السلام عليكم ,
كل عام وأنتم بخير واسأله تعالى أن يتقبل منا ومنكم الصيام والقيام وصالح الأعمال آآآآمين
إخواني وأحبابي رواد البوابة التركية , حبيت أطرح هذا الموضوع من باب الترفيه ولكسر روتين
المواضيع الخاصة بالتقارير والأستفسارات والنصائح والمعلومات .
الموضوع بإختصار يتعلق بتجربة شخصية مررت بها أخي القاريء الكريم في تركيا سواء محرجه
أو مضحكه أو موقف غريب صادفك ولم تجد له تفسير ...
القصد طبعا كما ذكرنا من باب التسليه وإدخال السرور على قلوب القراء وتغيير نمط الطرح ,,,
وطبعا سأبدأ أنا بطرح موقف محرج ( او مضحك ) سموه ما شئتم مررنا به أنا وزوجتي العام
الماضي ( صيف 2010)
كنا في اسطنبول وبعد جولات في اسواقها قررنا أن نأخذ قسطا من الراحة في أحد المقاهي الراقية
وكان شكله يغري بأن مستواه ممتاز ( على الطراز الفرنسي العتيق ) على الشارع العام وبالقرب
من مول كانيون , وكان المقهى شكله مميز وديكوراته فخمه جدا لاحظته وأن رايح للمجمع واتفقنا
انا والمدام إذا خلصنا من السوق نتقهوى فيه أضن اسمه لوفر كوفي او شي من هالقبيل , المهم بالفعل
دخلنا المقهى وكانت جدرانه من الحجر البركاني الفخم وارضياته خشبيه والألوان جميله , وتوجهنا
الى إحدى الطاولات وجلست أنا وأخذت إحدى المجلات الموجوده وجلست اتصفح , سألتني زوجتي :
وش اطلب لك حلا مع القهوه ؟ قلت لا بس أنا ابي قهوه تركي سكر وسط وما ابي حلا قالت هي
أجل انا بروح اختار من بترينة الحلا وراحت وطلبت لها كبتشينو وحلا وطلبت انا قهوه تركي ,
وفعلا بعد 5 دقايق جابو الطلب وانا قاعد اتصفح المجله والمكان رايق وفخم والكراسي مريحه ....الخ ’
شوي الا الحرمه بعد ما أكلت قطعه صغيره من الحلا حقهم , تقول لي كيكتهم مخوره !! قلت وشو ؟
قالت مخوره !! ( مخوره لمن لا يعرف اللهجه النجديه تعني فاسده وبها رائحه كريهه )
قلت انا مستحيل !! كوفي بها الفخامه وهالديكور يكون فيه اكل خربان ,, قالت ذوق شف بنفسك ..
صراحه اخذت الصحن وقربته عند أنفي وبالفعل بدون ما اذوق به رائحه تشبه رائحة العفن !!
أخذت انا الصحن وتوجهت الى القرسون الي كان واقف ورى بترينة الكيك وقلت له هذي الكيكه
منين جبتها ؟ قال ليش ؟ في شي قلت بها رائحة عفن ... قال لا هذي رائحة ( الواين ) الخمر !!!
قلت وجع !! معطين الحرمه كيكه بالخمر !! نعنبو شيطانك ما تشوف عبايتها ونقابها أسود في أسود !!
يعني ما تعرف أن الخمر حرام عند المسلمين ؟؟ أنت وش جنسيتك ؟ قال تركي قلت مسلم ؟ قال إيه
مسلم , وأخذت أعاتبه فقال لي أنها هي التي طلبتها بنفسها بعد أن جلست 10 دقايق تتفحص كل
الأنواع , وطبعا مكتوب عليها تشيز شيكليت ويذ واين , يعني مكتوب عليها ان فيها واين ..
قلت وهي وش يدريها وشو ذا الواين , المفروض أنت تعلمها , وطبعا طلبت مدير المحل وبالفعل
جاء واحد شيبه شوي وبعدما عرف السالفه عتب على الموظف وأعتذر بشده وجاب لنا نفس الطلب
( بدون واين ) ولما جينا نحاسب لقينا ختم على الفاتوره free يعني طلعت قهوتنا وكيكنا وجلستنا بلاش !!
وطبعا أنا هذاك اليوم مسكتها على الحرمه , كل شوي : هاه صاحيه والا أطلب لك ليمون ههه ,
وكانت تقول لي اعوذ بالله مسكتها علي مع اني لفضتها وما دخلتها في جوفي بس عرفت انها خربانه .
عموما أتمنى من الجميع المشاركة بالمواقف الطريفه التي مرت بكم لإدخال السرور على قلوب اخوانكم ,
كما أتمنى أن تكون المشاركه مختصره حتى نستطيع قراءة جميع المشاركات ,
ومره ثانيه
كل عام والجميع بخير