السلام عليكم ورحمة الله وبركاته
مبارك عليكم الشهر اخواني
الكثير من أخصائيين التغذية ينصحون ببدء وجبة الإفطار في رمضان بحبّة أو حبتين من التمر، لأن التمر يساعد في عملية الهضم ويهيئ المعدة لوجبة الإفطار وخاصة بعد يوم طويل من الصوم.
والتمر يزوّد الجسم بالسكر الطبيعي اللي يعطي نشاط وحيوية لليوم اللي بعده وخاصة لما ناكله على السحور.
ودولة الإمارات تهتم بزراعة النخيل الفاخر وتصدير التمر للعالم عشان تعم فائدته هالثمرة وبركتها على الجميع .
وفمثل هالوقت من كل سنة تجتمع الشركات والموردين للنخيل عشان تحتفل بهالخير اللي تشتهر فيه الامارات
الا هو
مهرجان ليوا للرطب
باقي ايام قليلة تفصلنا عن انطلاقة المهرجان في دورته العاشرة لهالسنة واللي يقام للسنة الثانية على التوالي في شهر رمضان المبارك،
وبينطلق المهرجان من 12 ولغاية 18 يوليو
في مدينة ليوا بالمنطقة الغربية في إمارة أبوظبي.
تجتمع فيه مثل ما قلتلكم اجود انواع الرطب واللي يتفاخر زارعوها بجودتها وخلوها من المواد الحافظة
وفي المهرجان بعد بيكون في الكثير من الفعاليات الحلوة اللي يستانس فيها الزوار مثل السوق الشعبي اللي تشوفون فيه حياكة سعف النخل ..وغيرها من المنتجات الشعبية التراثية..
وأكيد تستانسون بعد بالتمور اللي يتفنن أصحابها فيها..
وتشوفون بعد اساس الصناعة عند الأسرة البدوية البسيطة من سدو وحياكة.
والمهرجان ينفع للجميع صغار وكبار
في خيمة للأطفال وتشكل مساحة هامة لهم عشان يتعرفون على تراث الإمارات بطريقة مرحة وفنية توصل لهم المعلومة وتعرفهم أصالة ورقي تاريخ الدولة.
المهرجان يرتكز على تبادل الخبرات الفنية بين المزارعين، والارتقاء بأصناف التمور، وتساعد على انتاج افضل الانواع من التمور، مع التوعية بأهمية الحفاظ على الخاصية الطبيعية الصحيّة للمنتج دون أيّ إضافات كيميائية.
وهذا برأيي من اهم الامور اللي ضروري المزارعين يركزون عليها هالأيام
مهرجان هالسنه غير أكيد لأنه بيصادف مثل ما قلت فرمضان
لا تضيعونه عليكم أخواني
والسلام عليكم
اخوكم مسافر ابوظبي https://artravelers.com