أكتشف العالم بين يديك
المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة.
artravelers.com ..
السلام وعليكم
اخوي ان ان شاء الله بسافر بشهر يناير الى افريقيا بالباخره من مصر ...يمكن مدغشقر او جزر المحيط الهندي بغيت اعرف شنو تنصحني فيه ( اي دولة ؟) ومع ذكر الاسباب وكم تكلفة الرحلة بالباخره وجزالك الله خير...
بسم الله الرحمن الرحيم باحاول اعطيكم المعلومات اللي اقدر عليها بإذن الله اخوي سالم بالنسبة للباخرة لا اعلم عنها لكن بالنسبة ليناير فهو شهر حر عندهم وبرد عندنا لانهم جنوب خط الاستواء. الاخ دواس علف جنوب افريقيا حلوه للعوائل لكنها اوروبيه بمعنى الكلمة يعني في المولات تلقاهم لابسين لبسهم مثل اللي في اللي نشوفه في بريطانيا وامريكا. بالنسبة للفنادق او المنتجعات ما جربت منتجعات جربت فنادق مثل مايكل انجلو ما انصح السكن فيه والانتر كونتيننتال في جوهانز برغ عملتهم اسمها راند = 60 هلله اذا رحت هنا لا تصرف من البنوك اسال السواق عن اماكن صرف يعني سوق سوداء احسن لك بالنسبة للاكل ما تضايقت منه لانه فيه اماكن حلال هناك وخاصة مطعم اسمه سبرspur فيه بعض فروعه حلال وبعضها مخلط . كنت اتوقع اني لما اروح هناك باعاني من الاكل لكن العكس عانيت من الحمامات اكرمكم الله لانه مافيها رشاشات مويه يعني لازم تشيل معك قارورة مويه لمثل هذي الامور .
اما بالنسبة لسفرتي فكانت شهر عسل ممتع مره
رحلتنا كانت من الرياض على الاماراتيه لدبي ثم جوهانزبرغ الرحلة تستغرق سبع ساعات واربعين دقيقه تقريبا خدمة الاماراتيه حلوه خاصة المضيفين العرب اول ما يعرفون انك عربي يخدمونك خدمه حلوه مره المشكلة الكحول اللي يقدمونها. بس في خط الرجعه جبت معي اثاث وكسروها لي فنصيحه اللي يبي ياخذ معه تحف من هناك يشحنها بالسفينة ارخص له لانهم ياخذون على الكيلو 150 ريال او انه يلفها في كرتون ويحط سفنج. جنوب افريقيا تحتاج فيزا من سفارتهم ما اخذت يوم واحد تجيب تعريف من العمل بالراتب والسكن والتذكرة والجوزات وتعبي الفورم وبعد ساعتين تستلمها تقريبا موقعهم على طريق الملك خالد في المعذر. بعد ما وصلنا اول يوم مع ان الرحلة كانت متعبه الا انه طبيعة جوهانزبرغ واللي هي تعتبر اكثر مدينة في العالم تحتوي على الاشجار. كانت رحلتي في نهاية يناير وهو يوافق عندنا برد لكن عندهم يعتبر حر لانهم في الجزء الجنوبي من الكرة الأرضية. اهم شئ اللي بياخذ بكج لايخذه من الاماراتيه لانهم غالين مره احسن له يروح هناك ويضبط البكج اللي على كيفه انا يوم طلبت منهم بكج كنسلته ورحت هناك وطلبت نفس البكج طلع علي بأقل من النص بس اخذ التذاكر من عندهم للشخص الواحد اربعة الاف ريال على الاماراتيه.
جنوب افريقيا خاليه من الملاريا الا الجزء الشمالي فمايحتاج انك تطعم .
