بما أن إجازة الصيف راحت علينا والسبب ظروف خاصة ، فقررنا السنة
نسافر بعطلة الربيع كتعويض. صحيح بتكون الاجازة قصيرة ، بس العوض ولا الحريمة!!
فكرنا كثير وين نقضي ال16 يوم ؟ فمرة قلنا فرنسا ، بس من المتوقع جوها يكون
بارد .. فصرفنا النظر عنها، ومرة فكرنا نروح جنوب شرق آسيا م قلنا هونج كونج في رحلة
مع سنغافورة بس العائلة مش متحمسة .. ولا حتى أنا لول
أخيرا وبعد تفكير عميق >> حلوة عميق ، قررنا نكرر زيارتنا لفلوريدا
وهذي بتكون زيارتي الثالثة لها ( ان الله أعطانا عمر ) بصراحة الكل متحمس
لها من صغير وكبير فتوكلنا على الله (وقررنا فلوريدا إن شاء الله )
السفر راح يكون من تاريخ : 7 - 24 فبراير
على متن الخطوط الجوية البريطانية درجة رجال الأعمال، وهالمرة أخترنا هذي الشركة
لأنها تروح دايركت لأورلاند ، طبعا بعد ما توقف في مطار هيثرو بلندن ( ترانزيت )
عدد المسافرين : 3 كبار + 4 أطفال الله يحفظهم
راح نستأجر سيارة فان من شركة ناشيونال رينتال كار
أما السكن ، أحترت كثير ودورت كثير لين قررنا نسكن بمنتجع
BAHAMA BAY ريزورت
من مميزات هذا المنتجع أنه يبعد 10 دقايق بالسيارة من ديزني
بالنسبة لتوزيع الأيام راح يكون كالتالي
من تاريخ 8/2 - 19/2 الإقامة بأورلاندو
وراح نزور :
اليوم الأول : ماجيك كينقدوم ( ديزني )
الثاني الثاني : ابكوت ( ديزني )
اليوم الثالث : أنيمال كينقدوم ( ديزني )
اليوم الرابع : ام جي ام ستيديوز ( ديزني )
اليوم الخامس: التمشي بالديزني داون تاون وزيارة سيرك دو سولي
اليوم السادس: يونيفرسال ستيديوز
اليوم السابع : آيلاند أف أدفنتجر
اليوم الثامن : سي ورلد
اليوم التاسع : زيارة بوش قاردنز بتامبا
اليوم العاشر : حديقة التماسيح
اليوم الحادي عشر : ليجو لاند
اليوم الثاني عشر : للتسوق
من تاريخ 20 - 24 الذهاب لميامي بس للحين ما حددنا وين بنسكن
ومفكرة بدل ما نقعد بميامي ناخذ لنا كروز لمدة 3 ليالي ، بس وايد متخوفة من هالتجربة !
طبعاً العودة راح يكون في تاريخ 24 /2 ، وإن شاء الله بأعرض لكم تجربتي في تقرير إن الله أحيانا
أتمنى اللي مخطط مثلي لزيارة أمريكا يعرض لنا مخططاته عشان نفيد ونستفيد ، ولا شرايكم ؟