- بسم الله الرحمن الرحيم
- أيها الاخوة السلام عليكم ورحمة الله وبركاته
بسم الله الرحمن الرحيم
أيها الاخوة السلام عليكم ورحمة الله وبركاته
قال رسول الله صلى الله عليه وآله وسلم( المؤمن كيس فطن ) و قال عمر بن الخطاب رضي الله تعالى عنه ( لست بالخب ولا الخب يخدعني ) ولكنه قال أيضا : ( من خدعنا بالله انخدعنا ) ولذلك يجب عليك أخي المسافر أن تؤمن بنفسك إيمانا عميقا بأنك لا يمكن أن تنخدع أو ينصب عليك نصاب أو محتال ... لأن بعض الاخوان بارك الله فيهم يكون مستعد أن ينصب عليه ويسأل ويخاف من الاحتيال بل أنه على أتم الجاهزية لأن تكون الخسائر على أقل ما يمكن تقديره وهذا عين الخطأ ... يجب أن تكون ثقتنا بأن الحافظ هو الله وأن تكون الثقة بالنفس قوية ولكن لا تكون الثقة بالنفس لحد التفريط وهو كما يقول إخواننا المصريين ( لابس العمة ) يجب أن يكون واثق الخطوة .
ثانيا :احفظ الله يحفظك .. احفظ الله تجده تجاهك .. تعرف على الله في الرخاء يعرفك في الشدة .
ثالثا : يجب أن تعلم أنك مستهدف - كسائح عربي أو خليجي - إيجابا وسلبا ... فالذي قد استهدفك إيجابا هم أصحاب المصالح التي تقوم على إيرادات السياحة من مطاعم وفنادق ومواصلات عامة وخاصة وحتى أفراد الجوازات في المطارات لهم بجيبك مصلحة خاصة إن كنت حاتم الطائي المعاصر .. والذي قد استهدفك سلبا هم مدار حديثنا اليوم ... النصابين والمحتالين .
رابعا : يجب أن تكون خطتك للسفر وخطة سيرك وبرنامج رحلتك من الانطلاق وحتى العودة محدد مسبقا ومكتوب ... أقول مكتوب ... للكسالى الذين يتكاسلون عن الكتابة ... مكتوب من صعودك الطائرة متجها لبلدك المقصود للسياحة وحتى العودة وذلك يكون على وجه التقريب لا التحديد وتضع بعض الفواصل تحسبا لأي طاريء ولا تخرج عن البرنامج لمجرد أنك قابلت شباب وقالوا يلله وش رايكم نصير شلة وحدة ونوفر الصرفيات والسيارة والفلة ..ترى أغلب المشاكل والمنازعات المالية وغيرها من ذلك بل إن برنامج الرحلة ينحاس بالكامل وكم رأينا شباب راحت عليهم المتعة بسبب انضمامهم لمجموعة أخرى لأن الرغبات تختلف والتوجهات تختلف بل وحتى الوجهات تختلف ... حدد برنامجك أنت ومن معك أو لوحدك من بلدك ولا تغيره مهما كانت الظروف وما راح تندم اذا سمعت الكلام .
خامسا : معك على سبيل المثال عشرة آلاف ريال غير التذكرة ... ألفين ريال تخليها ببلدك يا أخي ولا تصرفها لان اغلب الشباب يروح يفلها واذا رجع دور يستلف وهو ما يدري ان حتى الاخ اللي عطاه الفلوس سلف مغتاظ منه كيف يروح يتمشى وما معه فلوس ... الاحتياط واجب .. يعني تفلها واذا رجعت واذا انت عالحديدة ؟ مايصير..
سادسا : خذ دولار وانس انك تاخذ يورو أو ريال وانتبه بس لا ينعطف الدولار ينقصون سعره واصرف الفلوس كالتالي : من بلدك اصرف خمسمائة ريال فقط . إذا وصلت اصرف مائتين دولار الين تشوف الصرف وحط الفلوس الفكة بالجيب اليمين والفئات الكبيرة باليسار وانتبه من شيلة المحافظ ... المحفظة تخليها ببلدك .. ببلد الناس تشيل فلوس على قد المشوار بالجيب .. وبعدين توزع الفلوس مو كلها بجيب واحد .. يعني بالجيوب الامامية والخلفية وجيوب القميص بس لا تكون مثل المصروع اذا جيت بتحاسب التاكسي ولا صاحب المحل تطلع الفلوس ومكانك ملخوم وبسرعة وتطلع من هنا ومن هناك ومدري شلون ... على مهلك وترى الرجال بينتظر لو تقعد ساعة .. وقبل توصل للكاشير اذا كنت بالسوق تحسب .... اذا كانت فوق المليون روبية وهذا في اندونيسيا تسحب نفسك على اقرب تواليت وتجهز فلوسك بالتواليت الله يكرمكم وتطلع وانت على سنقة عشرة مرتب نفسك أو قبل توصل مقصدك اذا كنت راكب تاكسي تجهز فلوسك قبل ما توصل مو قدامه بعد ما توصل ... هذا يبعدك عن أعين الفضوليين أو من كان يترصد لك الله يحميكم .
