بسم الله الرحمن الرحيم
امسي واصبح على رواد منتدى العرب المسافرون الغالين
ببتدي ان شاءالله معاكم في هالتقرير الخفيف والقصير عن رحلتنا لسويسرا ومجاورها
وحبيت اشكر كل من ضاف اي معلومه صغيره كانت او جبيره
واسمحولي اخص بالشكر لاخواني القطري جدولك كان عجيب ومتعوب عليه ومساعدتك لي في الاحداثيه والطريج من ميلان الى زيورخ
اخوي اوشنز الجندي المجهول لما قدم لي من معلومات ونصايح خلف الكواليس
اخواني مقدام وعاشق الخالد اشكركم من القلب على تقاريركم الوافيه واجاباتكم على اسألتي ومساعدتكم لي واخوي qa6ar911
نتوكل على وندش في الموضوع
هالمره المجندات عددهم 3 انا واختي وبنت عمي ورابعتنا نبع الحنان امي
رحلتنا كانت للتمشي بعيده كل البعد عن السوق ومن اختياري كانت للطبيعه فقط لاغير
حجزت الطيران مباشره من بعد عيد الفطر وبعدها باسبوعين حجزت الفنادق
الطيران من موقع اكسبيديا و اول مره احجز منه وكنت خايفه منه لان اللي قريته اغلبهم يمدحون حجز داخلي مو دولي وفي ناس امدحته وبيني وبينكم كان اهو افضل سعر احصله ان كانت حجوزات نت او مكاتب سفر عندنا ...
التذكره كانت بسعر 325 دينار كويتي من تاريخ 1-11 اكتوبر2014
كويت-ابوظبي-جنيف
زيورخ-ابوظبي-كويت
على طيران الاتحاد
الطيران ممتاز من خدمه وترفيه بس حصل اشويه تأخير يعني مو بس الكويتيه اتأخر يا ربعنا اللي يذمونها
حجوزات الفنادق لاربع مناطق بسعر 410 دينار كويتي للشخص
وتأجير سياره من هيرتز لمده 10 ايام بسعر 285 دينار كويتي
يعني كل وحده تدفع 806 د.ك شامل الفندق الطيران السياره
واخيرا وبعد تقريبا 20 سنه رديت لسويسرا واشوفها وانا شباب مو ياهل
يوم المغادره والحمدلله ما حشتنا زحمه الحجاج

وهذي بعض الصور من الطياره

بينت بينت

وصلنا يوم الخميس 2 اكتوبر الساعه 8 ص

خلصنا اجراءات الجمارك ورحبوا فينا وهلا بالكاكاو
اول شي سوينا في مطار جنيف حطينا خطوط وشغلنا النت
وبعدها خذينا الشتل ووصلنا مواقف سيارات التأجير عشان نستلم سيارتنا
وهذي صوره لها من النت للاسف ماصورتها بروحها نسيت

النوع هيونداي i40

وبعدها ركبنا القارمن وكان المفروض نروح انسي بس اشوي المجندات تعبانين ويبون يريحون استسلمت لهم بعد راي الاغلبيه

صور من الطريج الى فندقنا وكان الفندق في مونترو الهاديه اللي لو تقطون ابره تسمعون صوتها

واحنا بالطريج وقفنا ونزلت جمعيه coop اللي وصاني عليها اخوي اوشنز لانها كانت في دربنا شرينا بعض القروضات والخرابيط وبعدها وصلنا بالسلامه فندقنا وهذي صوره من البلكونه

بما اني اول مره اسوق في ديره جبال استانست على الطريج وقلت اشوه الطريج حلو وسهالات عالاقل احسن من بريطانيا اللي يننوني في السرعه والسكان العوي لكن العوي طلع اهون
اسم الفندق رويال بلازا
royal plaza montreux
على البحيره مباشره يطل وغرفنا عالبحيره فندقنا هذا من غير ريوق كان
وهذا موقعه الالكتروني

اللوبي وتحت يكون الريوق على شارع التمشي والبحيره

الغرفه من داخل

البلكونه وصور منها

اهني يتني فكره اني اهاجر بس بحكم القوي اخ بس اخ

عفيه لاتلومني اذا في صور مكرره مو مني من اللي قاعده اشوفه سبحانك ربي عكس الاجلحه والملحه بس هم يازينها من جلحه

مونترو ترا حيل هاديه مو اشويه على قولت البنات يقولون ابرار هذي مو لنا حق كبلز احنا سناقل نبي اماكن صيحه ولويه قلت ماكو كل الاماكن لنا
واحنا نسوي صيحه ولويه

بعض الصور من مونترو

وهذي صوره ليليه من مونترو الرومانسيه
والصوت الجريح كان حاضر معاي بقوه في هالرحله
واسري بليل وانته بيدي سراي
امشي على نورك يجرني شعورك
خطوه ورا خطوه ألوذ في سورك

ماخلصنا يومنا الاول بكمل معاكم باجر ان شاءالله