قبل تاتيك الاجابات
(التيس بسبعين ريال .. والشقه بميه والفواكه بالهلل والبلد رخيص و و و)
زمان اول تحول من ذكر لك هذا الامر احدي امرين اما انه سافر للبلد من سنوات مضت ليست قريبه او انه مسافر مع شلة شباب >> قطيه وما اعطاك اياه من ارقام هي قطيته فقط
كم مده سفرتك بالظبط وكم ميزانيتك للسفر

ايها الزميل المزركش جاكا.. حياك الله
انا اول مره اسافر لهذا البلد .. وتخبر ربعنا كل من تكلم قال الرخص وارخص .. والتيس بسبعين .. و..و...
هذا على الاقل مااقالوا ..
ونحن شخصين من 23 مارس لمده عشر ليالي
ونبيها من ليالي الف ليله وليله
وميزانيتي لااخفيك خلاف التذاكر افكر اني مااصرف كثير ... وان استلزم
الامر دفعنا امرنا لله .. اهم شي نستانس ..
نتمتع من الصباح مع العالم والناس والمزارات والروحات والجيات .. وبعد العشاء نرجع نتعشا وننام
هذي برامجنا في مختلف الدول اللي زرناها سابقا ..
وشي ثاني ودي اقوله لك نبي فلل في الجبل .. مانحب شغل الفنادق
وامر اخير (غاثني ) :
ان السواقه عندهم يمين .. لذلك صعب ناخذ سياره ..
واللي غاثنا السواق اللي بيلازمنا يروح معنا ويجي معنا وياكل معنا
(شي مزعج جدا )
اقول كذا لأسألكم كان التكاسي متوفره هناك .. نفكر ماناخذ سواق خاص
هي كلها مشوارين ثلاثه باليوم .. تكاسي وصلى الله وبارك ..
وياجاكا .. انقذنا ترا مانعرف شي .. وواعدك ان انبسطنا اولع لك شمعه في حوش الفله (كذكرى )

في جاكرتا التكاسي مليانه في الجبل مافي تكاسي وعموما افضل طريقة للتنقل في الجبل هي الدبابات لانو الطريق ممكن يقفل عليكم وتاخذو ثلاث ساعات على الطريق وانتو واقفين والله لو مو اننا عائلة كان الدباب احسن وسيلة

جدولك يبي لك آول ما توصل على طول تنط الجبل ( بونشاك ) لان جاكرتا آبد ما راح تنبسط فيها , بحسب كلامك آنك تبى طبيعه و اجواء و عيشه و تمشايات وهاذي تختصرها لك بونشاك

• آتوقع الميزانية ما راح ترتفع عن 4000 للشخص بالنسبة لكم
• خذلك سواق وريح راسك لان فالجبل مافي تكاسي والسواق بيختصر عليك اشياء كثير بالذات اذا طبيت ف واحد كفو وفاهم الديره , و في هاذي الاخوان بيدلونك على سواق ان شاء الله

1. هذي مصاريف لازم منها


2. يوم الاثنين تدز للجبل


3. نرجع للصرفيه


4. يوم ثاني مثلا بتروح لتمان سفاري بونشاك


5. التكاسي بالمدن فقط جاكرتا وباندونق تكون متوفره واوفر نعم


6. اما الارياف فاجبتك عنها مافيه تكاسي في البونشاك مثلا

ايها الزميل المزركش جاكا.. حياك الله
انا اول مره اسافر لهذا البلد .. وتخبر ربعنا كل من تكلم قال الرخص وارخص .. والتيس بسبعين .. و..و...
هذا على الاقل مااقالوا ..
هلا بك اخوي هذا الكلام كان من زمان الديره شرحها شرح الدنيا وش حيثها ترتفع كل العالم الا هي ؟؟
هذا غير كب امة لا اله الا الله عليها سوا شبابتعودوا زياره الشام او مصر او عوائل ارتفعت عليهم تكاليف رحلات ماليزيا
عموما الديره مو برخص اول لكنها تبقي ارخص من غيرها للي بيعرف يصرف ويحط قروشه بمكانها
ونحن شخصين من 23 مارس لمده عشر ليالي
تراك ما حددت بالظبط للحين مده سفرك لان البعض ما يحسب ايام الوصول والمغادره ويعتقد ان الرحله قريبه وهي تسع ساعات من الشرق الاوسط لجاكرتا
اضافه انك طالع علي خط الطيران الجديد اظن اللي توه مفتتح بين القصيم والدوحه ان ما اخطيت
يعني لو تعطينا تاريخ ووقت الوصول هناك ووقت الاقلاع من هناك وتاريخه بالساعه يكون افضل
عموما باجاوبك حسب سوالك بالتفصيل الممل فتحملني شوي لاني اشوفك ما قريت كثير من التقارير وتبي اجابه جاهزه
انتم اثنين يعني عليكم 50 دولار قيمة فيزا لشخصين كل واحد ب25 دولار هذي بتدفعها عند وصولك المطار
وحط علي جنب 300 الف روبيه يعني بحدود 35 دولار هذي قيمه ضريبه مغادرة لشخصين اذا بغيت ترجع باذن الله بمعدل 150 الف روبيه للفرد
يعني بحدود85 دولار خلها 100دولار اذا حطيت معها قيمة مشتريات كافي وشاهي واكل بالمطاراات مثلا الخ

