saad--01
10-12-2022 - 02:45 am
السلام عليكم ورحمة الله وبركاته
مساكم الله بالخير
بإذن الله لي زيارة لتركيا في أكتوبر وبالتحديد لطرابزون وأوزنجول لكن ترددت في السكن ( حجزت أول يومين في النوفوتيل ) ومتردد هل أكمل فيه أو أبحث عن سكن في أوزنجول
لأن زميل لي قالي ترى المسافة 70 كم تقريباً فتقدر تروح وترجع في نفس اليوم وخل حجزك كله في النوفوتيل لأنه ممتاز ومريح
طبعاً حنا زوجين جديدين
ومجموع الأيام في الشمال التركي 6 أيام
فهل أقسمها بين طرابزون وأوزنجول أو أخلي السكن في مكان واحد .. وشكراً لكم
نصيحتي لك وزعها بين الثنتين كتنوع افضل
يومين طرابزون والباقي اوزنجول
وانصحك بنسيون كايا بأوزنجول ساكن فيه ممتاز جدا نظام بيوت خشبية بس نظافه ومرتب كل شي فيه مطبخ غسالة ملابس اوتوماتيكية مطل على البحيرة وبعيد شوي عن الشارع والازعاج للمارة والسيارات
المسافة بين طرابزون واوزنجول اكثر من 70 كيلو توصل تقريبا 96 كيلو تقريبا يعني ساعه
الأهم استأجر سيارة ولاتغلط وتروح وتجي مع تاكسي او سائق خاص بطرابزون او أوزنجول ولاتنسى القارمن عشان تفر وين ماتبي وترجع لنقطة انطلاقتك او سكنك
اوزنجول مميزه كإسترخاء وطبيعة وخضرة جنة الشمال كما يقال
بشكل عام مافيها الا طبيعة البحيرة والخضرة والشلالات ونهر يمشي لمسافات طويله بطريق القرية وبعد القرية ايضا تنفع للكشتات والاسترخاء والطبخ والنفخ
اذا انت تبي استرخاء وجو امطار وغيوم وبرد اوزنجول تبي تسوق وجو اخف برد طرابزون لكن طبيعة مختلفه كليا عن اوزنجول ممكن قرية كوشندرا ومرتفعات سامويلا فيها الطبيعة والخضرة بطرابزون
رحله موفقه واحرص على الملابس الشتوية تراه برد ولاتنسون الجزم الرياضية تكرم المشي متعه ويحتاج جزم مريحة للأقدام
ملاحظة : اذا عودتك لاسطنبول او السعودية الصباح انصحك تخلي النوفتيل بالاخير او اقلها اليوم الاخير النوفتيل لقربه من المطار اريح لك