- السلام عليكم ورحمة الله وبركاته ،،
السلام عليكم ورحمة الله وبركاته ،،
ترددت كثيرا في كتابة هذا التقرير وذلك لعدة اسباب اولها خايفة بأن لا يكون بالمستوى المطلوب مثل باقي التقارير ما شاء الله تبارك الله عليهم (كل واحد يقول الزود عندي) وبعدين رحلتي كانت سريعه لم نخطط لها إلا قبل السفر بشهر او اقل ومعظم الصور شخصيه فيها زوجي والعيال لأنني لم افكر ابدا ابدا بأنني سأعرضها بالمنتدى ..
المهم ..
جاءت فكرة السفر لأمريكا بسبب تقرير الأخت Luxury_Traveller في اورلاندو ما شاء الله صج صج شهتني على الروحه لأمريكا وبعدين بعد مشاورات مع بوالعيال قررنا نروح مع التوأم فقط ونخلي الصغيرة في البحرين
على فكره السبب الثاني إللي شجعنا على الروحه هو ان بوالعيال كان دارس وعايش بأمريكا 13 سنه بولاية كلورادو فعارفها شبر شبر .. لذلك راح تشوفون معظم الصور بولاية كلورادو ..
فكانت الرحلة على الخطوط القطرية .. طبعا الخطوط القطرية ممتازه بس فيها عيب واحد أن الرحلة كانت 14 ساعه وما عطونا إلا وجبتين تخيلوا وجبتين فقط خلال 14 ساعه .. صج إن احنا كنا على الدرجه السياحيه لكن مو معناته ما لنا رب وما نيوع .. يعني سبق وسافرنا على طيران الخليج ما إنها رديئه إلا انهم يعطون كل شوي وجبه ..
المهم .. كانت الرحله كالتالي:البحرين
الدوحه - ترانزيت
واشنطن – 3 أيام
كلورادو – 10 أيام
أورلاندو – 7 أيام
واشنطن - ترانزيت
الدوحه - ترانزيت
البحرين
بسم الله – نبدأ -
طبعا بما ان رحلتنا من الدوحه لواشنطن قلنا خلنا نقعد فيها كم يوم نشوف البيت الأبيض وكأن واشنطن ما فيها إلا البيت الأبيض
وإليكم الصور
الشي إللي استغربت منه وكان هاي اول شي استغرب فيها في امريكا في سلسلة من الإستغرابات الكثيره التي سأتكلم عنها لاحقا ..
هذي الأمريكيين إللي قاعدين صار لهم 18 شهر امام البيت الأبيض ومخيمين هناك احتجاجا على الأخ بوش يعني بالضبط بالضبط امام البيت الأبيض ولا حد يقول لهم شي مع إن فيه هناك سيارة شرطه وكان في واحد ثاني يصرخ ويتكلم احتجاجا على الحكومه الأمريكيه ولا حد قال له شي ولا كلمه .. وإليكم صورهم ..
وبعدها رحنا نتمشى على الأقدام وكان الجو فضيع مع إن كان في شهر اغسطس 2007 وشفنا هالتمثال
وبعدين شفنا مبنى البنتاقون من بعيد وصورناه بس ما قدرنا نوصل له لأن كان بعيد شوي وخبركم اليهال معانه وهذي صورته
وظلينا نتمشى ونصور نتمشى ونصور
وإلا نشوف هالبحيره وهالبط وهالمنظر الحلو
ومشينا بعد شوي ولا نشوف هذا المبنى الطويل ما عرف شنو اسمه
وبعدها تعبنا فقلنا نرجع الفندق راعي التكسي إللي وصلنا من الفندق للبيت الأبيض قال لنا في الرجعه اخذو المترو ارخص لكم بوايد وفعلا كانت نصيحه مفيده جدا ما قصر فأخذنا المترو بربع مبلغ التكسي وهذي محطة المترو
وبس تقريبا هذا إللي سويناه في واشنطن .. إيه نسبت اقولكم رحنا مجمع بالقرب من فندقنا وكان حلو بس ما صورت فيه ولا اعرف حتى اسمه سامحوني (عيل اشله تقولين لنه لو ساكته ابرك)
نلتقي في الحلقة القادمه والتي ستكون طويله نوعا ما لأنها ستكون في كلورادو
نلقاكم في كلورادو ..