في البداية أحب أقول ( مو كلهم ) .. في اسطنبول ينقسمون .. ناس نصابين .. وناس أمناء وأخلاقهم رائعة .
في بورصة وطرابزون .. مايعرفون شي اسمه غش ..ولا تلاعب .. وهذا اللي صار معانا .. لأننا ركبنا تكاسي اكثر في بورصة .. ولا شفنا نصب أبداً .
بينما في اسطنبول كنا نعتمد على المترو والترام .. والمرات القليلة اللي ركبنا فيها تكسي .. كان البعض ينصب علينا .
في بورصة .. كان السائق يقول بالعداد .. عندما اردنا أن نذهب من وسط المدينة إلى غوزيل ياله .. ( ميناء بورصة اللي تنطلق منه العبارات الى اسطنبول ) .. طبعا المسافة طويلة عشان نوصل للميناء 45 دقيقة .. التاكسي قال لنا بالعداد .. قلنا لا .. كم السعر بدون عداد .. قال 50 ليرة .. حاولنا اقل .. مارضي .. آخرتها قال اركبوا واذا العداد طلع اكثر من خمسين عطوني خمسين بس .. وفعلا وصلنا وكان العداد 54 ليرة .. واعطيناه 50 ليرة
في اسطنبول كنا في تقسيم ومتجهين لبايزيت ..وكنا عائلة كبيرة ولازم 2 تاكسي .. وقفنا الاول وركب نصنا .. قال بالعداد ورفض يحسب بالليرة قلنا طيب .. ورحنا ..
القسم الثاني من العائلة جلسوا ينتظرون تاكسي ثاني ... جا التاكسي وقالوا له بدون عداد .. قال طيب .. 10 ليرة وركبوا معاه ..
الخلاصة انهم وصلوا قبلنا وحاسبوا الرجال وجلسوا ينتظرون .. مع ان القسم الاول سبقناكم ومشينا قبلهم .. وكل شوي يتصلون وينكم تأخرتوا .. وهذا يلف فينا وهذا طريق مسدود وهذا تحويلة .. آخرتها وصلنا والحساب حق العداد 24 ليرة تقريبا
يعني فرق 14 ليرة عنهم .. الله لايوفق راعي التاكسي النصاب وكان شيبة وكبير في السن بس مايخاف الله
الموقف الثاني يوم رحنا من بايزيت إلى ياني كابي .. ومعروف ان المسافة قريبة .. وصلنا راعي التاكسي وكان مطوع ب 10 ليرة .. ويوم رجعنا من بورصة ( من ياني كابي الى بايزيت ) يعني بالعكس .. كنا عارفين التسعيرة خلاص ( 10 ليرة ) مافي غيرها .. كانوا السواقين واقفين قدام الميناء بينصبون على الناس .. قال لنا 25 ليرة قلنا 10 .. قال لا .. قلنا 15 .. قال 25 ليرة .. قلنا يفتح الله .. روح شوف غيرنا .. وهذا واقف عندنا وفاتح شنطة السيارة عشان نحط العفش ويصارخ علينا وقال 20 ومااوصلكم الفندق .. بس عند الدوار .. قلنا لا .. احنا جينا من الفندق لهنا بعشرة .. وانت بتوصلنا بعز الظهر للدوار مش الفندق يعني بنمشي مع شنطنا لين الفندق على رجولنا وبتاخذ 20 ليرة !! .. خلاص مانبغى .. وهذا لزقة .. مشينا وتركناه .. آخرتها قام يضرب شنطة السيارة ويقول عرب كلو تمينصاتثيامناي .. طبعا مافهنا شي بس عرفنا انه يشتمنا .. ومشينا شوي لقينا تكسي وصلنا بعشرة ليرات .
هذه بعض المواقف ذكرتها للفائدة .