- سلانجور عشانهم قالوا انها اكثر ولايه فيها نسبة اصابه بحمى الضنك
السلام عليكم ورحمة الله وبركاته
محدثكم من ارض الخضره والقليل من الوجه الحسن
اللهم لك الحمد ولك الشكربالنسبه لمرض حمى الضنك او مايسمى باللغه المحليه الدنقي الحمدلله رحنا ورجعتنا بكره إن شاء الله بتاريخ 25/6 ولله الحمد ماشفنا شي يخوف ابد
اللهم كم قرصة باعوضه انواع التحكك ورحنا للعياده هناك وعطونا كريم وحبوب والحين الحمدلله احسن
ومعلومات عن الدنقي كما يسمى في ماليزيا :-
قرصة من باعوضة تعيش بالماء الحلو الراكد وليس المتحرك وتكثر حركتها بساعات الصباح الاولى وعند المغيب فقط وهي باعوضة بطيئة الحركه
اعراضها حبوب صغيره بكامل الجسم - آلام بالمفاصل - حراره - عوار بالحلق
هذا ما اتذكره من كلام الدكتور ومن كلام السائق اللي معاي لانه اصيب فيه على كلامه قبل شهريناما بالنسبة للفنادق
انا سكنت بالتريدرس اللي جمب البرجين بصراحه حلو جداً نظافه وتعامل وكل شي
سعره الليله ب 380 تقريباً يمكن تزود كم ريال لا اتذكر بالضبط غرفه مطله عالحديقه والبرجين
بالنسبه للفطور اي كلام يالله تاكل لك خبزه وتغطها بالشاهي الله يديم النعمه فطورهم اكثره حق اسيويين
سوشي وماسوشت رز مسلوق ومدري وشو يعني ماينفع لنا وبس
لا صح ذكرت فيه بيض او أومليت بس حتى ولو ماحبه
بس يمكن لا جا وقت السياح الخليجيين يتغير اكلهم الله اعلم
.
.
وسكنت ايضاً بالجولدن ساندز في بينانق ما اعجبني ابد عادي جداً جداً وحرام على سعره
غرفه مطله عالجبل على كلامهم وهي لا جبل ولا شي على الحاره اللي وراه ب 500 مافيه حلو الا موقعه فقط
بالنسبه للفطور فطورهم اكثره حق اسيويين
.
.
ورجعت لكوالالمبور وسكنت بالويستن الله لا يعيد الشر يومني حجزت فيه من مدح الناس له
بصراحه جداً بايخ ماعجبني غرفه ديلوكس مطله عالبرجين بالدور 29 قيمته الليله ب 640
أثاث نوعً ما متهالك غرفه جداً صغيره يعني سرير مكتب اريكه بالعربي لا تغركم صور له مطلع البرجين من اطلالة الغرفه وجايه الصوره خيال كل هذا ماشفت منه ولا 5%
:112:اتوقع وانا ماشفت غرفه ان الماريوت احلى بكثير يكفي اللوبي الماريوت خيال ديكوراتهم
بالنسبه للفطور تقدر تقول اوكي لان اكثره نعرفه كروسان وبيض مسلوق وفول وفطاير وجبن وسلطات يعني كل شي ممكن يتاكل بالنسبه لنا يالعرب :x1:
والله يا انا دغيت بالبيض المسلوق دغ كن ماعمري شفت بيض ياوك بصراحه مبطي عن مثل هالفطور
.
.
ايه خل اقولكم وشلون خطة رحلتي
.
.
استأجرت 6 لياليي في التريدرس ونمت اول ليله وخليت اغراضي واخذت اللي يكفيني ليلتين ثم طلعت لبينانق كنت مستأجر هناك ليلتين في الجولدن ساندز ثم رجعت وكملت باقي ايامي بالتريدرس يوم خلصت طلعت منه ورحت للويستن اللي كنت مستأجر فيه 6 ليالي وبس مارحت للنكاوي ولا سلانجور
.
.
سلانجور عشانهم قالوا انها اكثر ولايه فيها نسبة اصابه بحمى الضنك
ولنكاوي لاني كنت بروح لها بس الفيري ماش خوفوني منه فا مارحت مع اني كنت مستأجر ليلتين بعد الليلتين اللي في بينانق في فندق لنكاوي لاجون بس مارحت يالله لعلها خيره المره الجايه ان شاء الله عشان يصير فيه شي جديد
.
.
رحت لكاميرون هايلاند نصيحه لا احد يروح الا عاد اللي ماعليه من الطريق المتعب ساعتين ونص ماغير لفات ورقيات اعوذ بالله عاد المشكله المنطقه ماتسوى ذا كله الله ام كم مزرعة شاهي وتشرب لك شاهي الله يديم النعمه وترجع صح الجو حليو مو حلو بس تحسفت قد شعر راسي اني رحت لان مشوارها مايستاهل هالتعب كله ولاني بالرجعه تعبت معدتي وراسي صكني وحاله
يعني روحة جنتنق افضل بمراحل يكفي ان فيها تلفريك وجو خيال براد وهناك فعاليات والعاب وكل شي واقرب بواجد
.
.
لا يفوتكم الاقواريا او احواض السمك الكبيره وتأكل السمك اللي هناك متعه صحن صغير ب 5 رنقت
موقعهم بين فندق تريدرس والبرجين من يم الحديقه
.
ومطعم ناب الايراني بشارع العرب بصراحه خيال كل ليلة اتعشى فيه نظيف وشغل مرتب واكله جونان
.
اللي اعجبني من الاسواق اللي هو بي بي بلازا يفتح على سوق ناسي اسمه سنجواي الظاهر رهيب جداً على شارع العرب اللي رهيب سنجواي ترا مو بي بي بلازا بس ذكرت لكم بي بي بلازا لانه هو الواضح مدخله على شارع العرب
وميقا مول بعد حلو حتى اسعارهم
.
والله ياهي ديرة مشي بيتعب اللي ماتعود على المشي ياويلكم
.
وبالأخير لا يسعني الا ان اشكر كل من قام بكتابة حرف في هذا المنتدى اللذي استفدت منه الكثير
وادعوا لهم بالتوفيق والسداد وبطول العمر الصالح
.
.
وتقبلوا تحياتي اخوكم كوجي
عاد الصور اصبروا علينا شوي
بس انا حاجزه بالويستن
بالسلامه ان شاء الله