جهزت حجزي اول يومين من هنا على مايكل انجلو فخم الفندق لكن الخدمه الله بالخير ضيعوا ملابس زوجتي او بالاصح صرقوها بس طلعتها من عيونهم. بس ميزة الفندق اللي خذت عقلي وينسى الواحد الخدمة المنضر اللي يطلع عليه فهو يطل على ميدان نيلسون مانديلا فيه النصب حقه يسمونه نيلسون مانديلا سكوير وهو عليه كافيات ومطاعم ومرتبط بالسوق فما يحتاج انك تنزل لشارع . فيه نقطه ابغى اوضحها اللي هي الامان انا ماشفت شئ يدعو للخوف هناك كل اللي سمعته دعايات توكلت على الله ورحت ولا شفت شئ . بعد ما رحت هناك كنت مضبط مع واحد اعرفه انه يوصلني لناس يعرفهم حقين سفر وسياحة قلت له اول شئ ابغى اطلع من الفندق وحجزوا لي في الانتركونتننتال يعني اللي يبي يروح لجوهانز برغ يروح له ولا يفكر في غيره مافيه فنادق راقيه كثيرة. طلعنا في جهانز برغ لاشياء حلوه بالنسبة للتسوق عندك هنا اقصد في السعوديه اشياء احسن اما بالنسبة للتحف والاثريات فهي احسن شئ هناك واللي شريت منها اشياء كثيرة فيه سوق شعبي اسمه ذا زوون the zoon هذا فيه التحف الافريقية لايفوتك تراهم غالين كاسرهم لين تشوف عيونه بتطلع لانهم هناك يكاسرون لين تقتنع بالسعر الفندق اللي سكنت فيه تحته احسن مول عندهم اللي هو سانتون مول . فيه مول ثاني داخله كازينو ميزته انه ما يقفل الا متاخر يعني الساعه 11 ليلا ولا باقي المحلات من الساعة 5 وهي مقفله الاماكن المهه في جوهانز برغ هي قريه اثريه اسمها ليسيدي فيه عروض افريقيه حلوه مره ما تتفوت لايون بارك حديقة الاسود احسن شئ زرته في جهانزبرغ فيها جميع الاسود وتقرب منها بالسيارة مايبعدك عنها مسافة متر او مترين وسط المدينة اللي يحذرون منه كثير فيه برج كبيرة يطل على جوهانز برغ كلها لكن لايحضرني اسمه بعد ما قعدت في جهانز برغ كم يوم رحت ل sun city وهو متجع جدا رائع فيه كل شئ وهو بعيد شوي عن جهانز برغ بالسيارة ساعة ونصف بس تروح بسرعه لانه المناضر حلوه وتشوف مناجم الذهب وباليتين على طريقك. فيها حديقة التماسيح وبحيرة وفيها سفاري حلوه واحسن شئ في جنوب افريقيا السفاري قعدنا يومين فيها بعدين رحنا لاحسن مكان رحت له في العالم اللي هو داخل السفاري ساكنين فوق شجرة اسمه جاكيز لودج صح كان حر شوي لكن اللي فيه نسانا فيه مسبح وتتشمس فيه وتطلع سفاري ، واحنا ندور الحيوانات مرينا على اسود ما يفصل بينا وبينهم الا متر والسيارة كانت مفتوحه لكن الاسود متعوده على الشئ هذا جلسنا يوم كان ممتع لاتطول يوم او يومين بس رجعنا لجهانز برغ على المطار سافرنا لكيب تاون عن طريق خطوط اسمها كولولا دوت كوم ارخص من الخطوط الجنوب افريقيه بالنص لان نضامهم مثل العربية المسافة بينهم تقريبا ساعتين لانها في اقصى الجنوب في كيب تاون الجو متقلب يعني اربع فصول في اليوم بمعنى الكلمة حر وبر ومطر وشمس وغيوم وصحو كل شئ فيه رحنا للبوتانيكل قاردنز بس الوقت اللي رحنا فيها كان حر فما ضهرت كل الورود اخذنا لفه كبيرة على كيب تاون استغرت ست ساعات ممتعه مره ولا هي متعبه وطرقهم حلوه صح رايح جاي لكن امنه وسياقتهم حليوه السواق يعرفنا على كل شئ اخذنا يخت وشاهدنا الفقمات وحطام سفينة ثم كملنا الرحلة بالسيارة مرورا بمزارع النعام تقدر تشتري بيضهم وهو مزخرف بس تاخذه من السوق الشعبي ارخص واصلنا حتى وصلنا الى الكيب بوينت اللي هي راس الرجاء الصالح منضر خلاب وفي طريقنا عدينا على مجمع للبطريق صورنا معهم وممتعين مره . طلعنا لاسواقهم اللي كانت افخم من جوهانزبرغ مثل ايست قيت وفيه سوق ثاني بس نسيته وفيه سوق شعبي لو بغيت تتقضى اشياء شعبيه ما طولنا في كيب تاون رجعنا لجهانزبرغ وريحنا فيه يعني اذخناها استجمام لانه ما فيها اشياء كثيرة تروح لها هناك يعني يكفيك ثلاثة الى اربعة ايام بالكثير فيه. اهم شئ في جنوب افريقيا السفاري يعني انا مستعد اروح لجنوب افريقيا بس عشان السفاري اكبر خطا سويته انا اني ما سالت عن الديرة قبل ما اروح لها عشان احللها بسبب ضروف تجهيز الزواج فانصحكم انكم تدخول اكبر عدد من المواقع اللي تدلكم على غير الاماكن اللي اعطيتكم. هذا اللي قدرت عليه فلاتنسوني من الدعاء. تحياتي
أخوي ابسألك عن وضع السفاري هناك , قصدي اذا انا ناوي اروح صيد وقنص وشلون الوضع هناك ؟؟؟؟؟؟؟
وهل تعرف احد جرب الصيد في جنوب افريقا ,, وش افضل شهر للصيد....................اتمنى اني ما طاولت عليك في الاسئلة
ويعطيك العافية
اخي العزيز جنوب دولة متطورة والقوانين فيها كثيرة فإذا انت من هوات الصيد احسن تروح لأحد الدول الفقيرة الأفريقية اللي يخالفون الأنظمة فيها مثل الصيد مثل تشاد ونيجيريا. مع العلم أن السفاري هناك محضور الصيد فيها بتاتاً لأنها مصدر سياحتهم رقم واحد.
تحياتي
اخوي ان ان شاء الله بسافر بشهر يناير الى افريقيا بالباخره من مصر ...يمكن مدغشقر او جزر المحيط الهندي بغيت اعرف شنو تنصحني فيه ( اي دولة ؟) ومع ذكر الاسباب وكم تكلفة الرحلة بالباخره وجزالك الله خير...