- السلام عليكم ورحمة الله وبركاته
- نرجع الى محور حديثنا
السلام عليكم ورحمة الله وبركاته
في رحلتي الشهر الماضي الى سريلانكا صادتني مشكلة وحبيت اقولها لكم عشان تاخذون احتياطكم عند السفر..
بصراحة كانت المرة الأولى الي أزور فيها سريلانكا وكنت مخطط أنها تكون زيارة خاطفة سريعة لأني بانزل فيها 4 أيام ثم سأغادر إلى ماليزيا وسأبقى هناك مدة من الزمن لكن شاء الله أن تكون رحلتي أطول مما توقعت وذلك بعد أن عشقت سريلانكا من النظرة الأولى فقررت سريعا العودة مرة أخرى إلى محبوبتي الأولى سيلان.
وبما أن خطتي في السابق كانت زيارة لمدة 4 أيام في السيلان فاستشرت الأخ الجميل ارتكاز جزاه الله خير الي نصحني بقضاء بضعة أيام في المناطق الساحلية ثم ماليزيا ثم بضعة أيام أخرى في المناطق الجبلية.
نرجع الى محور حديثنا
قررت الحجز من النت وبالطبع فقد حجزت فندق بنتوته ليلتين من موقع holidayhotels وفندق ايدن ليلتين من hotelclub .. صار موعد السفر وطلعت دايركت على بنتوته وكل شي تمام ومن احسن مايكون أول يومين وبعدها رحت لفندق ايدن وفي يدي نسخة منم البوكينج الي سويته على موقع هوتل كلاب صدموني وقالوا لي ان ماعندهم علاقة بهذا الموقع -رغم فخامة الفندق لم تعجبني معاملتهم واصرارهم على الدفع نقدا- هنا انصدمت لأني دفعت للموقع فكيف ادفع مرة ثانية وبعد جدال واتصالات هني وهناك شد وجذب.. ما قالوا شي جديد غير ادفع اذا تبي تدخل عندنا!!
وقتها انا ما احتملت معاملتهم لي كشحاذ يشحذ من عندهم فوجدت نفسي مضطر للدفع عشان اقدر انام بعد التعب.. خذوا بياناتي وجوازي وطلعت لهم الفيزا كارد بس كان نظامهم متعطل فقالوا لي انتظر شوي وانا غليان من جوه، وقتها قام السائق بالاتصال بمدير المكتب Sarath الي ما قصر معاي -للعلم انا حجزت سائق فقط اما حجز الفندقين المذكورين أعلاه كان عبر النت- .. فشاركني معاناتي بالهاتف وحاول التفاهم مع إدارة الفندق بس مافي أمل .. في هذه اللحظات نظام الدفع الفيزا كارد فيه عطل وانا لال زلت انتظر.. سألني Sarath اذا كنت ابغى يدبر لي فندق غيره فطرت من الفرحة لأن الوقت متأخر من الليل وما كنت مرتاح من معاملتهم وتأخيرهم بحجة أن جهاز الفيزا متعطل.
فقال لي كنسل الحجز وخذ الفيزا وانا باكلم السائق يوديك فندق غيره.. خيرني بين 3 فنادق نسيت اساميهم فاخترت كاني لانكا لأن اسمه عجنبي
المهم بقيت يومين في كاني لانكا وبعدها طرت ماليزيا لكن سرعان ما تذكرت سريلانكا فعزمت على العودة مشتاقا للذهاب إلى المناطق الجبلية امتثالا لمشورة الأخ ارتكاز.. كانت أول خطوة هي عدم التعامل مع المواقع للحجز كفاية الصدمة الأولى وبالفعل اتصلت بSarath عشان يرتب جدولي ويحجز لي الفنادق وفعلا ما قصر حتى أنه نصحني أخذ رست روم في فندق صغير آخر يوم عشان ما اخسر فلوسي في فندق كبير لأني باوصل كولمبو الساعة 9 وطيارتي الساعة 4 الفجر يعني الساعة 1 بالليل انا طالع من الفندق يعني تقريبا 4 ساعات مايسوى فحجز لي رست روم وكلفتني أقل من 100ريال مع أني كنت بادفع 300 ريال لفندق آخر لولا عناية الله ولطفه!!
بالفعل قضيت أيام حلوة في كاندي ونوراليا رغم أن برامجها قليلة لكن طبيعتها حلوة حلوة
نرجع الى محور حديثنا
لما رجعت الديره تذكرت اني لازم اراسل موقع hotelcub لأن فندق ايدن قالوا ان ماتربطهم علاقة بهالموقع.. ابتدت مراسلاتي لأوضح المشكلة واسترجع أموالي، واذكرها لكم بالتسلسل- استغرقت شهر تقريبا- :
الموقع: في البداية قالوا عطنا شوية وقت عشان نحقق المشكلة
الموقع: فندق ايدن يقولون انك كنت قاعد في الفندق والحجز موجود باسك عندهم
انا: والله ماقعدت بالفندق وماعجبتني معاملتهم,, انا طلعت ورحت فندق غير
الموقع: يبين عليك جذاب ماقالوا بس أسلوب كلامهم كان يبط الجبد .. قالوا ييب لنا اثبات انك حاجز فندق غير ايدن بنفس التواريخ
(شعرت باليأس فكيف لي الحصول على رصيد فندق قديم، فاتصلت بSarath ووعدني بارسال نسخة من رصيد الفندق وبالفعل ارسله لي ايميل وانا بدوري ارسلته لهم)
انا: رصيد فندق كاني لانكا في المرفق
الموقع: لا رد
انا: ايام مرت ولا رديتو
الموقع اصبر نحقق في الموضوع
انا: للآن ماعندكم رد!!
الموقع: اي ما قدرنا نحصل رد لأن ادارة الفندق مشغولة لأنه موسم السواح
انا: ان شاءالله نصبر
الموقع: شكرا ونأسف على ازعاجك.. تأكدنا من انك لم تجلس في الفندق
انا: شفتو شلون.. اهم شي فلوسي رجعوها
الموقع: بعد ايام مرت.. نأسف على التأخير ولكن نأمل منك أن تفيدنا باسم الشخص الي قال لك ان الفندق لا صلة له بموقع هوتل كلاب
انا: وكيف اطلع اسمه .. انا ما اشتغل معاهم عشان احفظ اسماء الموظفين بالفندق
الموقع: آسفين.. لن نستطيع اكمال التحقيق اذا ما عطيتنا اسم الموظف
انا: معذرة انا ما اعرف الاسم .. بس متى سيتم ارجاع فلوسي
الموقع: آسفين جدا اذا ما عرفت الاسم ما نقدر نرجع الفلوس
انا: يعني السالفة نصب عيني عينك.. باخبر اصدقائي وأهلي عن معاملتكم
الموقع: لا رد
والى يومكم هذا ولا رد!!
اتمنى من الكل أخذ احتياطه عند الحجز من الانترنت واذا رحتو الفندق وقال لكم ما لكم حجز عندنا على طول مسكوه من خشمه وسألوه عن اسمه الكامل!! واتصلوا بالموقع الي حجزتوا منه وقولوا له الي حصل بنفس الوقت.
وحقيقة ودي لو انك تراسل الموقع مرة ثانية وتوضح لهم انك راح تطرح الموضوع وتفضحهم باشهر المواقع العربية المهتمة بالسياحة
اعتقد انهم يخافون من شي زي كذا