1. أول شي الفندق :


2. الفطور زين لابأس فيه


3. 2-الأسواق في ميلان شهر 8:


4. واهيا احسن شي لان الدومو يومين ثلاث تخلصه

السلام عليكم ورحمة الله وبركاته....
اول شي احب اشكر القائمين على هذا الموقع الي الصراحة دشيته بنصيحة اخوي لاني كنت بروح ميلان والحمدالله الحين رجعت وقلت و لازم ارد الجميل وافيد غيري مثل ما فدتوني.....

أول شي الفندق :

أنا اخترت فندق مايكل انجلو لأن اسعاره مناسبة ما اقولكم انه يم الدومو لا ولا مشي حتن بس بالقطار ما ياخذ خمس دقايق يعني ثلاث محطات بس للدومو وبالتاكسي 9 يورو بالكثيرالفندق نظيف وبنيانه مو قديم يعني مو مثل باقي فنادق ميلان يعني كانت منازل ورموموها لا هذا مبني على انه فندق

الفطور زين لابأس فيه

ليلة الفندق 38 دينار كويتي......انا كنت محتاره بينه وبين ستارروزا بس لأن ستار روزا ليلته 79 في فرق وايد . بس ستار روزا عند الدومو للأمانه بس مادري عن خدمته داخل .
الفندق يم محطة القطار الرئيسية مسافة دقيقه مشي بس يعني الي بيسكن بميلان وناوي يتنقل وايد بره ميلان يختار هالفندق نصيحة لان سهل يحجز بسرعة واذا حان موعد القطار بسرعه يروح ما يحتاج وسيلة نقل من فندقه للمحطة.

2-الأسواق في ميلان شهر 8:

طبعا هالسالفة سوتلي ازمه قبل السفر لأن ناس قالو مصكره وناس قالو لأ بس انا رحت وشفت بعيني
الدومو والشوارع الي حواليه 95% مفتوح ..... الماركات العالمية prada ,armani ,LV ,gucci.......وغيرها مفتوحين واذا لأ في مجمع اسمه la rinachante يم الدومو داخله كل الماركات وهذا يفتح حتن في العطل الرسميه والسبت والأحد من الصبح لل 10 بليل .
بس يوم 15 اغسطس عندهم عطله مادري شسالفتهم ف كل شي يصكر أو الأغلبية العظمي ماعدل هالمجمع محد أنقذني غيره......
شارع بيونس آيرس 60% مصكر لأنه اغلبه محلات ايطالية واصحاب المحلات ايطاليين واغلب الايطاليين شهر 8 يروحون للمناطق الي جنب الشاطئ او يسافرون بره ايطاليا على كلام التاكسي فتقريبا اغلب المنازل مصكره وماكو زحمه سير بالمره يعني اذا بعدت عن الدومو راح تشوف هدوء مو طبيعي بس الدومو لأ طبعا زحمه وايد وسواح كثيير
بس الي بروح ميلان نصيحة يروح اخر 7 اخر اسبوعين تقريبا تكون توها بادية التنزيلات والمحلات ما صكرت وفي بضائع حلوه يعني في 8 اكثر الأشياء تكون خالصه
وعن المحلات المصكره اغلبها ايطاليه واحنا رايحين نبي شي ايطالي ويكون رخيص فحسافه كان في كذا محل من الواجهة مبين حلو وأسعاره زينه بس مصكر بس الحمدالله المفتوح مكفي ...
يعني الي مضطر ما عنده وقت غير 8 يروح ولا يضيق خلقه وايد مفتوحين....
والي يبي السوق كله مفتوح ويكون راهي يبي نيو كوليكشين يروح اول 9 لأن كل شي يفتح تقريبا 29 -8 اهما كاتبين التاريخ على ابواب المحلات.
الأسواق البعيده عن ميلان : ( أسواق الاوت ليت )

