ياماحلا المسرى مع طرة النور ^^ من قبل خيط الشمس يبدي شعاعه
مع رفقةٍ مافيهم اللي به قصور ^^ ربعٍ تربوا عالكرم والشجاعه
كل واحدٍ فيهم مجرّب ومخبور ^^ ماشاور الحرمه بخوة رباعه
لا جا لزومٍ مايصفون بالدّور ^^ كلٍ بذل مجهود قدر استطاعه
أميرهم يهتم بالرّاي والشور ^^ دايم يدوّر وين راي الجماعه
لا صرت عنده كنك بعش عصفور ^^ ماباقي الا يوكّلك في ذراعه
لاجيت اقول اسمه اسميه منصور ^^ كلٍ يعرفه من طيور البتاعه
شيل الشوازن والفشق معهم صقور ^^ وحمام لا صاروا طيورك جواعه
موترك جيبٍ خلفه العفش مجرور ^^ يسوقه اللي خاف ربه وطاعه
وجمسٍ محمل ما ركب فيه مطيور ^^ هو منوة اللي مات قلبه وباعه
عفشك مكمّل فيه زلٍ وماطور ^^ وبيتٍ من (القاضي) جديدٍ شراعه
وعدة المطبخ بين قزٍ وتنّور ^^ وحوايج واغراض فيها نفاعه
ورز(المهيدب) مع سكاكين وقدور ^^ واحرص على الطبّاخ كمّل متاعه
ونجرٍ ومحماسٍ ودلّه ودافور ^^ وبنٍ وتمرٍ يغري اللي شباعه
تنزل بروضٍ توّه اليوم ممطور ^^ والغيم عقب الشمس تم انقشاعه
البر حولك كله ورود وزهور ^^ وقت الربيع العشب زاد ارتفاعه
حتى الرمل تشتم له ريحة عطور ^^ والقاع خضرا كن فيها زراعه
معك خروفٍ مايبي ضرب صاطور ^^ اذا ذبحته علّقه من كراعه
احمس بصيله والمعاليق عالفور ^^ من طعمه الجوعان ياكل صباعه
من عقب هذا ما تبي طب دكتور ^^ كانك مريضٍ صار عندك مناعه
حنّا بنعمه بس تبي حمد وشكور ^^ وحفظ الصلاة الخمس ويّا الجماعه
ما تغتني لو تملك المال وقصور ^^ لا صرت ما تملك كنوز القناعه