وعليكم السلام والرحمة..
مرحبا بك اختي في هذا المنتدى..
أقترح انكم تخلون اول اربع ايام في فرنسا وثاني اربع ايام في سويسرا لانه الرحلة بتكون متعبة لو رحتوا لسويسرا اول ماتوصلون المطار .. خصوصا ان رحلة الطائرة نوعا ما تكون متعبه ناهيك عن رحلة قطار فيها تغيير تعقب الطائرة.. لذلك الافضل تعكسون جدولكم بحيث اول 4 باريس وبعدين 4 سويسرا..
بالنسبة لليورو باس فيمكن استخدامه في سويسرا في كافة القطارات والحافلات ماعدى التي لاتطبق عليها الباس.. اما فرنسا فالمترو يحتاج لتذاكر اخرى خاصة به .. اما القطارات في فرنسا فيمكن استخدام الباس فيه.. بعض القطارات السريعه او للمسافات الطويلة تحتاج الى حجز مسبق..
وبالنسبة لشراء الباسات فمن خلال الموقع ارخص وذلك من واقع تجربة .. ولكن ما ادري كم يوم تحتاج للشحن الى السعودية بس اتوقع اسبوع بالكثير..
مع التحية والسلام..
الحقيقة والخيال..

شكرا لك اخوي على الرد السريع ومعاك حق راح يكون اسهل واريح انه نقضي اول الفتره في فرنسا بعدين سويسرا لكن للاسف مضطرين لهذا الترتيب لانه فيه موعد سابع مسويه اخوي مع شخص في جنيف في اول الرحله علشان كذا قلنا نروح جنيف اول
كيف اعرف اي القطارات والحافلات الي تطبق الباس والي ما تطبق الباس؟؟ مكتوب في البروشور الي يجي معاها يعني والا لازم استفسر من كل وسيله قبل ما نركبها؟؟
وبالنسبه لباريس اذا ما كان المترو يقبل الباس طيب الباصات تقبله ؟؟ والا لهم باس ثاني خاص فيهم؟؟
تحياتي

وعليكم السلاام
انا افضل انكم تجلسون على الاقل يومين في باريس وبعدين جنيف 4 وبعدين باريس يومين
لانكم راح توصلون باريس متعبين 7 ساعات طيران وبتركبون قطار 4 ساعات او اكثر يعني 11 ساعه
وعليهم اوقات التوقفات يعني على الاقل 15 ساعه وما اتخيل انكم بتستحملون
كل التعب هذا
انا نصيحتي مثل ما قلتلك باريس اجلسوا فيها بالبدايه ليلتين وبعدين على جنيف وبعدين ترجعون ليلتين
لباريس
برضو لو قلنا انكم بتجلسون 4 في باريس وبعدين 4 في جنيف راح تتعبون بركوب القطار من جنيف لمطار
باريس
انا رحلتي ان شاء الله بعد 3 اسابيع على طيران الاتحاد
كنت مخطط الرياض -ابو ظبي - باريس - جنيف - باريس - ابو ظبي-الرياض
قالي موظف الطيران ليش ما تخلي جنيف اخر شي يعني ترجع من جنيف لابو ظبي بدل ما تروح باريس
قلت ياليت يكون افضل وبنفس السعر لا تغيير
فرحلتي الان من الرياض - ابو ظبي - باريس قطار لجنيف ومن جنيف -ابو ظبي- الرياض
جنيف راح اجلس فيها 5 ايام وراح تكون محطتي الاخيره
الطياره مهما كان مهي مكان مناسب للنوم والراحه لو قلتي 7 ساعات بنرتاح فيهم بالطياره
هذي وجهة نظري والقرار الاول والاخير لك
وبخصوص الباس
لو تمرون مكتب الزومان للسفريات بالرياض هو مندوب قطارات اوروبا وتشرحين للموظف وين رايحه ومن وين
جايه هو اللي بيشير عليك وش تاخذين من الباس
انا امس عند المكتب وحجزت تذكره قطار من باريس لانسي درجه اولى
ومن انسي لشاموني ومن شاموني لجنيف درجه ثانيه
المجموع كله طلعلي 320 دولار للشخصين
طبعا هو اشار علي الموظف ان التذاكر هذي ارخص بكثير من الباس ل 3 ايام لشخصين
اتمنى تتصلين عليهم وهم بيعطونك الباس اللي بيفيدك
اتمنى اني ما طولت عليك بالكلام واتمنى اني افدتك
وانا حاضر لاي استفسار
سلام

اقتراح اخوي حليب منعنع حلو
يومين بباريس 4 جنيف 2 باريس
وبالنسبه للقطار اقترح اذا لازم تروحون نفس اليوم خذو القطار الي بعده

شكرا اخوي حليب منعنع حاولت بالمجموعه الي معي بعد ما شفت اقتراحكم بتغير ترتيب الجدول انه نغير بس ما رضوا الظاهر انه فيه ارتباطات سابقه غير كذا الفنادق حاسبناهم خلاص الي في جنيف وباريس شكلها بتصير رحله طويله يعني بس يالله نعتبرها مغامره عموما كلنا شباب وما معنا اطفال والله يعين بس اقتراح لوين فيتون اعتقد انه مناسب وفعلا ناخذ القطار الي بعد احسن واريح ليه نجلس على اعصابنا انه يفوتنا قطرا الصباح لو تاخرت الرحله مثلا او صار اي شي
اما مكتب بخصوص مكتب الزومان احترت في هالسالفه ناس تقول انهم غالين مره وناس تقول انهم مره كويسين بس بشيك معهم اشوف لكن وين موقعم بالرياض بالضبط؟؟
تحياتي للجميع

موقعهم الظاهر والله اعلم على طريق المطار القديم
كاني ما خرفت
ولو اني اعتقد اني مخرفه
المهم دقي على استعلامات الدليل واسأليه عن رقمهم وخوذي من نفس المكتب الوصف

موقع مكتب الزومان جنب فندق القصر الابيض تقريبا نهاية شارع الوزارات

شكرا للجميع ما قصرتوا اليوم ان شاء الله بروح لهم اشوف وش عندهم عروض لتذاكر القطار