هذي مصاريف لازم منها

• بالطياره بيعطونك كرت وصول مسافرين تعبيه فيه جزء بيقطعونه وياخذونه منك عند التختيم للجوازات ويعطونك جزء منه تحتفظ فيه مع الجوازات لا يضيع منك وانت راجع تنقد لموظف الحجز ال 300 الف روبيه حقت الضريبة مع كرت ادخول

راح افصل لك الصرفيه بامثله
اذا طبيت جاكرتا اول يوم وصول ورحلتك مثلا ليل وصلت هناك
اذا كنت حاسب هليوم من ضمن الليالي العشره لرحلتك فهل ليله مافيها صرف واجد
يعني بتحتاج قيمه سكن وتكسي من مطار لفندق
اذا وصلك بنهار وودك تلحق عمرك وتكسب الوقت مادمتم شباب زي ما جاوبك اخونا D7SOON
وودك تطلع للجبل علي طول فهذا يعني انك بتدقع اكثر لانك بتاخذ سياره من المطار للجبل
طبعا الافضل ان ترتاح ليله بجاكرتا ولا تطلع للجبل مباشره ابدا لانك جاي من رحلة طويله مدتها تسع ساعات اذا دايركت وانت رحلتك مو دايركت + اجراءات مطار من جوازات وعفش وصرف وتكسي وجز سكن
فالافضل ترتاح ليله بجاكرتا وثاني يوم تطلع للجبل حسب خياراتك دامك تبي طبيعه وتمشيات فالارياف افضل لك من المدن

• الحين نجي لتوقيت رحلتك انت تقول حجزت يوم 23 مارس وهليوم يوافق سبت

السوال هليوم هل هو يوم الوصول هناك ولا يوم الاقلاع وبتوصل ثاني يوم يعني يوم الاحد24 مارس هناك ؟؟
وبتعرف ليش سئلتك عن توقيت الرحلة بالظبط بالساعه لانه لو كان وصولك يوم سبت او احد فالافضل تبقي بجاكرتا لين يوم الاثنين
يعني لا تطلع للجبل يوم سبت واحد الا مظطر
لان الطريق للجبل يكون مقفل بهذين اليومين ويكون نازل فقط لانه منطقه سياحيه عندهم وهذي الايام هي الويك اند يستغلونها بالروحه له او للقري اللي بعده
نفترض ان وصولك الاحد هناك
ترتاح ليله بجاكرتا

يوم الاثنين تدز للجبل

نرجع للصرفيه

اول يوم بتحجز سياره مع سائقها معك يوديك للجبل ويبقي معك تفرفر لين تلقي فيلا مناسبه الفلل واجد وتشوفها بعينك افضل منطقه الشباب غالبا قرب البقاله السعوديه وحواليها فرفر لين تلقي فيلا تناسبك بعض عندي اقتراحات واجد للفلل بس باقي معك وقت ممكن تفرفر بالتقارير تشوف الفلل اللي تناسبك قبل
هليوم اللي تروح فيه للجبل يكون تمشيه بسيطه بعد ما تلقي سكن مناسب وفيلا مناسبه احيانا تاخذ وقت طويل للبحث عن فيلا واحيانا تلقي فيلا مناسبه بشكل سريع
صرفيتك بهل يوم بتكون للسياره قيمتها انت وشطارتك مع السواق من 400 الي 550 الف روبيه لليوم
والفيلا اسعارها مهب جميع ايضا بعد كاسر مع حارسها
يعني بين 350 الي 800 الف الفرق بينهم واجد لاختلاف الفلل
عموما الفلل المناسبه عادة تكون بحدود 450 الي 700الف روبيه تزيد شوي
خل نضرب ارقام عشوائيه لاعلي سعر نقول لقيت فيلا ب700 الف
وسيارتك ب 500 الف
المجموع لهل يوم يكون مليون و200 الف روبيه يعني اكثر بحدود 130 دولار تقربا = 480 ريال تقريبا

