عبيـ الروح ـر
23-02-2022 - 04:12 pm
السلام عليكم ورحمة الله
اولا وقبل كل شي احب ان اتوجه بالشكر للقائمين على هذا المنتدى الأكثر من رائع
وكذلك الأعضاء المميزون بكل شي .. نعم بكل شي .. فقد احترت على اي شي ممكن ان الحظ تميزهم فقد لمست فيه الخيره وحسن النصيحه فجزاكم الله الف خير
اخواني اتمنى تساعدوني في التخطيط لرحلة للنمسا .. بس حبيت اقول لكم ان الرحلة لثلاث اشخاص بالغين واربعة اطفال ..
المهم بالسفره اني رايحه اخذ اختي معي وهي بس من فتره تعرضت لظروف نفسية اثرت عليها بأكتئاب من العام الماضي وكانت نفسييتها دمار بسبب فقدها لطفلها وزوجها في حادث فنصنحنا الدكتور المعالج ان تغير جوو بمنطقه هااديه .. وعلى طوول جات النمسا بريفها المعروف في بالي
الحمد لله الحين هي احسن بكثير عن السنه الماضيه لانها تؤمن بالقضاء والقدر بس ممكن يكون للحين نوع من الحزن مسيطر عليها ..
والخدمه الي ارجوها منكم يا اخوان هي انكم تخططون لي للرحله يعني سفرتنا بتكون بتاريخ 21/7 والعوده بتاريخ 6/8 وقسمتهم تسع ايام في زيلامسي وسانسبورج والباقي بفيينا والي راح تكون محطتنا الاولى وبعدها زيلامسي ..
وايش افضل بالنسبه لها التنقل بالتاكسي او الاندر قراوند ؟؟ اخاف تتضايق من الزحمه ؟
وشرايكم بفنق اتلانتس هوتيل فيينا ؟ وزيلامسي للحين ما ححدنا ووين بنسكن
اتمنى تذكرون لي اسماء فنادق او شقق مناسبه
وسلامتكم يالغالين
ادري كثرت عليكم بالكلام بس وربي مالقيت حد غيركم ممكن استشره
اختكم عبير
ياهلا فيك اختنا عبير الروح حياك الله فى هالمنتدى أولا ويشرفنى انى اكون اول من يرد عليك فى اول مشاركه لك..........وان شاء الله انى اقدر اساعدك وافيدك حسب خبرتى البسيطه ثاني شي سلامات لأختك ان شاء الله ماتشوف شر وطلعه النمسا فكره حلوه لها انها تغير جو بالذات فى سالزبورغ وزيل ام سي هالاماكن الطبيعه طاغيه فيها وان شاء الله تنبسط وتتغير نفسيتها
المهم انا ما راح اطول عليك وبعطيك هالمواضيع وكلها عن تجربه شخصيه
هذا موضوع رديت فيه على احد الاعضاء بخصوص فيينا اول محطه لكم
اى استفسار بخصوص فيينا انا حاظر باللى اعرفه وبخصوص الفنادق انا سكنت فى الماريوت فندق رايق وهادى وعلى الشارع الرئيسي يعني اذا سكنتو فيه ان شاء الله ماتنزلى تمشي خطوتين الا وانتى عند السيتي سنتر والكوفى شوبات وفيه فندق اسمه اوربا الظاهر عند السيتي سنتر يمدحو فيه الاخوان فى المنتدى؛ التنقلات فى فيينا فى الاندر جراوند مو زحمه تطمنى من هالناحيه اما التكسي لاهو عملى ولا هو اقتصادى وأظن ان التكاسي فى النمسا لها عدد محدود من الركاب ما يقدر يزيد وانتو ما شاء الله 7 ( عموما يفضل تستشيري الدكتور فى هالموضوع )بخصوص الايام انصحكم ماتكثرو ايام فى فيينا لأنها فى الاخير مدينه يعني الزحمه والسيارات والضوضاء موجودين يكفيها ثالث ايام والرابع انطلقو على سالزبورغ عند الريف والهدوء وهذا اكيد الى انتو جايين عشانه
المهم قبل ماتطلعو من فيينا بليله ولراحتكم خلو الرسبشن يعطيكم مواعيد الرحلات المتجهه الى سالزبورغ قولو له time table راح يعطيكم جدول فيه مواعيد الرحلات الى سالزبورغ اظن كل ساعتين اذا ماخانتني الذاكره فيه رحله وعلى ضوئها شوفو الوقت الى يناسبكم المسافه بين فندق الماريوت ومحطه القطار 10 دقائق
