بما أنني سعودي اسجل حضوري واعجابي بالنشاط
تقبلي تحياتي

نرجو من الجميع التعاون لكي تعم الفائده للجميع
باكر احنا بعد اذا رجعنا من سفرتنا سنكتب مزاياها ومساؤها لكي يستفيد الجميع

فكره حلوه ومعلومه حلوة
بس انا ماقط رحت ماليزيا ولا بانكوك
وحابة استفيد من موضوعكم
انا اختي نفس فكرتج .. مابي آخذ فندق غالي جدا لأني اصلا من اطلع الصبح ما ادخل الا وقت النوم والراحة
يدوب ادخل اقط اغراض وارجع اطلع >>>> ما فوت احلل سفرتي عدل

لاتنسون تاخذون معاكم مظلات 0 شمسيات ) يقولون الديرة فيها مطر

فكرة جد حلوه بالنسبة لي انا رحت لتايلند لين اللحين تقريبا مرتين بس صدقوني يا جماعة اول مرة رحت فيها كان بتشجيع من المنتدى والله الشاهد اللبلاد ما فيها اي عيب والمرتين رحتها في نفس السنة ونشالله بروحها في الصيف اذا الله راد والصراحة الكل له ظروفه وامكاناته وانا بحكم عملي ما اقدر اخذ اجازه مثل غيري من الاصحاب يعني شهر والا اكثر ، انا يادوب اطلع حق اسبوع اوعشر ايام بس طبعا مب فالسنة كلها لا الاجازة مقسمة .
المهم ما علينا من الكلام هذا بالنسبة لي انا نزلت بفندق اماري بلفارد المبنى اليديد فندق اربع نجوم على قولة وكيل السفريات اللي اتعامل معه ، ما عليه كلام وانا انصح به بشده والصراحة رخيص بالنسبة لغيره من الفنادق وفي بعد امباسدر وهذا بعد ما عليه اي كلام وينفع للي مثلي واهلي مانقعد ابدا فالفندق بس يوم تحجزون اطلبوا الغرفة تكون فالبرج افضل وانظف لنا كعرب وفي بعد لاند مارك هذا غالي وانا الصراحة عجبني بس عند الدفع طلعت عيوني هذا اللي عندي وانشالله الاخوان فالمنتدى ما راح يقصرون وشي ثاني بعد من راي انا البلاد هاي ما تنفع لشهر العسل كليا وهذا وجهة نظري انا لاني ارجح ماليزيا وجزرها لشهر العسل .

اللي يروح بانكوك و يحب دهن العود و البخور لازم يمر شارع البخور بجوار فندق قري Grace هناك عدة محلات
المهم انتبه من الغش
في نفس شارع البخور هناك مسجد فوق مطعم شهرزاد تقام فيه جميع الصلوات بما فيها الجمعه و المطعم اللي تحته أكله حلال
صاحب المطعم اسمه أحمد يبيع بخور و سعره أغلى من السوق شوي بس بخوره البورمي زين
هناك عدة مطاعم في الشارع لكن ما دخلتها قالوا فيها رقص و غيره
بالقرب من فندق قريس فيه فندق اسمه زينيث ما فيه ملهى و لا بنات ليل يعني مناسب
بالقرب من شارع البخور فيه شقة لتيوانيات يبيعون شنط و ساعات مقلدة درجه أولى و بسعر ممتاز جدا
فيه منطقة البات بونق و سوق الليل لكن لا تلف لا يمين و لا يسار و راح تحصل شغلات يدوية رخيصه و وعيات زينه
يمين و يسار ملاهي ليلية و عروض نص كم !!!
مجمع طوكيو راح تحصل فيه الالكترونيات بأسعار زينه
السوق الحره فيها عروض حلوه
المهم ديروا بالكم تضحكون من أحد قاعد يصلي لبوذا و الا يحط له أكل تراهم فاسدين أخلاقيا بس متمسكين ببوذا بشده
الشعب طيب و لم أتعرض لأي مشاكل هناك رغم أن زياراتي البانكوكية كانت أطولها تسعة أيام لحضور مؤتمرات أو عمل لكن المدينة جميله و عمرانيا أما الجو فرطوبه و ريحة ديزل بس رخيصه بشكل كبير ما ينتصدق !!!
في الصيف تحصلون عروض على ماركات عالمية أصليه بأسعار ممتازة مثل الشنط و البدل و غيره
طبعا ماراح تضيع ربعك لأن الشعب طوله قصير فتشوف ربعك اللي طولهم عادي من آخر السوق
برامج الكمبيوبتر و القيمز بأسعار بلاش
هذا اللي في بالي و السلام

نسيت أقول
أنا سكنت في عدة فنادق من أحسنها سنترال بلازا بس بعيد عن الأسواق
و ووتر قيت إذا ما ني واهم و بالعموم فنادق الخمس نجوم هناك رخيصة و مستواها زين
المهم لا تسكنون Grace و هو فندق يملكه عرب و أغلب نزلاءه المترديه و النطيحه و ما أكل السبع لأن فتيات و فتيان الليل يملؤون ردهاته حسب ما حدثنا من سكنه و نصحنا أن لا نسكنه لكن للحقيقه كان فندق غريب من الشارع تشوف البنات واقفين على بوابته بعدد كبير.

اشكرك اخي الاستاذ
فعلا عطيتنا الزبده(لب الموضوع)