تحيه طيبه للجميع ..
لقد اسلفت في موضوعي السابق عن نيتي السفر لباريس .. وها انا وصلت من يومين ولكن مع الاسف
حدثت مواقف اقتربت جدا من ( جعل رحلتي متعبه جدا جدا ) وارجو ان لا تتكرر
الموقف الاول ..
عند استئجاري للسياره وهي من نوع فورد .. محرك ديزل .. لما اخذت السياره كانت رائحه الديزل داخل السياره قويه جدا ولكن قلت هذه سيارتهم عاد وهم احرار فتحت الشبابيك وعطرت السياره وخفت الى
ان اختفت تقريبا رائحه الديزل ولكن كل ما وقفت السياره في مكان ارجع والله اني اشم رائحه الديزل عن
بعد ففكرت في استبدال السياره .. ولكن بعد ما ازور ديزني لاند اللي رحتلها اليوم
الموقف الثاني
لما وصلت للفندق الشخص اللي يقف عند البوابه قالي الباركينج من هنا تحت وبس .. انا نزلت تحت الى ان
وصلت الى بوابه لاحظت انها فتحت من قبل ما اوصل بمسافه ولاحظوا انا في نزله يعني زاويه مقدارها حوالي 45 درجه تفاجئت ان البوابه انفتحت وعند سياره تستعد للطلوع وانا امامها بالضبط ..!!
المراه اللي تسوق السياره انفجعت وصارت تاشرلي يعني No Way وكان من جد موقف ماله داعي
وحقدت على الرجال اللي واقف لانه قالي تحت وبس .. طبعا سيارتي ديزل يعني عزم مافي وانا مضطر
ارجع حوالي متر 200 بالريوس النزله صارت طلعه والعجوز اللي كانت قدامي مباشره الظاهر انها مستعجله
وصارت تضرب بواري وتكبس بالانوار وكاني جالس اتمشى المهم بعد جهد جهيد قدرت اطلع السياره الى ان وصلنا الى الى ارض مستويه داخل الباركينج وقالتلي العجوز مواقفكم من هنا باب اضغط على الزر علشان ينفتح البابمع العلم انه ما في اي نوع من انواع التنبيه او الاشاره او سهم يقولك من هنا او اسم فندق
وجاي في زاويه صدقوني مستحيل اللي يسكن الفندق للمره الاولى يعرفها والحمدلله
الموقف الثالث
طبعا انا معاي Gps اللي شريته من اسبوع تقريبا وشحنته بالكامل قبل سفري وصلنا ديزني لاند ولعبنا
الاولاد ولعبنا احنا طبعا وقررنا انا نرجع للفندق لاننا فعليا ما ارتحنا ..
رجعت للسياره وشغلتها واللي استغربتله فعلا ان ريحه الديزل صارت اقوى من الاول .. فقررت الذهاب
للمطار مباشره لاستبدال السياره .. الصدمه ان Gps انتهب بطاريته انا قلت عادي وكنت
اصلا من اول يوم حطيت الشاحن في درج السياره ..!!
المهم طلعت الشاحن وشبكته في الولاعه ولا حظت ان اللمبه ما اشتغلت .. !! حاولت مره واثنين وثلاث
ومافيش فايده حطيت الولاعه علشان اتأكد ان المشكله من الشاحن او الولاعه نفسها ولقيت ان الولاعه
برضه ما اشتغلت حاولت مع ال Gps ولكن البطاريه كانت فارغه تماما ..!!
انا واقف في مواقف ديزني ومني عارف ايش اسوي وانا على علم اصلا ان المطار جنب البارك فقررت اني
اجازف واطلع المطار باتباع اللوحات وكانت بصراحه واضحه وسهله الى ان وصلت المطار
تصوروا جلست اكثر من ساعه ونصف من تيرمنل الى تيرمنل من D الى G الى F واخيرا وصلت لموقف
السيارت الخاص بمكاتب التاجير تيرمنل F وكان في شباب من المغرب العربي وقلتلهم على الموضوع
والحين صار عندي سببين الاول رائحه الديزل واللي حاولوا يقنعوني اني امر طبيعي .. والسبب الثاني
مشكله الشاحن واللي يعتبر بالنسبه لي السبب الرئيسي ...
واخيرا بدلوا السياره اخذت اولادي اللي كانوا نايمين من التعب والارهاق واللف في السياره واخذتهم الى
المقعد الخلفي وانا اربط الاحزمه كانت في ريحه ( بويه ) اللي هو دهان الجدران وكانت قويه جدا طلعت
ال Gps من الشنطه وركبت قدام علشان اجرب الولاعه وكانت من جد صدمه دواسه البنزين والفرامل وارضيه المقعد الامامي
مليانه بويه وبشكل غير طبيعي ( قلت وش ذا الشركه الخايسه ) روائح اشكال والوان طلعت الاولاد ورجعت
للمكتب وقلت ابغى سياره ثانيه قالتلي الموظفه ليش قلتلها لان سيارتكم وصخه قالتلي الحين ارسل واحد
ينظفها بس انا كنت متأكد ان ريحه البويه ما راح تروح بسهوله .. فقلت ابغى سياره ثانيه .. وكنت لاحظت
ان السياره اللي جنبي بنفس الحجم تقريبا وسئلت الموظف الموجود عند المواقف قالي ممكن تاخذها
وكانت ديزل رحت ونوهت عن هذا الموضوع للموظفه ولكنها رفضت وقالتلي اخر سياره عند هي بيجو بس
بنزين وهذه اخر سياره .. طبعا في المطار في 20 شركه تأجير وانقهرت من اسلوب الموظفه وكأني انا
الغلطان فقلت لها خلاص الغي العقد وخذوا حساب يوم واحد هي حبت تسوي انها بارده وقالتلي اوكي
وبدأت تضرب على الكيبورد وكان في موظف كبير في السن شوي سمع حوارنا وجاني وكلمني بكل احترام
وقالي احنا اسفين على الغلط وما نبيك تاخذ فكره سيئه عن Sixt وبعض الاحيان تحصل مثل هذه المشاكل
قلتله طيب والسياره الاسكودا اللي واقفه جنب سيارتي ليش ما اخذها قالي لانها غير جاهزه ويبيلها تنظيف
وما نبغى نقع في نفس الخطأ معاك .. المهم اخذت البيجو اللي كانت ما شيه 44 كيلو بس .. وهي بحق
سياره ممتعه واول ما اخذتها تأكدت ان الشاحن شغال وتوكلنا على الله وعدى اليوم والمزاج متعكر
الحمد لله على كل حال احنا محتاجين النفسيه تستقر شوي وبس
تحياتي