1. سبق ونزلت تقرير اسمها سويسرا انا احبك بس لااول مره بعلنها لكم


2. سويسرا انا كرهتك


3. وملاحظه صارت لي مع اعيالي


4. هل برجع سويسرا مره ثانيه ؟

مابي مشاكل ولاابي حد يهاجمني انا مجرد افضفض عن مشاعري واللي حسيت فيه لما زرت سويسرا وتوني جايه من يومين منها
تغزلت في حبي لها كثير رغم مرات اشوف اشيا ماتعجبني بس لاني احب هالبلد كنت اسكر عيوني عن كل سلبيه فيها بس هالمره تغيرت نظرتي لها

سبق ونزلت تقرير اسمها سويسرا انا احبك بس لااول مره بعلنها لكم

سويسرا انا كرهتك

اكثر شعب كريه شفته رغم اني اشوف كره لنا بس هالمره حسيت نفسي مقدر استحمل نفسيتهم مش الكل اكيد بس اكثر حتى من المانيا تشوف في عيونهم كره لااي حد اجنبي مب ببس للعرب حتى الجنسيات الثانيه اللي يشتغلون هناك يعانون منهم .. شي خايس شعب متخلف ماعندهم اي ثقافه ولايعرفون شي .. خصوصا في الجانب الالماني فعلا شعب ينرفز
وتوني اكتشفت انها غاليه بطريقه مش طبيعيه .. بعطيكم مثال بسيط انا لاول مره اودي معاي اعيالي صغار ولدي وبنتي واللبس اللي يلبسونه اليوم خلاص يندمر وتوهقت لان ملابسهم وسخه قلنا بنودي ملابسهم المغسله تخيلوا اللبس الواحد يغسلونه على 40 ريال مب مسالة اني مقدر ادفع بس فعلا الاسعار مش طبيعيه وكل ماقلت لهم ليه يقولون بيكوز سويسرا اضطرينا نشتري لهم ملابس جديده ونخليهم يلبسونها ولانخسر على غسيل لان مب لبس ملابس اشكثر عندهم ..
رحنا تغدينا في سبايس انديا اللي في انترلاكن مع اني ماكنت ابيه كان خاطري في الايطالي اللي قدامه بس حصلناه مسكر لان الساعه كانت 4 اول شي الخدمه اي كلام نفسيتهم مش حلوه وغير الذبان في المطعم وطلبنا بس لشخصين لان اعياالي صغار وماياكلون هالاكل الفاتوره قريب 600 انقولهم ليه يقولون بيكوز سويسرا .. رحنا في نفس اليوم تعشينا في مطعم لبناني هو الوحيد اللي في بازل الله يعز النعمه من اكله الفاتوره بعد كانت 500 وشوي والله لو المكان يستاهل ترى ماعندي مشاكل ادفع اللي يقهرني ان الاكل اي كلام والخدمه اي كلام والسعر غالي على شنو
وفي المانيا تغدينا في مطعم هندي شنو عجيب ودلعنا نفسنا في الطلبات والله ماكذب عليكم الفاتوره 200 وشي ومره بعد في مطعم ايطالي الفاتوره اطلعت ميه وشوي لاحظتو فرق الاسعار المانيا والله اشوفها حتى ارخص من قطر واحلى من سويسرا وحلوه للتمشي وفنادقها حلوه وكبيره الواحد يقدر يتنقل وشوارعها اتجنن
وفي سويسرا اللي بيدور دكان فالليل ماراح يحصل توهقنا نبي ماي اندور من محطه لمحطه حتى الدكاكين اللي في محاطتهم مسكره شنو هذا صدق دوله متخلفه المانيا في المحطات الدكاكين فاتحيه حتى النمسا هم ولاشي فاتح مافي الا البارات اضطر زوجي يجيب لنا من البار ماي وللاسف الغراش كلها قزاز اعتبرها خطره لان معانا صغار طول الوقت اخاف تنكسر على حد فيهم
