماهي بلهوليكبتر..
البحر والسباحة في البحر.. طبعاً ذكرت لكم أحلى سواحل براسلين وهم أنس جورجيت وآنز لازيو.. البحر فيهم فيروزي كريستالي نضيف!!!! يعني كأنه مسبح مو بحر!!! والساحلين على جوانبهم صخور جرانيتيه كبيره ممكن يعمل الواحد سنوركلنج عندهم ويشوف الأسماك الوان وأشكل وهو جنب الساحل:11sh:.. طبعاً آنا خوافه وأخاف من أسماك القرش بس طمنوني كثير إن انواع أسماك القرش الي عندهم مو كبيره ومو خطره.. ومع إن سيشل جزيره في المحيط إلا أنهم ما عمرهم سمعو عن هجوم للقرش على أحد من قبل يعني حتى الناس الكبار في السن عمرهم ما سمعو عن إن أحد في سيشل هاجمه سمك قرش!!! حتى حارسنا يقول صار مره وحده بس من 3 سنوات إن شباب أجانب راحو يغوصون مع القرش ولما طلعو من البحر صارو يرمون أسماك على القروش عشان يأكلونهم وواحد من الشباب غبي وحط رجله في الماي والقروش في نوبة الأكل فعض واحد منهم رجله ولما شافها مو سمكه سابها.. يعني غلطة الأخ مو القرش.. هذا الحادث الوحيد في تاريخ سيشل المعاصر.. بس طبعاً إذا الواحد بيروح يغوص في البحر المفتوح بعيد عن الساحل لازم ياخذ إحتياطه ويغوص مع جماعه وإذا جرح أحد منهم شي وطلع دم يطلعون من البحر على طول..
الديره تصلح للناس الي يحبون الهدوء والروقان.. ممكن تصلح شهر عسل بس آنا ما أشجع لأن العروس بتنقلب من الشمس سمرا وبتحترق مثلي ((آنا رجعت سيلانيه)) وغير هذا شعرها بيظل على طول منكوش قدام عريسها بسبب الرطوبه.. الديره تصلح لجماعة كبيره أو عايله مع أولادهم أو مجموعة حريم كبار معاهم بناتهم ووحده تعرف أنجليزي وكل شي يمشي تمام..
في مشكله وحده بس إحنا ما سببت لنا أي ضيق لأن تعلمنا عليها من البدايه ومشينا برنامجنا على أساسها وهي إن في الليل وبعد الساعه 7 مساءً الشوارع والأبياج تصير ظلام ظلام دامس إلا إذا كان القمر طالع.. ظلام وهدوء ممكن يسبب وحشه للناس الخوافين:unsure:.. إحنا ما كنا نخاف وكنا نتمشى على البحر الى الساعه 11 تقريباً وندخل البيت نكمل السهرة في حديقتنا سوالف وضحك:gathering الى 12 أو وحده ننام.. بلليل مافي أي برنامج الناس تنام بدري وبعضهم يقعد يسولف في الظلام قدام بيته مع أصحابه أو جيرانه إلى الساعه 10 ونص 11 الكل في فراشه نايم.. يعني من بعد ال7 الأحسن أن الواحد يكون في البيت يقعد في حديقته أو يعمل مثلنا ويتمشى على البيج القريب من بيته.. إذا كانت المجموعه كبيره ما بيكون في مشكله لأنهم ممكن يتسامرون طول الليل أو يلعبون ورق أو يتمشون على البحر حتى لو ظلام ما بيخافون.. بس إذا مجموعه صغيره لازم يحطون في بالهم إن في الليل بيكون ملل فياخذون معاهم العاب أو دي في دي وأفلام أو لاب توب يكون ما يتمللون.
هذا الي أقدر أفيدكم به وإن شاء الله يعجبكم موضوعي.