تبي نصيحتي ...
مكتب المشرف اللي على طريق الامام محمد بن سعود (امتداد مخرج 9) بحي الملك فهد بجوار مطاعم الناضج انا جبت منهم خادمه اندونيسيه وكانوا ملتزمين في الوقت والشروط بشكل مثالي واتوقع ان السيرلانكيه ماراح تفرق كثير معهم من ناحيه الالتزام والاختيار
وعندك مكتب الرواد بطريق الملك فهد وانت متجه جنوب يجيك عاليمين قبل تقاطع طريق العروبه انا جربتهم وجبت منهم خادمه سيرلانكيه وكانت ممتازه لكن هالكلام قبل 3 سنوات وراح تحصل رقمهم في اخر صفحة بجريدة الجزيرة ....
لكن كتعامل والتزام انا اشوف مكتب المشرف افضل...

مكتب السفير المفوض
طريق الثلاثين العليا
رحت له بناء على سمعتهم قبل شهرين
وبعد 31 يوم استلمتها من المطار
وتقدر تقسم المبلغ على دفعتين 4500 و 4000
بالتوفيق

يابن الحلال مكاتب الاستقدام حظوظ
يمكن تلقى مكتب ملتزم بالاوقات وحسب الشروط وفجأة تجيك وحده غير المواصفات المطلوبة
سبق قدمت من اكثر من مكتب وكل هالمكاتب رحت لهم عن طريق زملاء خاصين جدا ويمدحون فيهم وفي الاخير تندمنا اشد الندم على اني قدمت من عندهم
فالدعوة توافيق لااقل ولا اكثر

اهلين اخوي عندك مكتب الاسناد المهني
تجك خلال عشرين يوم بظبط اهلى قدمومن عنده ثلاث شغلات وحتى خالتي وجو خلا عشرين يوم
وهي توافيق من رب العالمين مالكم الى انكم تدعون ان الله يجيب لكم الصالحه الدعاء احسن شي صدقني
وبالتوفيق اخوي

انقل لك تجربتي .....
أنا صراحة قدمة عند مكتب المباشر جداً ممتاز جلس تقريباً 30 يوم ......
وموقعهم على طريق خريص مع شارع العليا الجهة المقابلة لمدينة الملك فهد الطبية

أنا تعاملت مع مكتب النقير و كان تعاملهم ممتاز كنت ابي شغاله اندونسيه
و وعدني المكتب يجيبها خلال 40 يوم و بالفعل بعد 38 يوم من التقديم
دق علي و قالي الشغاله موجوده في المطار بس الكلام هذا قبل سنه و نص
الحين تاخذ وقت أكبر ، موقع المكتب في الملز في شارع الاحساء أمام و كالة
نيسان في نفس عمارة محل بيتزاهت الدور الثاني من الباب الجانبي

تبي نصيحتي روح لمكتب الشريك على طريق الملك عبدالعزيز اذا جاتك إشارة بندة المصيف أعمل يوتيرن ودخل على طول على الخدمة امش طوالي الين يجيك مسجد على نفس الشارع
بابهم بضبط قبل المسجد في عمارة مكاتب تأجير سيارات روح لدور الارضي .
انا قدمت من عنده ثلاث مرات .
وخرتها يوم السبت الي راح جايب شغالة من اندنوسيا من عندهم قالي في العقد ماتتعدا 40 يوم وفعلاً ماكمل شهر الا والمكتب يتصل .
بس على قولة الحظ انا قدمت ثلاث مرات وحدة لي وحدة لخوي وحدة للوالدة وكلها في اوقات متفاوته يمكن بين كل تقديمة وثانية حول شهرين وكلها قبل المدة الي عطانيها المكتب الي هي 40 يوم .
الي جبتها انا ممتازة وفاهمة كل شي وتتكلم عربي وتطبخ وتنفخ .
ولي للوالدة ماشاء الله عليها فطينة ومحترمة وشغيلة .
اما الي جت لخوي فرش طازجة ماتعرف شي مرة مرة لا عربي ولا اردو حتى حتى ماتفهم بسرعة الله يعينه عليها لأنه طلب ماقد جت لسعودية .
هذي هي الحظوظ ولعلمك المكتب هذا تقريباً اغلب الجماعة يستقدمو منه ولا خبرت احد منهم اشتكا منه .
على فكرة عندهم قسمين لتقديم الطلبات قسم بإدارة نسائية وثاني بإدرة رجالية يعني ممكن المدام تقدم من دون ماتروح انت وأنا اقصد المدرسات والموظفات في المقام الأول .
تقبل مروري بصدر رحب .

الاخوة والاخوات
شكراً جزيلاً لكم جميعاً
اشكر تواصلكم وتجاوبكم
لكن لم اجد منكم اتفاق على مكتب معين لهذه الجنسية ( سيرلانكا ) تحديداً
ننتظر المزيد
عموماً اشكركم مره اخرى
لا عدمكتكم
تحياتي ,,,