واهيا احسن شي لان الدومو يومين ثلاث تخلصه

اولا (سيريفالي اوت ليت)كيفية الوصول اليه : القطار احسن وسيلة وارخص شي :
من محطة القطار الرئيسية بميلان الي محطة Arquara Scrivia station احجزو من ميلان روحة ورده بنفس اليوم ونزلو بهالمحطة في باصات تاخذكم من المحطة وتنزلكم السوق سألو عن اوقات الباصات من الي تحجز تذاكر واذا تبون تكسي في بس ياخذ 15 يورو ما يسوا انا رحت بتاكسي لأني مالي خلق انطر الباص
السوق حلو وايد وخصوصا للأطفال والصبيان والنساء حلو بس ترى مو وايد رخيص بس ارخص من اسواق الدومو واهوا كبير ترى وفي مطاعم وكافيهات يعني انا قعدت فيه لي 7 بليل تقريبا والمسافه بالقطار تقريبا ساعه وثلث. http://www.mcarthurglen.it
ثانيا ( فوكس تاون)
هذا السوق في سويسرا بس بالقطار ساعه وعشر دقائق بس بس لازم تاخذون الجوازات لان لما تنزلون في شرطه عند القطار تتاكد من الفيزا
السوق حلو واسعاره زينه بالنسبة لإيطاليا وموقعه هو http://www.foxtown.ch
ومدام انتو واصلين سويسرا ممكن تروحون لحديقة اسمها swiss miniatur اهيا حديقة فيها وايد اماكن بسويسرا بس مصغره بمقدار 1:25 يعني حلوه وفيها الدومو صغير بعد وفيها مطعم واحد ...
للوصول الى هذه الأماكن من ميلان اخذو قطار الى محطة مندريسيو mendrisio ومن المحطة في تكاسي للسوق والحديقه مسافة 10 دقائق فقط .
وهم احجز روحه ورده لميلان بنفس اليوم واذا بتسكن بلوقانو ترى حلوه .
اذا ماكو قطار لمندريسيو ممكن تنزل بكياسو chiasso وتبدل القطار لمندريسيو .
اوقات العمل للسوقين موجودين بالموقع لأن اخاف تتغير .
3-شارع بيونس آيريس :
حلو واسعاره رخيصه بالتاكسي ممكن تقولون للسايق شارع بيونس ايريس اذا بالمترو نزلو بمحطة LIMA .
4- الشارع الي فيه المركات العالميه والغالية :
ما اعرف اسمه للأسف بس اهوا قريب للدومو مسافة مشي يعني , بالمترو عند محطة S.BABILA.
والمحلات تصكر الساعه 7.
للذهاب الي فينيسيا من ميلان وضروري لأنها احلى من ميلان كلها واحلى منطقة زرتها بحياتي:
اخذو اسرع قطار لأن في ثلاث قطارات واحد ثلاث ساعات وواحد ساعتين ونص وواحد ساعتين وثلث
ولازم ينزل بمحطة S.LUCIA
انا رحت عن طريق قطار بو ساعتين ونص رحت ورديت بنفس اليوم اهيا حلوه بس زحمة مو طبيعيه وضيج كأنك بخان الخليلي بس تستاهل
سعر التذكرة للشخص الواحد 18 دينار كويتي روحه ورده على الدرجة الثانية وترى الدرجة الثانية وايد وايد زينه ونضيفه انا ماجربت اللأولى بس الثانية مافيها ولا شي غلط.
لازم تاخذون شي للأكل لان الي يبيع باليورو ستار مادري مو اكلنا يعني اشياء احنا ما ناكلها فأحرص انك تاخذ شي وياك.
اذا نزلت بفينيسيا وتبي تروح لساحة سان ماركو واهيا المركز هناك في طريقتين في التاكسي وياخذ 70 يورو وكنا اربع اشحاص وفي مثل مركب راج تشوفون طابوه عنده ياخذ 6 يورو للشخص وخذو هذا لأن المسافة ما تسوى ترى .
في الجندول الي يدور فيك بفينيسيا وسعره ثابت 100 يورو ادري غالي بس ترى يسوى واحنا كنا 4 اشخاص فمادري اذا يفرق العدد أو لأ.
للشباب الي بروح سان سيرو ( نادي اسي ميلان): مادري اذا اهوا مال انتر بعد لان بالمحل كان في بضائع للانتر ......
اذا في مباراة بنفس اليوم ترى ما يفتح للزياره
السبت فاتح انا رحت بس الأحد مادري وفيه متحف واتوقع يسوون لك جوله انا الصراحه دخلت المحل مالهم وبس اهوا يبيع تذكارات وفنايل إسي وانتر ميلان واحذية يعني حلو.
ممكن تاخذون التاكسي بس ياخذ وايد اخذو القطار لمحطة LOTTO ومن المحطة للنادري بالتاكسي بخمس يورو بالكثير بس تواعدو مع التاكسي يردلكم لما تخلصون لأن مافيه تكاسي يم النادي.
اتمني ان هالمعلومات تساعد احد برحلته لميلان.
والي يبي اي شي انا حاضره وخاصه بالقطارات والمترو صرت خبره فيها....
tHANKS AGAIN