عزيزتي أنا نفسي أجرب أسافر بعائلتي .
1 - الوضع أمان يعني ممكن أحد يضاقني.....
أو مثلاً يكون الواحد على أعصابه خصوصاً بالليل
2 - لو بتسوين جدول زمني كم تعطين شاينغ ماي يوم ....وكمان أشفيه مدن ثانيه حلوة

يا تفصيل أكثر عن الأسواق ووين سكنتوا وكم الاسعار للفايدة وشكرا يا ام شيخه

يا هلا ومرحبا...شكراً جزيلاً ل (( سام سام)) و (( hassan1)) ... بالنسبة للوضع هناك الصراحة أمان أنا سرت في الصيف..في شهر 7 ... وتميت 5 أيام ... اليوم الأول يوم وصلت الساعة 12 الظهر طبعا من عقب رحلة ابتدت من دبي إلى بانكوك إلى شنغماي.. الصراحة كنا تعبانين ارتحنا في الفندق وكنا نازلين في فندق شنغماي بلازا .. الفندق كان OK والخدمة جيدة وكان قريب من السوق الليلي ( 5 دقائق مشي) وفي مطاعم عربية جريبة ...وبعدين في الليل طلعنا سرنا السوق الليلي الصراحة حلو كان.. اليوم الثاني الصبح سرنا رحلة الفيلة والشلالات وفي حديقة القردة والثعابين . .. العصر كنا نسير المراكز اللي عندهم ..على ما اعتقد بس مركزين عندهم ..اللي هو روبنسون وسينترال.. طبعا روبنسون اللي في شنغماي وايد حلو كان فيه سوالف اشتريناها احلى وايد من بانكوك وارخص ... طبعا كل يوم على هالحال المراكز في النهار وفي الليل السوق الليلي...وفي رحلات ثانية بعد طبعا تكون الصبح .. عموما شاينغ ماي مدينة طبيعية ومدينة الزهور ..واسمحولي على الاطالة.. واذا عندكم اي استفسار ..حاضرين للطيبين ..برد عليكم بعد اسبوع ..

بروح بعائلتي لمدة أسبوعين ممكن تساعديني في توزيع الأيام بين المدن
والأماكن اللي أسكن فيها

هلا والله بالأخ hassan1 ... اذا بتسيرون شنغماي اسبوعين واايد ... شنغماي يكفيها 4 أو 5 أيام. بس اذا قصدك بتروحون بانكوك وشنغماي OK اسبوعين خلوا 10 ايام حق بانكوك للتسوق....( اذا كنتوا ناوين وحابين التسوق طبعاً). في شنغماي إحنا حجزنا 5 أيام في فندق شنغماي بلازا كان حلو وموقعه قريب من السوق الليلي (5 دقائق مشي) وايد فيه عوايل عربية وأجانب ... بالنسبة للفنادق الثانية الموجودة في شنغماي والله ما اعرف عنها شي يمكن فيه فنادق أحلى .. وشفت وايد عرب ساكنين في شارع السوق الليلي نفسه.. على فكرة السوق الليلي اللي في شنغماي حلو وما فيه اشياء مب زينه مثل بانكوك.. والصراحة أمان... وشعبهم واايد طيبين..
وكنا الصبح انسير الرحلات وقت الغدا نكون في المراكز ( اللهم مركزين) بس حلوين مراكزهم بتشوف اشياء ما بتشوفها في بانكوك...بس بعد بانكوك مدينة لا يعلى عليها في التسوق طبعاً... وفي الليل نسير ال Night Bazzar.
وفي منطقة حلوة قريبة من شنغماي اسمها Chiangraiوايد يمدحونها من ناحية الجو والطبيعة وباردة . بس ما قدرنا انسير بنتي مرضت في نفس اليوم.
أما بالنسبة لبانكوك سكنا في لاندمارك والفندق كان حلو وعجيب وموقعه رائع والخدمة جيد جيدا مقابل شارع العرب (نانا) نعبر للشارع الثاني عن طريق الجسر ... وتطلع من الفندق على طول على القطار المعلق اللي بيوديك على MBK أحلى مركز طبعاً. الصراحة في نظري انه افضل من فندق اماري بوليفارد اللي مره في شارع العرب ... في الليل ما يصلح هالفندق للعوائل.