• لاحظ ان الارقام عشوائيه مو دقيقه يعني ممكن تلقي فيلا ارخص او سائق ارخص

يوم ثاني مثلا بتروح لتمان سفاري بونشاك

معناته بتدفع قيمه دخول حديقه وهي الاغلي يعني بيكون فيه صرف اكثر بهل يوم
بعد خمسه ايام مثلا من سكنك بالبونشاك ممكن يوم تطفس من التمشات وودك تريح بالفيلا فانت ماراح تصرف واجد لانك بتدفع حق الفيلا بس + لو بقيت السائق معك بتدفع قيمه السياره >> الافضل يكون السائق معك دايم لانك بمنطقه ريفيه متعبه شوي لو طرا لك تطلع تتمشي انك تلقيسياره لازم تروح لموقع ايجارا السيارات بوسط شارع بونشاك رايا جنب البقاله وتاخذ موتر >> ولاتنسي السواق لو كان معك كويس وودك تصرفه يوم عشان توفر مثلا ترتاح بفيلا او تكتفي بالتمشيه بمكان قريب بالدباب زي مااقترح عليك الاخوان فاليوم الثاني لو بغيت ترجع السائق اللي ناسبك ممكن ما تلقاه وبيكون راح مع زبون غيرك حتي لو وعدك يبقي معك ان لقي غيرك مهب منتظرك
جالس اعطيك كل احتمالات التوفير والصرف الطبيعي وانت حر لانك ما اعطيتني قيمه ميزانيتك بالظبط
وعليه *
الصرفيه الاعتياديه لشخصين من 150دولار اذا متحفظين الي 250دولار تقريبا تختلف من يوم وثاني ياغالي مهب جميع انت حاول قدر الممكن انت ماتصرف الا بشي تبيه فعلا
ونبيها من ليالي الف ليله وليله
وميزانيتي لااخفيك خلاف التذاكر افكر اني مااصرف كثير ... وان استلزم
الامر دفعنا امرنا لله .. اهم شي نستانس ..
نتمتع من الصباح مع العالم والناس والمزارات والروحات والجيات .. وبعد العشاء نرجع نتعشا وننام
هذي برامجنا في مختلف الدول اللي زرناها سابقا ..
وشي ثاني ودي اقوله لك نبي فلل في الجبل .. مانحب شغل الفنادق
وامر اخير (غاثني ) :
ان السواقه عندهم يمين .. لذلك صعب ناخذ سياره ..
واللي غاثنا السواق اللي بيلازمنا يروح معنا ويجي معنا وياكل معنا
(شي مزعج جدا )
السواق ان طبيت بسواق كويس فان اكرمته اكرمك وان هنته هانك
بل الاندونيسي بشكل عام ان تادبت معه بيحطك علي راسه وان تعاملت معه باحتقار مالك الا الحقران منه
هذي نصيحه اخ السواق له مبلغ مدفوع فقط تتفق عليه معه وياخذه كل يوم افضل
اكله وشربه مو عليك بالاتفاق بس العاده جرت ان تعتبرها صدقه اذا دخلت مطعم تعطيه مبلغ بسيط ياكل من كشك قريب من اكشاشكهم او يطلب اكله وحده وقيمته ما راح تكون مضره بميزانيتك والله اعلم
التعامل مع السواق يختلف من شخص لا خر
يعني فكه الروبيات لو تحطها له يستفيد منها بمواقف السيارات والطرق السريعه وان ما حطيتها له فمنت ملزم فيها
واكله مو عليك لكن ان اطعمته فهي صدقه جاريه عنك ان نويتها كذا
اقول كذا لأسألكم كان التكاسي متوفره هناك .. نفكر ماناخذ سواق خاص
هي كلها مشوارين ثلاثه باليوم .. تكاسي وصلى الله وبارك ..

