1. مالكم بالطويله .. انا عندي كذا استفسار

السلام عليكم
صباح / مساء الخير
كل عام وانتم بخير لعيد الفطر قبل الزحمه
.
.
ياطويلين العمر .. لو قالوا منهو اكثر واحد حاس واحتار تراه انا .. انا اقولكم ليه .. انا مبتعث بنيوزيلاندا وان شاء الله زواجي قريب ونويت لشهر العسل انه يكون بالنمسا وسويسرا واستفسرت من الدنيا كلها واكثرهم قالوا يابن الحلال تراه برد ووقت تساقط ثلوج وبتواجه صعوبات اذا بتروح من مدينه لمدينه يعني غير هالدول احسن لك .. وانا من يوم سمعت هالكلام وانا يضيق خلقي واحتار زياده .. كان حلمي شهر العسل يكون بهالدولتين لكن وقت شهر العسل ما ادري وش يبي عكر علي الوناسه لكن قدر الله وماشاء فعل..
وفكرت بفرنسا واسبانيا وخاصه ( ماربيا ) وقلت مالي الا الله ثم هالمنتدى اسال واستفسر وان شاء الله انكم ماتقصرون

مالكم بالطويله .. انا عندي كذا استفسار

1 / انا مو بالسعوديه والمدام بالسعوديه ورجعتي للسعوديه ان شاء الله قبل زواجي بشهر يعني ياخوفي يروح علي الوقت وانا ما حجزت الفنادق ولا قصيت التذاكر ولا سويت الفيزا لكن فكرت اني اكلم احد من اخواني بالسعوديه ويحجز الفنادق ويقص التذاكر من مكتب ركسون لكن المهم بالموضوع شلون اسوي الفيزا وهي شلون تسويها دام اني ماني بالسعوديه وهي شلون تسوي الفيزا ..؟ يعني الخوف تصير لخبطه ثمن اتوهق
2 / شلون راح يكون الجو .. انا خابر انه بيصير بارد لكن الدعوه اننا بنلقى صعوبه بالتنقل ولالا ..؟
3 / كم المسافه من باريس لين مدريد بالقطار ..؟
4 / الي عنده برنامج لزياره المدن .. الله لايهينه يبطحه لي واكون شاكر له ..؟
5 / الي حاب يعطيني معلومه او ينبهني على شي .. عز الله انه ماقصر وجعله للجنه ..؟
على فكره بدايه السفر راح تكون ان الله اراد من تاريخ 20 نوفمبر 2011 الى 10 ديسمبر 2011 يعني تقريبا من 17 يوم الى 20 يوم .. والميزانيه ان شاء الله 40 الف شامله التذاكر والفيزا والسكن والشرب والاكل والفله