السلام عليكم ...
اذا الله كتب بروح حق ماليزيا لمدة 6 ايام بعد رحلتي ( كويت - سيدني - قولد كوست - وبعدين ماليزيا -كويت )
- ابي اعرف شنو الاماكن الي احتاج اروحلها في هذي الفتره..
- ساكنه في كوالالمبور فندق اسمه ( رويال بينتانج )في شارع العرب سمعتو عنه وش رايكم فيه ..
- ابي جدول حق المده هذي ..
- لا تنسون اذا في مكان العاب حق اعيالي اعمارهم 8-6 سنوات ..
- وطبعا ما انحرم من نصائحكم ..
ادري قرقت عليكم واجد مشكورين وماقصرتوا ...
بالنسبه لفندق رويال بينتانق موقعه حلو قبل نهاية شارع العرب
وهو فندق نظيف ولكنه عادي مو فخم ولا ردئ جيد وفيه افضل منه بقريب سعره
وبالنسبه للأماكن اللي ممكن تزورونها في كوالالمبور
الأماكن كثيره عندك اهم شي البرجين ومجمع سواريا وحديقة البرجين بعد العصر جميله جدا جدا
وفي نفس منطقة البرجين عالم تحت البحار
وفيه شارع العرب في الليل أسواق ومطاعم ومقاهي وحركه ووناسه وهو نفس الشارع اللي انتوا ساكنين فيه
وممكن تخصيص يوم لجينتنق من الصبح للمساء منطقه مرتفعه وجميله جدا وبراد والعاب تقريبا ساعه من كوالا
وعندك مجمع التايم سكوير يستحق الزياره سوق والعاب وفندق وهو تقريبا خلف الفندق اللي بتسكنوه
وعندك برج المناره برج مرتفع تشوفون كوالا منه قبل المغرب جميل
وبالنسبه للحدائق لو تحبوها عندك حدائق الفراشات والطيور والزهو تروحون لهم بنفس الوقت مع حديقة بردانا
وفيه حديقة الحيوانات حلوه مش كبيره مره ولو بتروحون لها تروحون لشلالات تمبلر بارك مو بعيد مره منها
وهي شلالات مريحه الطلوع لها سهل مو متعب وجميله جدا
وعندك منطقة بوتراجايا منطقة الحكومه الجديده لو عندكم وقت فاضي ممكن تروحون لها منطقه جميله وهادئه اغلبها مباني
حديثه حكوميه وفي الرجعه ممكن تنزلون بمجمع الميدفالي ميقامول من اكبر المجمعات في آسيا
وفيه منطقة سيلانقور تقريبا 35 دقيقه من كوالا فيه اكبر وافضل العاب مائيه وفيه مجمع البيراميد ب
بس لو مابتدخلوا الألعاب المائيه فمالها داعي تروحون لسيلانقور مع العلم ان الألعاب فيها مناظر لا تسر لابسين من دون هدوم
وعندك أفاموسا انا والله ماحبها ولكن ممكن تعجبكم فيها عروض كابوي وسفاري وحديقه بسيطه وحاجات ثانيه
يبي لها يوم كامل وهي خارج كوالالمبور بحدود ساعه ونص
وفيه اماكن كثيره اكيد اني ناسيها ولكن انا ذكرت الأهم
https://artravelers.com/p/re/450384