مساكم ورد
السنه اللي طافت كنت ساكن في هيلتون بدنقتون والفندق ماعليه كلام ابد وكان السعر ممتاز جداً 940 ريال لليله
غرفه دبل المهم ماعليك من هذا كله السفره كانت قصيره لمده سبوع وكان معي اخوي وبعده بيروح ل اريزونا
دخلت اخذ شور بعد يوم طويل من المشي بشوارع لندن الجميله وكانت الساعه تقريباً 8 ليلاً وبعدها راح نطلع نتعشى دخلت وشغلت الماء الحار وعجبني الوضع وتنقعت المهم بعد ربع ساعه اخوي يطق على الباب ويقول اطلع بسرعه الغرفه احترقت ونا اقوله شتقول لاني ماسمع من صوت الماي اللي عندي عاد علي الكلام مره ثانيه الغرفه احترقت شي بنزل من السقف حار ودخان قلتله طيب طفها علبالي انه يمزح ولا يسوي فيني مقلب المهم الرجال معزم ويقعد يحلف انه حريق والله وتعوذ من ابليس واللف الفوطه وفتح الباب الا السالفه صحيح دخان ماتشوف شي وماي حار يخر من السقف والحل شلون اطلع لازم امر تحت الماي الحار والله وبحركه جكشانيه الا انا برا الغرفه والظهر انصلخ من الماي الحار عاد ياحلاتي برا الغرفه في الممر من غير هدوم بس بفوطه المهم كلمنا الموظفين وبلغانهم عن الموضوع وكان تعاملهم سيئ جداً جانا المدير هندي شايف روحه يقول قصرو صوتكم لاتسوون ازعاج طبعاً يكلم اخوي لانه اخوي هو اللي خش بعينه اول ماجاء المهم يوم شفته مصخها وطب فيه قلته هذا الهلتون كذا التعامل اجل الفنادق ابو نجمتين شلون قلتله لازم تعوظنا اللحيين وبسرعه ونا ماراح اقعد كذا بالممر كني طرار يوم شاف العين الحمره قال خلاص راح اعطيكم سويت والعشاء علينا
والملابس اللي تدمرت راح نعوظكم عنها بس انت اكتب سعرها واذا تبي تروح المستشفى عاد حنا طيبين قلت مايحتاج خلاص بس انت جي بالعشاء سي فود وكل شي يصير تمام
طبعاً كان باقي على السفره يومين وسوا ابق قريد للغرفه على السويت