نصيحه لكم لاتكثرو شنط قدر الامكان خلوها قليله لانها راح تتعبكم فى القطار وحاولو تركبو القطار من اخره مو من بدايته لان بدايته راح تكون مزحومه وهذا يضطركم انكم تمشو فى المقطورات المزحومه حتى تصلو للمقطوره الاقل زحام وهذا المشي كله مع شنطكم فحاولو ان تذهبو الى المقطوره من اخرها
سالزبورغ وما اروعك يا سالزبورغ مع كل الوناسه والبسطه فى فيينا الا انى اعتبر سفرتى بدأت من سالزبورغ
سالزبورغ وياليت لو تعطوها6 أيام
لأن سالزبورغ جمالها فى الاماكن المحيطه بها مثل قريه موند سي ومغاره هتلر ومجموعه كبيره من البحيرات حول سالزوبرغ وحديقه وقصر hellbrun وهذا موقعهم http://www.hellbrunn.atاما سالزبورغ المدينه اهم الاماكن فيها حديقه الماربل جاردن حديقه رائعه اكيد شفتى لها صور هنا فى الفندق ما عمرى شفت حديقه منسقه بجمال ذيك الحديقه ونهر السالزاك القعده عليه ترد الروح وياليت يكون معكم فرشه صغيره على النهر القعده هناك خياليه اه ياقلبي والبلده القديمه بمطاعمها والكوفى شوبات والسوبر ماركات وترى السوبر ماركت يقفل بدري بخصوص المناطق الجميله حول سالزبورغ وكيفيه الوصل اليها عنى انا استخدمت شركه (بانورما) موقعهم قرب حديقه المربل جاردن وراح تلقو بروشرات لهم فى الفندق رحت معهم فى رحلتين الرحله الاولى eagle s nest منطقه رائعه فوق الجبل والوصول اليها اروع لأنك تمر بمجموعه من الحدائق والغابات المنظر لا يوصف وهالمكان كان يختبئ فيه هتلر ايام الحرب العالميه
الرحله الثانيه وهى الاروع موند سي هاذى منطقه قريبه لسالزبورغ (الى ما راحها يعتبر ما راح النمسا كلها) بدون مبالغه هالمنطقه رائعه الرحله تتضمن ركوب القارب والدوران حول البحيره
بصراحه هالرحله راح تضل عالقه فى ذهنى فتره طويله وكل الى اذكره انى كنت مبتسم طوال وجودى فى تلك المنطقه من كثر ما حباها ربي من جمال للطبيعه
على العموم راح تلقو خيارات كثيره مع شركه بانوراما ولاتشيلو هم اماكن التمشيه لأن الرسبشن موجود ويساعدكم وينصحكم بالاماكن الحلوه وممكن يجيب سياره تاخذكم من الفندق الى شركه بانورما مع انها كانت قريبه مره من الفندق ومع هذا جابو لنا سياره
عنى انا سكنت فى فندق كراون بلازا قريب من حديقه المربل جاردن وقريب من شركه بانوراما وقريب من النهر ما استخدمت التاكسي الا من محطه القطار الى الفندق والعكس
لاتنسي التمشيات هناك يفضل كلها تكون فى الصباح لأن مافى يساعد هناك ان الواحد يسهر كل شي يقفل بدري وراح تلاحظى هالشئ
هاذى بختصار اهم الاماكن فى سالزبورغ
ان شاء الله انى اعطيتك خلفيه عن فيينا وعن سالزبورغ ولو تلفى شوي فى المنتدى راح تلقى مواضيع كثير ومدعومه بالصور عن كل الاماكن الى تكلمت عنها
https://artravelers.com/p/re/53552
بخصوص زيل ام سي اوعدك بكره اجى واكمل عنها لأنى مضطر اطلع الحين
وبالتوفيق اختى فى سفرتكم ومره ثانيه اتمنى السعاده لأختك والله يعوضها عوض خير يارب
فى أمان الكريم