يعطيج الف الف عافيه على البدايه الحلوه
ومتابعين وياج البدايه القويه
وتقبلي تحياتي

اليوم هو اليوم الاول ... واتعرفون اشلون السفر متعب بالذات اذا كان ترانزيت .. فكان هاليوم مفتوح للتعرف على المنطقه بشكل عام ...
احنا حاليا في بواسوليل .. كنت مقرره نتمشى فيها ... وطبعا الطريق كله نازل وتحتنا نشوف موناكو ... شوفو الصوره ...

واهني المباني والطرقات المنحنئه الضيقه في بواسوليل

وكلها دقيقتين مشي .. الا واحنا في موناكو تخيلو عبرت الحدود الفرنسيه الموناكوويه كلها في دقيقتين

شفنا جدامنا مجمع تجاري ... دخلناه ... وكنا بصراحه ندور مكان ناكل فيه .. المجمع راقي وهادي وفيه كوفي شوبين (2 كوفي شوب)) بس كانت الساعه 5 وهم خلاص توقفو عن تقديم وجبات الطعام .. فرحنا ندور قوت يومنا في مكان ثاني ... قبلها لازم تشوفون صور المول وبعدين تشوفون وين لقينا قوت يومنا

هاي المحل عجبني .. فيه لوحات وتحف و اشياء ثانيه اعجبتني صورة مارلين مونرو وايد وايد حلوه وعليها لماعي بالطبيعه وايد احلى من الصور

بعدها سالت صاحب الكوفي شوب وين اقدر القى مطعم مفتوح ..؟ قالي صعب بهالوقت الاغلب اغلق مطبخه .. بس ممكن تلقين بجانب الكازينو ... عاد انا قلت في قلبي بال شيوديني الكزينو اكيد اخر الدنيا بس قلت يالله نطقها مشيه ونشوف لعل وعسى نلقى مطعم يستقبلنا .. وكملنا تمشي في موناكو

وصلنا لمكان اشبه بالحديقه .. ودخلناه

فعلا طلع حديقه ... وتعرفون حديقة شنو ؟؟؟ انا بقولكم حديقة الكازينو واو يعني وصلنا للهدف باقل من دقيقه

صور للمكان المقابل للكازينو (( الكازينو هو الي شفتوه فوق ورا النوافير))

وهذا الميدان ياحميدان .. الكازينو

وقبل مانقرب للكازينو درنا في المنطقه الي حوله طبعا ندور المطاعم ... وشفنا حوله محلات عديده حلوه وكلها من البراندات المعروفه

وبعدين صراحه ماستحملت الف وادور اكثر وقلت لهم شوفوو جدامنا هالمطعم (( cafe de paris )) امشو ناكل فيه ... وطبعا مرينا جدام الكازينو (( يادي الكازينو ))

اتشوفون الدائرة الي في النص هاي شكل المراه تعكس المنظر المقابل للكازينو بس بالمقلوب حلوه الفكره ومينونه بس ماعرف اش الهدف منها ان الصوره تطلع مقلوبه .. نقدر نعتبرها حركاات

هاي الصوره للشارع بين الحديقه والكازينو ... روعه

ولفينا يسار للكوفي والمطعم ...

آآآآه وصلنا

كنا حابين نقعد في الجلسات الخارجيه بس الويتر قال لنا ان القعدات الخارجيه للكوفي شوب ومافيها اكل اما الداخليه ممكن تطلبون اكل المطعم داخل .. دخلنا المطعم ..
وقعدونا على هالطاوله .. وشوفو الولد الاشقر الي مبين عليه انه خايس ... فشلني شوفوه وبقولكم السالفه

شوفو المنيو بذمتكم مب حلو ويستحق التصوير ..

عاد الولد الخايس الاشقر لين شافني اصور المنيو الا قام يرطن على امه ويضحك ويكلمها بالفرنسي يقول لها يصورون المنيو .... فشلني حسسني اني الفتاه التي لم ترا خيراً والله تفشلت وقلت خلاص مابصور
ولين راحو مادري ليش عناد صورت مكانهم

بالنسبه للمطعم ...اسعاره غاليه نوعا ما .. شفت وجبه ب 260 يورو
وشفت وجبه ب 19 يورو
يعني فيه كدا وفيه كدا .. بس الي كدا (( الغالي )) اكثر ... والمشكله على شينه قوات عينه ... طعم الاكل كلش مب حلو ..
طلعنا من المطعم عقب ماخلصنا اكل ودفعنا شيء وشويات خ صورت لكم الكافيه والدنيا بدت تظلم

