يا هلا بك
قديم ولا جديد لا شك ان فيه فائده ومعلومات باذن الله تفيد الاعضاء

كانت الرحلة عبر مصر للطيران
كانت الانسب للتوقيت والسعر
عيبها الوحيد انها ترانزيت
الدمام - القاهره - مدريد
ومدة الانتظار ثلاث ساعات ،
وصلنا مدريد بحمد الله ظهراً
وكانت الاجواء باردة
وهذي صورة للأجواء من التاكسي وحنا رايحين الفندق
وهذي صوره عند الوصول للقرآن فيا - Gran Via
الفندق كان نظام شقق لان كان عددنا خمس اشخاص
وافضل موقع طلع لنا هالشقق وكان الحجز عن طريق بوكينق
وهي ممتازه كثير من النظافه والترتيب والموقع ايضاً
واللي اخذناها كانت غرفتين وصاله ودورة مياه ومطبخ
وهذا رابطها على موقع بوكينق
https://www.booking.com/hotel/es/gran-via-sol-apartamentos.ar.html?aid=1300939
وبعد ماريحنا شوي وصلينا
نزلنا على طول طبعاً لان صعبة ننام واليوم في اوله
وبما ان مدة الرحلة قصيرة لازم نستفيد من كل ثانيه
كان اول مكان نتوجة له ملعب السانتياغو بيرنابيو - Estadio Santiago Bernabéu
لأستلام تيكت مباراة ريال مدريد وفالنسيا وبما ان الحجز كان عن طريق الموقع الرسمي
كان الاستلام عن طريق آله في متجر النادي ..
اخترنا الميترو اسرع في الذهاب للملعب والنزول في محطة Santiago Bernabéu
وعند الخروج من القبو راح يكون في انتظارك هذه التحفه المعمارية
وفي خلف الملعب يوجد المتجر الخاص للنادي
وبعد الانتهاء من استلام التيكت واخذ جولة على المتجر
طلعنا للعشاء في مطعم برقر كنق وهو مقابل للسانتياغو بيرنابيو مباشره
وبعدها رجعنا للشقة لكن اتفقنا نرجع مشي
منها نشوف الاماكن اللي بطريقنا ومنها نستمتع بالجو الحلو ،
المسافة للشقه ممكن تكون نص ساعه او اكثر شوي اتكلم عن المشي لانها بالسياره قريبه ،
لكن بالنسبة لي وخاصه بالسفر المشي افضل بكل شي
خاصه ان المكان حلو ومجهز كممشى
راح نقابل ايضاً معالم منها ساحة سيبليس - Plaza de Cibeles
وبسبب الارهاق رجعنا على طول
واجلنا وقفات التصوير للباص السياحي
اللي راح نركبه بيوم ثاني ويمر فينا على نفس الاماكن اللي اجلنا تصويرها في اول يوم ،
وبكذا يكون اول يوم انتهى ..
يتبع ...

فيصل
تسلم ع طلتك اخوي

هالملعب خطير هتافات المشجيعن مثيره
لاحظت ان محطه الملعب أنظف وأرتب خارجيا واجهه الارصفه رخام بعكس غيرها

الحمدلله على السلامه
بدايه رائعه
والتأثير بالصور رائع
متابع

فيصل
اكيد الملعب بيكون مثير حتى بدون الهتافات
بسبب النظام والآمن الممتاز
وشكراً للمتابعة .,

بوحميد
يسلمك ربي
وتابعني اليوم ان شاء الله انزل الجزء الثاني

الحمدالله على السلامة
متابعين وياك

اليوم الثاني :
طبعا بالسفر الاحلى انك تصحى بدري عشان
تعيش يومك كامل وتنبسط بسفرتك وبعد انك تشوف اوضاع المنطقة بكل الاوقات ,
صحينا بدري وتجهزنا وبعدها نزلنا
وجنب الشقه فرع لدانكن دونات كنا نفطر فيه يومياً لانه المضمون
والافضل مقارنه بغيره ..
بعدها قررنا نركب الباص السياحي وناخذ جوله عن طريقة
للأماكن السياحيه عشان نستفيد من الوقت
هذا اول معلم وهو المعبد المصري او معبد ديبود
وهذا هو المعبد بس مادخلنا لان نيتنا نستكشف المكان من برا
ونصور الآثار ونمشي وبنفس الوقت كان زحمه
والسرا يمشي بسرعه بس حنا ماحبينا ندخل وانتقلنا للمعلم اللي بعده
واللي معه اطفال في العاب متوفره يقدر يسليهم فيها
وهذي النافورة الصغيره بالخلف
وهذي كنسية المدينة .. طبعاً في معالم مرينا عليها بس مانزلنا
لان ناوين نرجع لها وقت ثاني مشي لانها قريبة منا بس قلنا
اول شي نستكشف الباص اذا بيودينا مكان غير اللي نعرفه او لا
وبعدها مرينا على شارع القران فيا
ومتوجهين لبوابة الكالا - Puerta de Alcala
بالطريق كان في مظاهره عن سوريا الله يحمي اهلها المظلومين
وهذي محطة القطار آتوشا - Atocha Train Station
وهذي بوابة الكالا وهي على نفس امتداد شارع القران فيا
وبعدها نزلنا عند ساحة سول - Puerta del Sol وكان في استقبالنا هذا
الاجواء بالساحة حلوة وزحمه وشخصيات متنكره تصور معها
بس طبعاً بعد ماتصور تعطيها من الزايد اللي عندك
لأن هالاشياء تعتبر شحاذه بس ب احترام
مو مثل اللي عندنا شوي ويدخل بجيبك ولو عطيته شي ومااعجبه تذمر !!!
اسلوب آخر
وهذا رمز ساحة سول وايضاً رمز مدريد
وبعدها رحنا لماكدونالدز اللي على شارع القران فيا وتغدينا
قبل نروح للملعب لان وقت المباراه قرب
وبعدها رحنا الملعب بالمترو وكانت اجواء مدريد بيضا قبل المباراه
بالشوارع والمترو الكل لابس ملابس ريال مدريد والاعلام معه
ووصلنا الملعب والبوابات مفتوحه والكل على حسب بوابتة والدخول بنظام طبعاً
وهذي البوابه اللي دخلنا منها صورتها ثاني يوم
وبعد ماجلسنا في اماكنا .. دقايق ودخلو اللاعبين للتسخين
المباراة كانت بين ريال مدريد وفالنسيا مثل ماذكرت في بداية الموضوع
وهالصوره تحية اللاعبين للجمهور قبل بداية المباراة
وللأسف المباراه انتهت بالتعادل السلبي
وبعد ماطلعنا الناس مجتمعة كانت عند مخرج السيارات
وبعض اللاعبين طلعو بسياراتهم الخاصه وسط حراسة مشدده
" كرستيانو , كاكا , كاليخون ، فاران , غرانيرو "
هذي صوره خروج كاكا
وبعدها رجعنا لساحة سول وتعشينا في فلافل معز
وبعدها رجعنا للشقه بعد يوم اكثر من ممتع
واجواء حلوة تمنينا تنختم بفوز الريال
وايضاً عصر اليوم نزلت امطار خفيفه
وتخوفنا تستمر لوقت المباراه بس وقفت ورجع كل شي مثل ماكان عليه ...
ونلتقي باليوم الثالث مع اني ماشوف اي تفاعل للأسف الا من القليل
ربي يعطيهم العافيه ...
تابع ...