سابعا : عند الحساب أو حساب ثمن السلعة لمن لم يحفظ الفلوس ... لا تتوتر واحسبها مضبوط ولا تستعجل ولا تستحي بعدين يقولون عربي ويحسبها بخيل ... لا تظن هكذا ... احسب وتمقل الفلوس قبل لا تعطي وانتبه ترى بعض الخمات ما تجي الا للبطران اللي يعطي لانه مستحي يعدها أو يحسبها والا وصل الفندق والا الحسبة ما تخارج ..ز لو انه شراها من بلده كان أصرف .
ثامنا : مهم جدا مهم جدا ... الثقة يا اخوان بالسائق لا تكون في المسائل المالية ... يا جماعة الخير ... الثقة تكون بحدود مهما يكن .. واللي ابيكم تعرفونه أن الانسان يتغير في لحظة ... ثق في السائق ولكن بالفلوس لا تثق في أحد ... لا تثق في أحد ...اذا فعلا تبي تكون ضد النصب .
تاسعا : بالنسبة لايجار الفلل والفنادق انزل من التاكسي أو السيارة لوحدك واذا كان السائق يريد ان يتبعك فلا توافق حتى وان تعذر بالترجمة .. لانه إن نزل معك فله جزء من المبلغ والحسبة من ظهرك . ... كذلك بالنسبة لاخواننا الذين يشترون من المحلات العامة وليست المتاجر المسعرة .. وكذلك المصانع ومتاجر الجملة للمستوردين .
عاشرا : احذر من الناس مرة ومن المترجم الذي معك ألف مرة ... والشاطر يفهم .
الحادي عشر : بالنسبة للي يحبون يتمشون في الأسواق ... ترى انت تتمشى مش تتسوق .. يعني تمش بالسوق أو المول ولكن لا تشتري ... ركز معي .. لا تشتري ... تمش بس ... الشراء له وقته .
الثاني عشر : اللي يبيعون بالجبل .. اقصد اللي يدورون على الفلل ... لا تشتري منهم ... اذا نزلت لجاكرتا اشتر بربع المبلغ بدون مبالغة .
الثالث عشر : جهز اغراضك اللي بتشتريها من جاكرتا من الكير فور أو الجيانت ولا تشتري من الجبل الا الذبيحة والخبز اذا بغيت بالنسبة للمعلبات جبها معك من بلدك ترا مسموحة بالمطار .
الرابع عشر : انتبه من اللي يقابلونك بالمطار ويعطونك كروت للزواج ... ترى والله الذي لا إله إلا هو أن البنات اللي يجيبونهم مدربات تدريب عالي على الهروب والسرقات ******************* وكذبوا على الله .
الخامس عشر : انتبه من تجار العودة والدهن الذين يعرجون على الفنادق ويحومون حول المطاعم العربية ... لا يغرك العينات وتسوي نفسك يعني ما ينضحك عليك ومفتح ويله نزل من هذا وجب من هذاك ... محلات العود ودهن العود لها مراكز معلومة لدى الخبراء وبيوتهم معروفة وسعرهم محدد والجودة مضمونة لأنك تعرف بيته أو محله .
السادس عشر : لا تصرف العملة من الذين يقفون في الشارع قدام الاتريوم ترا أحيانا العملة مزورة وانت ياغافل لك الله لأنك لا تعرف في عملتهم المزور من السليم .
السابع عشر : عند الصرافين حط عينك على فلوسك لأن بعضهم يغير عملتك بمزور يقول انت اللي جبت هذي ... وبعضهم يعد بطريقة سريعة وغريبة بحيث ينقص العد ويطلب منك اكمال المبلغ ولكنه بسرعة قد اخفى بعض الاوراق تحت الطاولة . عد فلوسك قبل ما تعطيه قدامه وحط كل عشر أوراق لوحده على الطاولة مثل ما يسوون .
الثامن عشر : انتبه لا تعطي أحد فلوس تحت الحساب ... قضت حاجتك حاسب . خاصة سواقين السيارات .
التاسع عشر : لا تخبي فلوسك تحت مرتبة السرير أو التلفزيون ترى المحلات ذي صارت مكشوفة وقديمه .
العشرون : ************ ابتعد عن المعصية وعما حرم الله ********** لأنهن مصابات إما بفيروس الوباء الكبدي أو الإيدز وكم من الضحايا لشهوة حقيرة ونزوة صغيرة دمرت حياة مرتكبها *************
بارك الله فيكم وحفظكم من كل مكروه ورعاكم .
(منقول)
