السلام عليكم
تم بحمدلله وصولنا الى ارض الوطن سالمين غانمين بعد قضاء اجازة ممتعة برفقة 2 من خيرة الاصحاب
كان مدة رحلتنا قصيرة نظراً لأرتباطنا بفصل صيفي في الجامعة
لذالك كان مخطط رحلتنا 7 ايام (( 3 ايام اسطنبول و 4 ايام انطاليا ))
الفنادق التي سكنا فيها
اسطنبول (( pera rose hotel ))
فندق ممتاز جداً جداً قريب جداً مسافة 200 متر من شارع الاستقلال الموظفين يميزهم سعة صدرهم وامانتهم
فكان سعر الغرفة الثلاثية عندهم 400 ريال سعودي لليلة الواحدة
نصائح لك اخي/اختي الكريم/ه في اسطنبول :
1- اول ما توصل مطار اتاتورك لا تقول ابغى مترو وما مترو خذ لك تاكسي يوصلك للفندق اللي ذكرته فوق ب 40 ليرة ولا وجع راس ولا تعب وعلى فكرة ترا التكاسي عندهم يشتغلون بالعداد يعني ان شاء الله ما فيه احتيال
2- لا تستخدم التاكسي الا من المطار الى الفندق وفي اوقات الحاجة اما المشاوير الباقية نصيحة اخ لك خلك على المترو والترام لأنها رخيصة
3- انتبه من اللي يعرض عليك ترتيب برنامج لك والله قمة النصب والاحتيال طبعا مثل شركة عرضت علينا رحلة الى جزيرة الاميرات الاميرات تقريبا اذكر 275 ريال للشخص وانصحكم بعرض شركة الحران (( مو تسويق بس عرضهم حلو ))
اما اذا بغيت تروح للجزيرة بدون برنامج انا اقولكم كيف
انت ساكن بمنطقة تقسيم تاخذ المترو من تقسيم الى ميناء كبتاش ب 4 ريال على اعلى تقدير للشخص او ب 25 ريال بالتاكسي ((اذا كان معكم اطفال ))
تركب العبارة ب ما يقارب 16 ريال للشخص ذهاب وعودة توصل الجزيرة تاخذ الحنطور ب 150 ريال لفة كاملة عالجزيرة والدراجات الهوائية الممتعة والمتعبة ب 25 ريال لليوم كامل
4- لا تطلب من مطعم او كافي او اي شي الا بورقة منيو ولكن بعض الاستغلاليين الله حسيبهم يجعل منيو خاص فقط للسياح ((الخليجين خاصة)) لذالك انصحكم بالمطاعم الكبيرة والمشهورة
5- من وجهة نظري لو تخلي عشاك او غداك من ماكدونالدز صدقوني ارخص بكثير من مطاعم المشويات هذا للي يحب يقتصد في رحلته لأن الوجبة في ماكدونالدز ب 10 ليرة ووجبة الاطفال على ما اظن ب 6 ليرة اما مطاعم المشويات اذكر مطعم مشويات طلعنا منه ب 75 ليرة لثلاثة اشخاص والمشاوي سيئة ((الله يكرم النعمة))
6- الحذر ثم الحذر ثم الحذر ثم الحذر من بعض المستعربين القوادين وانتوا بكرامة وهم كثر في شارع الاستقلال وفي تركيا عامة لذالك انصح اللي يسافر ومعاه شباب توهم في عمر الزهور انهم ينتبهون لهم ولا يتركونهم يصولون ويجولون براحتهم لأنهم وانتو بكرامة يأتون لهم على شكل الصديق والاخ ويبدون في الاخذ والعطاء معهم ويقولون لهم عندنا مطعم او كافي تعال شوفه بس او يقولون لهم احنا راح نعمل سهرة وفيها كذا وكذا وكذا وابن ادم نفسه ضعيفة وخاصة من هم في سن المراهقة وفي الاخير صدقوني ستأتيهم العواقب تبعاً
اعذروني لكن انا حبيت اعلمكم عن الطرق اللي يعملونها الله ينتقم منهم لكي تنتبهون لها
7- لمحبين الشواطئ والسباحة فيه ومن فقد متعتها بسبب البط الاحمر او (( النساء العاريات )) انصحكم بشاطئ فلوريا الرائع بالفعل كانت اجمل ايام حياتي فيه شاطئ رائع وعلى قولة احد اخواننا السودانيين الذي قابلناه في منطقة تقسيم وهو من له الفضل في اخبارنا بهذا الشاطئ
قال لنا بالحرف الواحد (( ازا تبغى شاطئ راغي ومحترم روح لفلوريا ))
اعذروني على الاطالة واي استفسار انا جاهز له