التكاسي بالمدن فقط جاكرتا وباندونق تكون متوفره واوفر نعم

اما الارياف فاجبتك عنها مافيه تكاسي في البونشاك مثلا

ممكن تستخدم اذا حاب وسائل تنقلهم باجاي ولا توك توك اذا مره قعيطي بس لاتقول ماعلمتك تراك بتنغث ان كانت هي وسيلة تنقلك اولا ما تضمن تنسي جوال ولا يطيح منك شي ثانيا وقفاتها واجد ثالثا الدخان والديزل بيلعب فيك رابعا لو قررت تغير وجهتك مو بكيفك لازم تنزل وتدور غيره وبعد ما راح تاقف عند باب فيلتك بتكون مرورها بالطرق العمه فقط
هذي الوسائل تنفع تجربها بيوم مثلا او تستاجر دباب بيكون اوفر وافضل لكن تنتبه بشده للسواقه هناك لان حوادث الدبابات مع انظمه السير البريطانيه تودي بستين داهيه فانتبه لروحك لا تصير مثل الي ينقال فيهم بغوها طرب صارت نشب
ارخ جيبك شوي 10 ايام ب50 دولار = 500 دولار وريح مخك انت ناقد 2400 ريال لرحله ومتحسف علي 50 دولار لليوم لسياره معك
هذا الكلام اخوي مو موجه لك تري بس من باب الرد والايضاح للجميع لاتنسي فيه كثيرين بيقراون الردود ويستفيدون منها
اما انت فمحدد باختيار وسيلة النقل بحسب ميزانيتك اللي ماعلمتنا عنها ان ناسبتك فالاجدي تدفعها وترتاح لانها شي اساسي بالرحله وان شفت انها بتقصر عليك او ودك توفر باعطيتك طرف توفيرها
وياجاكا .. انقذنا ترا مانعرف شي .. وواعدك ان انبسطنا اولع لك شمعه في حوش الفله (كذكرى )
شمعتي خذم عك كليجا وفتيت وشويه مراصيع ولاتنسي القدوع ومعاميل القهوه وعزبت الطبخ كيس رز صغير ووبهارات طبخ وبعض معلبات الفطور افضل تاخذها من هنا لانها اغلي هناك وتتعب لين تلقاها
ورحله موفقه ابوي

h.o
اشكر لك الرد .. اخي العزيز جاكرتا واضح انها مليانه تكاسي بحكم انها عاصمه .. لكن يااخوك لو ابي البلاد والحضاره رحت اوربا
حنا نبي التبطح والتسدح .. والدباب ماش يافلان .. السعودي ماهو حق دبابات

D7SOON
الاخ DO7SOON
ايها الصاحب المزركش فكرتك حلوه خصوصا واننا بنزل حول الساعه 10 بالليل
(غيرنا الرحله من 23 مارس الى 20 مارس .. صرنا ننزل هناك الاربعاء الساعه 9ونص ونطلع من المطار قل عشر ونص )
ووالله ياوجه الرفيق ماني حاب فكره السواق الملازم لي 24 ساعه واندونيسي بعد .. يامل فرقا العين
لكن حد عليه الزمان والدركسون العوج
0غير التذاكر يعني 8 الاف ل 12 يوم
بما ان الرحله صارت من 20 مارس -2 ابريل معقوله
يامل العافيه اشكر تواصلك ومن يدري ربما حبيت اندونيسيا وصرت افحط لها كل 6 شهور مثل حقين اندونيسيا

1. فصار حجزي من 20 مارس فجرا والوصول 9ونص الاربعاء ليلا


2. والى 2 ابريل العصر الساعه 5 نطير من جاكرتا رجوعا

اما هالرد ياجيجي
(وين اخذك وين انهزم بيك ) بس
شاكر ومقدر ردك المرتب صراحه انها اغناني وبقوة وخلاني اعيش الجو وكاني هناك بالفعل
واضح انك محترف جدا ..
وفي البدايه فق كان الحجز 23-مارس الى 2 ابريل
ثم جوني الشباب واقنعوني ازود لي يومين بحكم ان البلد بعيد

فصار حجزي من 20 مارس فجرا والوصول 9ونص الاربعاء ليلا

والى 2 ابريل العصر الساعه 5 نطير من جاكرتا رجوعا

والامر الاخر انا صراحه متعود في سفرياتي الكثيرة على بوكنج واقودا واجي القا الشقه او الفندق محجوز .. مالي خلق اسحب شناطي ادور سكن لذلك ارى (والرأي الأتم لك يالمستشار ) اني اشوف احد يعرف فيلا صغيره بالجبل يعني سبق وجربها ويعطينا رقمها ونتصل ونحجزها ونجي نلقاها جاهزه .. او عبر بوكنج اذا كانوا يعرفونه مع اني ماعتقد
الامر الاخر موضوع السواق .. ماعندي مشكله باكله وقيمته ولكن انا اقصد بملازمته لك واكله معك وتمشيه معك .. اخاف كل مانزلنا مكان قام يمشي معنا وكانه واحد من الشله
ابيه يجلس بسيارته لين نخلص جولتنا بسوق او حديقه او شلال او اي مكان
كانها عند الاكل باخليه في عشر ايام يزيد وزن الاندونيسي 10 كيلو
وارجع واقول ان المبلغ بحد ذاته ماهمني المقصد اني ماودي اتعرف بسايق او ارتبط به .. ابي زي كل الدول تركب معه ولا وصلت نزلت ويختفي
فان كان ولابد اخذنا سياره بسواقها .. ام مسالة التك تك والدخاخين والكتمه فيالله لك الحمد .. ماحد الله
اما الميزانيه فما عنك خفا انت المستشار .. لله الحمد نحن شخصين منفضل الله لامشكله لدينا بالميزانية ولكني صراحه احاول ان ابقيها في حدود المعقول .. يعني من ال 4 الاف الى 5 الاف للشخص غير التذكره اعتقد انها معقوله ل 12 ليله ..
هذا مااريده .. وان لزم الامر ندفع زود اهم شي سكن جيد وتنقلات جيده واكل محترم .. والباقي تساهيل
عن جد ياجيجي افندي افدتني كثيرا الله يغفر لك قل امين ..
والمعاميلو والقهوتو والكيلجاءو لاتوصي حريص
قصمان وبجاكرتا وش خليت
وترا مانستغني عن رقم او اسم فيلا او سواق .. وثق -وانا صادق- ان ماتقوله سننفذه فمابعد الشور شور
لك تحياتي وتقديري .. اخي العزيز

