1. و مسافة 5 دقايق بالسيارة من المنتجع في مول كبير اسمه Val d'Europe


2. المول روعة واايد حلو و شرح و كله عرب ما شاء الله ..

السلام عليكم
شخباركم اخواني و خواتي ؟
انا " غلا الإمارات " صاحبة هالتقرير بس كتبته في منتدى ثاني ب اسم آخر
و قلت بنقله لكم عشان تستفيدون و مابي منكم غير دعوه طيبة في ظهر الغيب
و السموحة منكم اذا اللهجة صعبه شوي عليكم لأني كتبته بلهجتنا الاماراتية العامية .. انا اسفة اعذروني
بسم الله الرحمن الرحيم
وايد عوايل يوم يسافرون باريس يبحثون عن سكن اقتصادي و مريح
عشان جيه قلت بسويلكم تقرير بالصور عن منتجع Citea Marne La Vallée
انا سكنت فيه صيف 2008 قبل سنتين و ارتحنا وايد و استانسنا الحمدلله ^.^
قبل ما تشوفون الصور بخبركم معلومات عامة عن المنتجع و الايجابيات و السلبيات ..
المنتجع من سلسلة فنادق و منتجعات Citea الفرنسية
و هي سلسلة اقتصاادية معروفة في فرنسا و عندهم وايد شقق و منتجعات من فئة 3 نجوم ..
المنتجع اللي حجزنا فيه اسمه Citea Marne La Vallée
هذا الويب سايت مالهم على النت :
http://www.citea.com/hotel/fr/Apparthotel/15/17/Description/Citea-Magny-Le-Hongre.html
هو يتكون من وحدات سكنية منفصلة مثل الشاليهات او الفلل الصغيرة
و عندهم فلل بغرفتين نوم و 3 غرف و 4 غرف نوم ..
نحن حجزنا فيلا ب 3 غرف نوم و صالة و مطبخ و حمامين الله يعزكم على 142 يورو الليلة .. يعني تقريباً 750 درهم
مكان المنتجع في قرية Magny Le Hongre و هي قرية هادية و جميلة من ضواحي باريس
يبعد عن وسط باريس 42 كيلو .. يعني تقريباً 35 دقيقة بالسيارة و 25 دقيقة بالمترو
و قريب واايد من ديزني لاند تقريباً 10 دقايق بالسيارة

و مسافة 5 دقايق بالسيارة من المنتجع في مول كبير اسمه Val d'Europe

المول روعة واايد حلو و شرح و كله عرب ما شاء الله ..

و فيه محلات اسعارها ممتازة ارخص عن باريس و فيه بعد سوبرماركت كبيير شرات كارفور و مطاعم متنوعة شرات ماكدونالدز و فيه بعد اكواريوم Sea Life Paris و قرية الماركات المخفضة (اوت ليت) La Vallée Village و محطة قطارات (مترو)
للأسف انا ما صورت المول ولا الاوت ليت بس يبتلكم صور من النت عشان تاخذون فكرة :
مثل ما تلاحظون في الصورة قرية الاوت ليت وايد زحمة و محلات الماركات طوابير عليها
لازم توقفين بالدور عشان تدخلين المحل و تخلصين و يدخلون اللي بعدج !!
و الحين بخبركم عن ايجابيات و سلبيات المنتجع للأماانة
في البداية الايجابيات :
1- حلو للعوايل الكبيرة و الأسعار رخييصة جداً بالمقارنة مع اسعار الشقق و الفنادق في باريس
2- المنطقة هادية و ريفية و المنتجع شرح و يفتح النفس و الاجواء وايد حلوة بعيد عن الزحمة و الازعاج
3- واايد قريب من ديزني لاند باريس
4- قريب جداً من مول فال دي يوروب و قرية الماركات لا فيلا فيلج
اما السلبيات :
1- الشقق متواضعة و عادية يعني ما ينفع حق اللي يدورون على الفخامة بس اهم شي النظافة
2- بعيد عن مركز المدينة (سنتر باريس) و الاماكن السياحية شرات الشانز و برج ايفل .. بس المواصلات متوفره بالمترو من محطة فال دي يورب لين الشانز 25 دقيقة
3- الحمامات الله يعزكم مسوين حمام واحد فيه شاور و مغسلة و غسالة ملابس بدون مرحاض و الحمام الثاني الصغير بس مرحاض بدون مغسلة ! و هالشي يضايقنا نحن ك عرب و مسلمين لان نحتاج ماي للغسول .. بس حلينا هالمشكلة كنا ماخذين اكثر عن بالدي (جيكات) و نترسهم ماي و نخليهم في الحمام الصغير .
و الحين براويكم صور المنتجع من تصويري ^.^
هنيه اول ما وصلنا المنتجع في الباركنات
لا تضحكون مب سيارتنا لول
كنا هلكانين لان قطعنا630 كيلو بالسيارة من سويسرا لين باريس !
هذا الاستقبال البسيط مالهم
يلسنا نرتاح لين ما يخلصون اجراءات الشيك ان
صالة الفطور (الريوق) .. و ما بقول مطعم لأنه ما يرقى لمستوى المطاعم لول
بعدين استلمنا المفاتيح و سرنا صوب بيتنا اللي كان رقم
بسم الله ادخلوا باليمين خ
هذي الصالة مساحتها حلوة و واسعة بس اثاثها متواضع مثل ما ذكرت قبل
و الحين يالله بنسير نشوف غرف النوم فوق في الطابق الثاني
بسم الله وصلنا فوق ^^
مثل ما تشوفون غرفتين نوم عند بعض و غرفة ثالثة على اليمين و الحمام على اليسار
غرفة النوم الاولى .. تمشّي الحال حق الرقاد زينه خ
غرفة النوم الثانية
تصحّر ماشي اثاث بس سرير و كبت ههه
غرفة النوم الثالثة
الحمام الكبير اللي بدون مرحاض الله يعزكم !
و الحين براويكم المطبخ ..
حلو و مرتب و فيه الاغراض الاساسية بس ناقصتنه شوية مواعين و
جدور لول
و فيه باب خارجي يطلّع على الحديقة و حاطين يلسه خارجية ما صورتها
الباب الخارجي واضح على يسار الصورة
و هذا الحمام الصغير اللي بس فيه مرحاض الله يعزكم !
الحين بنطلع نتمشى في المنتجع
هذا الباب يطلعنا على حديقة حلوة
فيها مساحات خضرا بس مب مستغلينها صح
اقترحنا عليهم يحطون فيها العاب حق اليهال
عشان عيال العرب يلعبون و يستانسون برع ههه
و قالولنا بندرس اقتراحكم لأن فعلاً مب مستفيدين منها بس مادري من يومها ما رجعنا مره ثانية
اللي بتسير تخبرني اذا حاطين العاب ولا يقصون علينا
هذا الاستقبال اللي سوينا الشيك ان فيه اول ما وصلنا =)
:
:
في النهاية اتمنى انكم تستفيدون من التقرير البسيط
و دعواتكم لي بالتوفيق في دراستي و حياتي ^.^
الله يحفظكم