السلام عليكم ,
اولا اشكر جميع القائمين على البوابه التركيه وعلى رأسهم اخونا الغالي ابوفهد وجميع الأعضاء
الرائعين بروعة هذه البوابه ...
ثانيا اعتذر عن قلة المشاركة وذلك لكثرة الأرتباطات الشخصيه والعمليه ...لكن يضل القلب يتوق
اليكم بين الحين والآخر ...
موضوعي اكتبه اليوم بسبب دخول فصل الشتاء ومناسبة توقيته وكذلك بسبب كثرة الأسأله
والأستفسارات عن تركيا وجوها في فصل الشتاء .... فلنبدأ الحكايه من البدايه
القصه
أخوكم بن زامل تاجر ملابس نسائيه(على قدي ) واسافر لتركيا اجيب بضاعتي بنفسي من
5سنه الى اليوم بمعدل رحلتين الى ثلاث سنويا .... المهم
العام المضي بعد عيد الحج زاد الطلب عندنا على الجواكيت المدرسيه النسائيه (الفرو والجلد
والصوف ) بسبب شدة البرد فقررت أزرق (زياره خفافيه سريعه) لتركيا ثلاث ايام اشتري بضاعتي
وأشحنها وأجيك معود !! وأتصلت على صاحبي وصديقي التركي - إيرهان- وهو صاحب مكتب
شحن هناك وسألته هاه في بضاعه أجي ...قال تعال الله يحييك السوق مليان ...
رحت للخطوط التركيه في الرياض وحجزت على اسطنبول يوم الخميس صباحا والعوده الأحد
يعني ثلاث ايام وكان التاريخ بعد الحج العام يعني آواخر ديسمبر .... المهم ركبت الطياره وعلى
مطار اتاتورك وقبل لا تنزل الطياره لاحظت ان الجو كأن فيه ثلج يعني الأرض بيضاء ...
المهم نزلت من الطياره وعلى الصاله ولا هذا إيرهان مسنتر في المطار خذني وطلعنا للشقه
نرتاح الين تفتح المكاتب ....
بس المفاجأه اني وانا طالع انا وياه من المطار كان الثلج (السنو) ينزل بكثافه !!
والطريق من المطار للشقه بدأ يكتسي باللون الأبيض ...سألني ايرهان متى ناوي ترجع ؟؟
قلت له الأحد القريب ... ناظرني (اللوح ) وهو يضحك بهستيريا وقال بما معناه إيه هين !!
أنا بصراحه بدأيت أقلق وقلت له وش السالفه يا تعبان ؟؟ وليش ميت من الضحك ؟؟
قال ما تشوف الجو ؟
قلت طيب وبعدين ؟
قال يعني عندنا في اسطنبول اذا نزل الثلج بكثافه المحلات التجاريه العاديه تغلق !!
قلت أقول ...فال الله ولا فالك رح بس للشقه وخلنا نريح وبعدين يحلها ربك ...
الي خلاني أقلق زود أنه وقف عند ميقروس سوبرماركت وقام يشتري خبز ولحم وخضار
ومواد غذائيه حقت كم يوم !! ويوم سألته ليش قال ما عليك بس احتياط !! المهم اننا
وصلنا العماره ووقفنا السياره وطلعنا للشقه وكانت الساعه تقريبا 7 الصبح والجو برد مره
والثلج لا يزال ينزل بكثافه أكثر من أول ماوصلت ..
سويت لي كوب حليب دافيء وحطيت ملعقة زنجبيل مطحون معه (لزوم الدفأ) وسألت
ايرهان كان انه يبي حليب ...والا هو يصدر اصوات سمفونيات الشخير التركيه المعتبره
وكأنه نايم من البارح !!
المهم نمت انا الساعه يمكن ثمان وكنت خلال هالساعه الي قبل النوم كل شوي اطل
من الشباك والا الثلج يزود ياولد مهوب ينقص !!
قمت من النوم الساعه تقريبا 12 الظهر !! والقى ايرهان جالس في الصاله وشكله مو ناوي
يروح للمكتب ... فقلت له هاه ما طلعت ليش ؟
قال تعال شوف الجو برى !! المهم قربت من الشباك والا الثلج ياجماعة الخير والله زي
القطن ينزل من السماء (سبحان الله ) لدرجة ان الرؤيا شبه معدومه !!
لا حول ولا قوة الا بالله
وش هالحظ !! وراي محلات ووراي أشغال ...بس شكل الدعوى مطوله ...خصوصا بعدما
فتحنا التلفزيون وشفنا التحذيرات واغلاق المدارس والجامعات وتسكير بعض الطرق الرئيسيه
وكلام كبير خلاني اقلق زود !!
الشكوى لله نصبر يوم غدي الأحوال تتحسن بكره !! وجلسنا هاك اليوم في الشقه مغير
أفلام وسواليف - لا شغل ولا مشغله ( لوني على الأقل جايب المعزبه ذيك الأيام كا أصرف
من مقابل خشته :109
المهم جلسنا على هالحال ثلاث أيام من الخميس الين الأحد وقف نزول السنو وكان الجو
رائع والأرض أكتست بحله بيضاء بصراحه شيء مره حلو
إليكم بعض الصور الي التقطناها صباح ثالث يوم من (سجننا بالشقه) تحت العماره
هذي صورة سيارة إيرهان
وهذي دعايه مجانيه لمكتب إيرهان (كارين للتصدير) ويبدو باب العماره الي ساكنينها
طبعا نسيت أقول لكم أني ماقدرت أرجع الا بعد عشرة أيام من وصولي بسبب ان 90 % من
مكاتب الجمله كانوا مغلقين ابوابهم مما اضطرني للأنتظار ...وفعلا شريت بضاعتي وشحنتها
ولحقنا ولله الحمد على جزأ كبير من السوق ...وبصراحه رغم الموقف الي صار لي الا أن هذه
الرحله من أجمل سفراتي لتركيا ومستحيل انسى تلك الأيام الجميله ...
فوائد
1- الي بيسافرون في الشتاء هالسنه لازم ياخذون احتياطهم (((الجيد ))) من اللبس لأن بردهم
مره قوي وصعب تحمله خصوصا الأطفال..وبالنسبه للشقق والفنادق في تركيا معظمها مزوده
بأنظمة تدفأه ...يعني مافي مشكله داخل السكن.
2- الثلج اذا نزل متعه لا يعدلها متعه خصوصا لنا نحن الي ما عشنا هالتجارب ...فلا تخافون من
هالتجربه وأقدموا عليه ..
3- لا تفوتون فرصة الذهاب الى بورصه في الشتاء ...لأن بصراحه بورصه ميزتها ومتعتها في فصل
الشتاء والجبل والتزلج ....الخ