- سكنا في هذا الفندق
مرحبا فيكم اخواني واخواتي
اتوقع اني صرت معروفه بالشي هذا أي مكان اروح له لازم اقولكم ملاحظاتي عنه .. واليوم راح اقولكم ملاحظاتي عن اسكوتلند والبحيرات
اول شي راح ابتدي في lake distrect
سكنا في هذا الفندق
https://www.booking.com/hotel/gb/woodlands.ar.html?aid=1300939 الفندق مافيه لفت وهالشي يمكن يكون متعب لبعض الناس .. وبخصوص انه خمس نجوم انا اشوف يستحق 3 نجوم مادري من اللي مقيمه ومعطيه 5 نجوم هلكنا مع الشنط لين فوق وبصراحه انخدعنا بالصور توقعناه شي طلع صغير ضيق والغرفه ضيقه ولافيها تكيف .. والحمدالله ان راعي الفندق هو شل شنطتي لين فوق لان وزنها يمكن طن والسرير صغير ماشوفه يصلح حق نفرين النومه فيه مش مريحه ابدا .. ودورة المياه الله يعزكم تخيلو بس المغسله فيها صنبورتين وحده بارده ثلج على اليمين ووحده حاره من قلب على اليسار مافي مكس تعذبنا بصراحه شوي نحترق وشوي نتجمد الوضوء كان جهاد اغسل يدي مره يمين ومره يسار ابدا ماحبيت هالنظام اول مره اشوف مغسله كذا
بس فطورهم كان حلو والعيله بعد اللي ماسكه الفندق طيبين خدومين وفي حالهم .. ومكانه شوي بعيد عن السنتر مشي يمكن 7 او 8 دقايق لين توصل وبعيد شوي عن البحيرات
وبقولكم شي البحيرات اشوفها عاديه مافيها أي انشطه ولاشي بس قابلوا البحيره وهات يامشي .. لما شفت صورها تحمست قبل لاروح قلت شكلها احلى من زيلامسي وانترلاكن بس بصراحه مافي مقارنه هناك في الف شي وشي اتسونه اما البحيرات مافيها أي شي بس تتنقلون بين المدن المجاوره .. وشفنا باص سياحي يدور في ويندرمير بس ماركبناه قعدنا اندور بالسياره للقرى الثانيه وحول المنطقه اللي سكنا فيها بس .. وكا طبيعه ماعليها كلام روعه والجو يجنن فيها .. الناس اللي تبي بس طبيعه واسترخاء وجو حلوو انصحهم في البحيرات وكبار السن بعد تنفع لهم .. يمكن احنا ماعرفنا نتسيح فيها ونروح حق اماكن حلوه يجوز بعد .. والفنادق اللي هناك اكثرها نظام بريك فاست اند بيد خ يعني لو جعتو فالليل بتكون راحت عليكم مافي شي فاتح والفندق مافيه الا فطور مطاعمهم اتسكر بدري
نجي حق اسكوتلند
سكنا في هذا الفندق
https://www.booking.com/hotel/gb/missoni-edinburgh.ar.html?aid=1300939 قريب الفندق فيه مسجد تمشون له يمكن عشر دقايق تقريبا صلينا فيه يوم الجمعه هاذي ميزه جدا حلووه
الفندق ماعليه كلام بصراحه حلوو وانصحكم فيه للي حاب يروح ادنبره وموقعه جدا استراتيجي في شارع حيوي كله محلات ومطاعم الموقع خطير
مباني اسكوتلند قديمه قديمه قديمه اتحسون يبيلها صبغ يبيلها تعديل لونها بني محترق طاير ماعرف اشلون اوصفها بس اللي راح وشافها بيفهم قصدي لندن مبانيها واجد احسن من ادنبره القديمه
ومن الحين بقولكم الناس اللي لياقتهم صفر لايروحون لان ارض ادنبره مش مستويه يعني وانتو تمشون بتطلعون وتنزلون هم كذا شوارعهم متعبه ... وصوت موسيقتهم طول اليوم راح تسمعونها وشعبها طيب خلوق محد يطالع حد حسيتهم متعودين على اشكالنا وعلى الحجاب.. وشوارعهم ضيقه للي بيسوق وبيتنقل في المدينه وكلها اعمال طرق ماحبينا السواقه فيها حتى شفنا باص سياحي بس قلنا مستحيل نركب بسبب زحمة السير واعمال الطرق .. ومن سوء حظنا من جيناهم كله شمس وهم يقولون انتو محظوظين احنا لنا كم سنه ماجاتنا شمس وعلى حظكم اشرقت الشمس يبشرونا بعد مايدرون ان احنا شاردين من الشمس زهقنا منها ومن حرها
وزوجي كان حاب يشوف حيوان الباندا الله يكرمكم ورحنا حديقة الحيوان قلنا بنجرب شي جديد وممتع كرهت عمري الصعود والنزول في الحديقه على اكثر بعد مش مستويه ابدا ابدا ياانكم تصعدون فوق او فجاه نزول المشي اتعبني واجد وامبين ان الحديقه قديمه يمكن من 1500 للحين ماطوروها خ وبعد هالتعب قالوا الباندا مش أي حد يقدر يشوفه خ يعني تعب على الفاضي
اسكوتلند يمكن تعجبكم ويمكن اتشوفونها عاديه اما بالنسبه لي انا ماحبيتها ولاكرهتها مافي شعور مادري شنو يسمون هالحاله بس بعد ماندمت على زيارتها وزيارة البحيرات شفت شي جديد حبيت جوها في شهر 6 كان روعه الحراره كانت تقريبا 16 و 17 وفالليل ابرد ..
وعقبال ما اروح العالم كله مع ابو اعيالي سياحه الله يخليه لي ولايحرمني منه اللهم امين
اخر محطه لنا كانت لندن ويالبى لندن بجد تشرح الصدر والواحد مايتملل ولايضيق صدره فيها ابدا ابدا
اسمحولي على الاطاله واي استفسار انا في الخدمه
شكرا علي الملاحظات
زين اسكتولندا كم يوم جلستم فيها ووين رحتوا