وقررنا نرجع للفندق لان حيلنا مهدود

وطبعا سلكنا نفس طريق الروحه ... ودخلنا المول الي قلت لكم عنه فوق

وبعدين ركبنا السلالم الي بعد قلت لكم عنها فوق عشان نوصل لبواسوليل الي فيها فندقنا اللطيف

والحين انا قاعده وشبه نايمه من التعب .. لهالسبب اقولكم اشوفكم بكره على خير ... الحين خلاص تعبت بروح انام ويه

تقرير روعة من بدايتة وحلاه التفاصيل الجميلة
نوم العوافي وبإنتظار التكملة
منتظرين التميز فلا تتأخري علينا

مشكوره اختي وسجليني من المتابعين
وأن شاء الله متكون السلالم متعبة .

الحمدلله على السلامة سجليني متابع

1. شوفو الزحمه

اليوم الثاني قضيناه في نيس ... وهاليوم مميز نوعا ما في نيس والسبب (( كرنفال نيس )) كل سنه في شهر فبراير يقام هالكرنفال وهو بختصار كرنفال مجنون كل الناس يلبسون ملابس مجنونه و الطابع العام يصير كانك في فلم كرتوني اهبل .... اخذنا الباص من موناكو الى نيس (( باص رقم 100 )) وكلفنا يورو واحد فقط لكل شخص .. والمسافه بالباص ساعه تقريبا .. انا كنت حاجزه التذاكر للمهرجان من قطر .. بس المفروض اروح استلمها من مكتب السياحه في نيس ... وصلنا نيس .. بس وين نلقى مكتب السياحه ؟؟؟؟ قمنا ندوره مشي .. طبعا اتبعنا الاشارات في الشوارع وسالنا الناس .. وماقصرو الشرطه بعد .. هاي صور لبعض الاماكن الي مرينا عليها في نيس واحنا ندور مكتب السياح ..
هاي نصب تذكاري للي ماتو في احد المعارك الي صارت في هالمنطقة ..

هاي الشارع الي يودينا الى منطقة الحفل ومكتب السياح

واخيرا قربنا كلش لمكتب السياح وكان دليلي هالدولاب الكبير ... كنت حاطته نيشان انطلق منه لاي مكان اروحه مثل محطة القطار - مكتب السياح - الشاطئ - الخ

وهاي جزء من المنطقة الي فيها الالعاب ..

وصلنا للمدرجات .. وشكل ماتشوفون فاضيه لين الحين باقي على الحفل 3 ساعات تقريبا

وصلنا لمكتب السياح ...

كان المكان مزحوم شوي الكل جاي ياخذ تذاكر .. والموضفين كانو لابسين لبس مجنون حلو وملونين روحهم بطريقه جميله ...

خذنا التذاكر والخريطه ..

وقلنا نتمشى في شوارع نيس لين يحين وقتل الحفل

باقي على بدء الكرنفال ربع ساعه قلنا نروح نقعد في اماكنا .. ودخلنا للمدرجات

شوفو الزحمه

اغلب الناس كانو لابسين ملابس هبله والبنات الصغار اغلبهم لابسين ملابس اميرات .. وتشوفون الناس الي يرش على الثاني الرش الي يطلع خيوط ملونه والي يرقص والي يصفق وطبعا الموسيقى شغاله والمعلق يتكلم ويسولف ويقول بعد شوي سيبدا الكرنفال وسيبدا المرح ومادري شنو ...

شوفو الاميرات الصغار

زاد التصفيق والزحمه زادت

وبدأ الكرنفال .. وهاي صور انقلها لكم من الكرنفال ..

واخيرا الضفدع رمز المهرجا ن ..

ان شاء الله ماتمللتو من كثرة الصور ... خلاص نترك المهرجان والعجئه والزحمه ونروح نرتاح على شاطئ نيس بعد ماخلص المهرجان

وفي الليل .. قررنا بعد ماتعشينا ان نركب الدولاب الكبير عشان نشوف نيس من فوق بالليل ..

وبعدها رحنا لمحطة الباصات الا نشف باص رقم 100 الي بيرجعنا لموناكو واقف ناطر ركبنا فيه .. وللاسف فوتنا محطتنا و نزلنا في مكان بعيد يبعد عن فندقنا يمكن نص ساعه ... ورجعنا مشي ... انهههد حيلنا هاليوم صح .. رجعت ونمت على طول ...
اشوفكم في اليوم الثالث ... ان شا ءالله

مشكوؤه اختي
وناسة المهرجان
متابعين .

فنانة فنانة فنانة
صراحة هالحلقة ترد الروح

ما شاء الله عليج اختي مبدعه و تصوير ممتاز و مو مخليه شئ .... حتى المنيو