عنصرية شعبهم خايسه والله وهالشي بينفر السياح منهم اذا ماثقفوا شعبهم المتخلف مع السياح ويعلمونهم اشلون يتعاملون بطريقه مؤدبه معانا مب يطالعونا حشرات ولاشي علشان انا لابسه حجاب ولا علشان واحد لونه شوي اسمر ولون شعره اسود ولا لانه مش اوروبي .. في هالسفره احتكيت في الشعب اكثر من كل مره حسيت اني عرفت تفكيرهم النمساوين احسن منهم وألطف والكل يتكلم انجليزي السويسرين يعرفون بس مايبون فيهم نذاله النمسا اشوفها حلوه وشعبها طيب ويساعدون وماعندهم عنصربة السويسرين حسيت هالمره بالفرق لاني زرت الثنتين حتى في اجو في النمسا كان روعه جينا سويسرا جانا الحر مادري ليش حبيت النمسا هالمره من كل النواحي طبيعه واماكن سياحيه اكثر من سويسرا
في بلادي احنا ماعندنا مشكله مع اي جنسيه في بلادنا ولا اي ديانه سوى كنت مسلم مسيحي بوذي هندوسي سيكي اي ديانه كانت احنا نتعامل مع شخص مب دين بس هم كثير يهمهم ان الشخص اتكون عينه زرقا ويكون اشقر ويكون نفسهم ولا خلاص الكل بيخيس النفس وياه وبيطالعونه بنظرات
اليوم الاخير لنا لبست عبايه لان بنروح المطار خلاص بنرد بلادنا حسيت نفسي اليسا ولا نانسي كنت كاشخه بالعبايه والنظرات والشنطه كل العيون علي والله حبيت الوضع ترى خ شعور حلو ان الواحد يكون ملفت الانظار يقولون برج الاسد كذا مادري صج ولا خ بس اكيد غيري مايحب .. كل هذا لاني لبست عبايه عيل اللي يلبسون نقاب اشلون يطالعونهم !
تصوروا في محل بيكري وحده عندها كيكاات وسويتات تخيلوا بس نحل قاعد يدور على الكيك ويمشي وانا وجهي لااردي تغير وصار كذا قامت اتكلمنا بنفس خايسه ان النحل يجي منه العسل وان هالشي مب وصاخه غير النامس والذبان شوفو وصاختهم والله انهم شعب مافي نظافه ابدا عايشين مع الحشرات والنامس والذبان
تبت توبه اني اسافر في الصيف شنو فطست من الحر اول مره اسافر هالوقت في موسم الصيف والسياحه .. انا انسانه اكره الحر تدرون ولاحد مشغل المكيف مع ان في مكيفات هذا اللي قهرني في مكيفات بس ذابحهم البخل امبطلين الدرايش والبيبان طول الوقت قاعده اهف على عمري انا الوحيده هم مافي اي احساس بالحر مادري من الصح انا ولاهم وغير الذبان انا جنوني شي اسمه ذبان اتوتر واوتر اللي معاي لان يدي اتصير مروحه الذبان في المطعم كله ولافي اي حد اشتكى ولاقال شي غيري انا حسسوني ان انا الغلط وهم الصح هالشي وصاخه شنو مكان اكل كله ذبان وحشرات ونامس ولاتتوقعون بتستانسون في حدايقهم طول مانا امشي في نحل وفي ذبان كبير وحشرات مادري اشلون هم فارشين على الارض وقاعدين بين النحل ومستانسين وانا اشرد كل ماقربت مني نحله

