مرحبا بأخواني وخواتي في بوابة المملكة العربية السعودية
السموحة اذا جا موضوعي متأخر بس مشاغل الحياة ودراسة العيال و الدوام
بس الحمدلله فضيت نفسي شوي و قلت يستاهلون الأعضاء التعب و أشكر بنتي الغالية اللي تعبت على التصوير و تظبيط الصور و تنزيلها ( بعد مدة طويلة خ )
أول شيء بسم الله الرحمن الرحيم
السفرة بتاريخ 3- 8 - 2008
الرحلة مكونة من :
بو العيال ( الله يحفظه )
و أنا
والعيال :bounce8: بنت الله يحفظها و ( محمد و أحمد و خالد )
والشغالة ( ونعم العون في السفر )
نوع السيارة : دوج درانجو ( غيرنا التواير و شيكنا عليها و سوينا أوراقها كلها ؟؟؟؟!!!!!! وصارت سالفة عقب بخبركم عنها )
كانت هاذي أول رحلة للعمرة بالنسبة لي وللعيال وقررنا نطلع من بوظبي إلي الرياض ثم للمدينة ثم مكة ثم أبها ثم الرياض ثم بوظبي .
توكلنا على الله وطلعنا الساعة 9 بالليل و مرينا بيت عمة العيال وسلمنا عليهم و عقب مرينا بيت جدهم وسلمنا عليه وطلعنا صوب الغويفات و طبعا في وقفات بالطريق من عشا و راحة وشرب شاي .
الحمدلله أن فيني طبع أحمد الله عليه دوم أني أكون صاحية طول وقت السفر و أراعي الشيبة من قهوة وشاي وعصير
المهم وصلنا منفذ الغويفات الساعة 2 الفجر و راح بو العيال يختم الجوازات وتأخر نص ساعة وعقبها ساعة و بديت أقلق وهو موقف السيارة في الإنتظار جان أشل السيارة و احطها بالموقف الجانبي صوب مكتب الجوازات و أخلي العيال يروحون لأبوهم يسألونه عن التأخير .
جا بو العيال وقال ما نقدر نطلع من الإمارات لأن السيارة عليها تعميم البنك ؟؟؟؟؟ قلت له كيف وانت فكيت الرهن ودفعت لهم المبلغ كامل و أنا سويت كل إجراءاتها ؟ قال بس لين الحين البنك ما شل التعميم من السيستم ... قلت والحل قال يا نرد بوظببي يا نبات و باجر يحلها ألف حلال ... قلت له الحل الثاني أهون .
وفعلا تمينا بالسيارة حوالي ساعة ونص نسولف و ندردش و نهزب العيال :112: لأنهم نشوا من الرقاد و هاتك يا أسئلة ونحن صراحة كنا من شدة التعب ما نبا نتذكر الموقف المهم قال بو العيال ما شي غير أشوف لنا غرفة لين الصبح على الأقل نمدد ريولنا وراح لف له لفة ورجع قال : شي غرفة بتتأجر بالساعة شورايج ؟ قلت له : أي شي هي كم ساعة والسلام .
وصلنا للغرفة و عينك ما تشووف إلا النور غرفة متر في متر و سريرين بس الشراشف والمخدات من زمن الفراعنة ( الحمدلله شالين ويانا فرش ومخدات ) و حطينا أغراضنا وفرشنا فرشنا تصورو ( سرير تمددت عليه بنت ويا ولدي الصغير ) و سرير جلست عليه أنا وبو العيال وأحمدو ) و محمد انشغل بالبي اس بي و الشغالة وحليلها فرشت على الأرض و قعدت و طول ال 3 سساعات ونحن ضحك وتعليق على الغرفة :8888:و العيال كل شوي اللي يقول أحس بصراصير في أذني واللي يقول والله بتطلع لنا حية و اللي يقول السقف بيطيح .... المهم أذن الفجر و حمدنا ربنا على النعم و طلعنا على طول توضينا وصلينا و صوب الجوازات على طول .
اتصل بو العيال على مرور دبي و خبرهم الوضع و جزاهم الله الف خير خلصو الموضوع بساعة وحدة وكنا مخلصين الإجراءات على الساعة 8 ورحنا فطرنا في كنتين المنفذ و توكلنا على الله صوب الرياض .
وهاي بعض الصور من الطريق ( بس من غير ترتيب ) لين أكمل لكم عقب .....
في الطريق عند منفذ الغويفات