- حبيت أضيف بعض الخواطر
بصراحة كتب أخوي المايسترو موضوع جميل عن ترك العمل والدراسة في الخارج،،، تسلم أناملك على هالموضوع القيم جدا جدا جدا لأنك حطيت يدك على الجرح.
حبيت أضيف بعض الخواطر
للأسف كثير من الشباب الي طلعوا للبعثات والي يبغون يطلعون ، لو دققت في دوافعهم تلقاها حب للحياة في الغرب و وناسة وسعة صدر، أنا ما ألومهم لأني مريت بنفس المرحلة فحياة الغرب ببهرجها وحضارتها تفتن الكثير من الناس لكن الحصيف العاقل من يعرف مصلحته ويعرف وين مستقبله ، خلونا نقولها كلنا يا شباب بصراحة - خصوصا الشباب الي درسوا الجامعة بالسعودية- وقد يخالفني القليل : هل فيكم واحد ما تمنى أنه يدرس في الغرب ؟ وهل سأل الواحد منكم نفسه ليش ؟ قد يكون البعض طموح ولديه رغبة في الاستزادة من العلم وهذا شيء متاز بس وقف شوي واسأل نفسك كم كان معدلك حينما تخرجت ؟ وهل أنت جاد في رغبتك للدراسات العليا في الغرب ولا ... ؟
ما أطيل بس أذكر لكم مواقف عايشتها من جحافل المبتعثين واليكم هذه الأمثلة :
1/ شاب كتب الله له توفيق و خرج في الفوج الأول من المبتعثين لأمريكا (يا حظه ومن قده ) عندما يكلمه زملاؤه وينصحونه لما شافو الرجال فاله عالآخر وش كان رده عليهم ، أنا أصلا رايح أفلها واستانس 6 شهور ولا سنة وخل الجامعة تفصلني وبارجع للسعودية عادي ، وهنا اترك لكم التعليق ّّّّ!!!!!!!!!!!
2/ شاب يشرح الوضع المأساوي للطلبة السعوديين في أمريكا( ولن أتكلم عن الوضع الأخلاقي ) وأقول الكثير وليس الكل، يقول صاحبنا : كان أحد المدرسين الأمريكان في معهد اللغة يحضر فتاة سعودية كل فترة ويمر بها على الفصول الي فيها سعوديين ويبدأ يعمل محادثة مع البنت قدام طوال الشوارب ، تدرون ليش ؟ لأنه يبي يغيضهم ويحفزهم شوي لأنه شايف الشباب نايمين في العسل وللأسف الي يشوف الدارسين في امريكا لايجد أغلب المتفوقين إلا البنات أو الطلاب الشيعة !!!!!
3/ طالب سعودي درس في امريكا قرابة السنة وحول ابتعاثه لنيوزيلندا مع العلم أنه ما تعرض لأي مضايقات ومع العلم أنه ملتحي ، عندما قابلته وقلتله يا أخي أنت صاحي تترك بلد العلم وتروح لنيوزيلندا ؟؟
ذكر لي أسباب تافهة وغريبة ،وللأسف ذكر منها صعوبة الأكسنت الأمريكي ، بدون تعليق!!!!
الموضوع وما فيه يا شباب أنه هناك ناس طلعوا للإبتعاث سواء لأمريكا أو غيرها والله أقولها بملئ فمي :
حرام هذه الأشكال تطلع وخسر البلد
مع العلم أن هناك نماذج مشرفة ومشرقة لكن الي يقهر أن الكثير من مستحقي الابتعاث ما طلعوا المساكين ولا هم الي درسوا هنا ولا هم الي ابتعثوا يعني راحت عليهم سنة وبعضهم أكثر وهذا والله شي يفقع المرارة
لا أحد يحسبني مقدم ولا طلعت لي بعثة ، الحمدلله أنا خريج جامعة الملك سعود وأعمل و وضعي ممتاز جدا، لكن حبيت فقط أن أكون صوت للمئات من الطلاب المساكين المحبطين و أقولهم صبرا صبرا
وفي نفس الوقت أنصح كل شاب أن يفكر جيدا ويقرأ موضوع الأخ المايسترو جيدا قبل أن يضيع مستقبله ولا هو لحق عنب الشام أو بلح اليمن ويحط في باله دايما الفائدة من ترك الوظيفة للدراسة ويسأل نفسه السؤال الجاد : هل الأمر يستحق كل هذا العناء ؟؟؟؟؟؟؟؟!