وملاحظه صارت لي مع اعيالي

رحنا حديقه علشان اليهال يستانسون تدرون حصلنا اطفال على كبر اعيالي اعمارهم 4 و 5 اهلهم مفصخينهم بدون اي ملابس ومخلينهم يلعبون في الالعاب ويتسبحون انا اعيالي اول مره يشوفون هالمناظر لان في بيتي ممنوع اي حد يشوف الثاني ولو حتى بالغلط شي مش مسموح جد توهقنا اخليهم يلعبون ويستانسون واليهال كلهم مفصخين ولاانغير المكان في الاخير قلنا لهم لاطالعون لان حرام ومايصير وعلمتهم غض البصر صارو بنفسهم يصدون او يسكرون عيونهم بيدهم اذا شافوا اي منظر مب اوكي .. ماعندهم ادب هالاهل حتى لوكان طفل عيب اخليه كذا بدون اي ملابس ماعرف اشلون تفكيرهم اللي بيروح مع اعياله راح يشوف من هالاشيا كثير واعياله بيتعلمون اعيالي اعرفوا الخمر واشيا واشيا خ ولدي يمشي الحين يقلد اللي شاربين خمر خ بس الحلو ان صار عندهم اعتزاز بدينهم وصارو يقولون الحمدالله احنا ماعندنا نفسهم
انا من عشاق الشتا اكتشفت بلادهم ماينراح لها في الصيف لان ولاحد يشغل مكيف وحتى في فنادق سويسرا بس مراوح يقصون علينا مافي مكيفات يقولون ليه نحط مكيف علشان شهر حار مع انه من شهر 5 عندهم حر واذا فتحتو الدريشه خذوا انواع الحشرات الدبور والنحل والذبان واشيا اول مره اشوفها عندهم ماتتخيلون اشلون عانيت وقت النوم حر موت الغرفه المكيف بس صوت
وغير الظلام اللي في شوارع اوروبا جد اوروبا فالليل موحشه ظلام دامس مافي الا ليتات السياره يازين بلادي في كل مكان ليتات ونور خصوصا اللي يسكن في الارياف راح يعاني او اللي بيستخدم الهاي وي
الحمدالله على النعمه في بلادي والله ان احنا في نعمه وخير وصج جونا حار بس في مكيفات وين ماتروح ومكيفات بارده هم فطسونا حر ومستحيل اتروح كوفي شوب ولامطعم كله ذبان وحشرات عادي البلديه اتسكر المكان هم هالشي عادي عندهم حتى في المطاعم التركيه النامس يدور على الخضرا مالت السندويشات والناس تطلب وتاكل الوضع جدا عادي مافي شي مسكر كل شي مكشوف وماشفت حد ينقرف الاانا واعيالي بعد مثلي

هل برجع سويسرا مره ثانيه ؟

ماتوقع انا رحت لها اكثر من 5 مرات كل مره كنت اكتشف اعيوبها وامشي بس هالمره حسيت طفح الكيل منها واتوقع اني صرت من عشاق المانيا صج فرق في كل شي شوارع سويسرا من اغبا شوارع العالم واي حد جرب وساق في سويسرا راح يفهم كلامي اما المانيا كله ادعس والقلب داعيلك وشوارعهم حلوه وسيعه اما الغبيه سويسرا شوارعها ماساه والله واسعار الفنادق معقوله للعايله والشقق وكل شي سعره حلو في المانيا وغير انها مريحه نفسيا الصبح فيها شي ثاني وكل منطقه جمالها غير
ارجع اقولكم حبيت افضفض وكلامي هذا ماطلع الا بعد زيارات كثيره واحب اقولكم ان الجانب الفرنسي اخلاقهم وايد احسن من اللي في الجانب الالماني هم العنصرين اكثر بس التخلف واحد عندهم
وارجع اقولكم اني بس افضفض لانكم اسرتي الثانيه ارتاح لما اكتب واقول اللي في خاطري ومب شرط اللي انا اشوفه غيري يشووفه كل شخص له نظرته ومابي هجوم بليز عادي مستحيل الاراء اتكون نفس الشي لازم في اختلافات واتمنى تتقبلون الاختلافات بكل صدر رحب
احب منتدى العرب المسافرون وهو اغلى موقع على قلبي
اتمنى اني كنت خفيفة ظل عليكم
في امان الله