1. هلابك ياخلفهم

هلابك ياخلفهم

طيب ابوي دامك مددت المده بتوصل الاربعاء بالليل يعني ما حولك الا الضعوي علي ماقالوا الديره من عقب العشاء نوم وشوي واغلب اسواقها ومكاتبها بين المغرب والساعه 9 تقريبا تقفل تزيد شوي وتنقص شوي من سوق ومكتب ثاني
وصولك بيكون بالليل اذا انت بتطلع للجبل مباشره بتتعب اذا كنت بتدور فيلا لان المنطقه بدون اضاءه شوارع يعني يمكن تشوف فيلا مكتومه بالليل وتعتقد انها سيئه والمنظر قدامها يفرح القلب وتقرر ما تسكنها لانك زرتها بالليل ولا شفت حديقتها ولا المنظر قدامها
فالافضل يكون روحتك للمنطقه بالنهار ياغالي تشوف علي عينك الفيلا الانسب لك
انك تحجز من هنا ممكن بس لاتدفع اي ريال لين توصل هناك يعني مثلا تفتش بالتقارير فيه فلل جيده محطوط ارقام حراسها تكلمه قبل السفر تشوف الفيلا محجوزه ولالا ان كانت لا تحجزها منه بالكلام تربيط يعني وتراه ممكن يجحدك ولا جيت تلقاه مسكن ناس فيها وان قررت ترسل له قروش فهذا الامر ما نصح فيه ماكلن ينوثق فيه
اكرر عليك وقت الرحله مو قصير
اجراءات مطار وتوصل باليل وتطلع للجبل حدود ساعتين بالليل ثم تدور فيلا هذا ارهاق مالله كتبه عليك
احجز من بوكينق او اقودا اول يوم بجاكرتا ليله وثاني يوم السواق عند باب الفندق يطلعك للجبل تختار بنفسك افضل
يعني مثلا شف الرد رقم 22# هنا
https://artravelers.com/p/re/784373
فيه مجموعه منتجعات وحولها وحواليها فيه فلل متفرقه
بخصوص السواق اعجنه علي ما تبي مهب لازق فيك وانااخوك ان نزلت منتجع ولا حديقه ولا سوق مهب داخل معك بيبقي بسيارته الا ان طلبت منه يجي معك انت تقرر وهو ينفذ
ان ناسبك ولا اطمر جنب البقاله السعوديه فيه سيارات تلقاها واقفه ببرحه جنبها مكتب تاجير سيارات دور سواق غيره والامر بسيط لاتشيل همه
الميزانيه تطول المده ولاتنقص احسبها زي ما قلت لك من قبل من 150 دولار لليوم بتظغطك / من 250دولار لليوم وطالع مناسبه جدا
وحط كم قرش اذا تبي ببطاقه صراف للاحتياط
ولاتحول تصرف من هناك واجد فيها عشان العموله الا مظطر الا ان كانت ماتفرق معك واجد لان قيمتها بتكون محدده الافضل خذ قروشك معك وريح مخك من تعطل بطاقه او بحث عن مكينه مناسبه للصرف
خلها فئه كبيره امها خمس ميه او دولارات فئه ميه دولار
وحسب مدتك من الافضل تطمر 3 لاربعه ايام باندونق بين مدينه باندونق وبين ضاحيتها لمبانق مده رحلتك مناسبه لزيارتها باذن الله يعني تخليها بعد بونشاك ومنها لجاكرتا
لاتنسي السبت والاحد هذي ايام حاول انك ماتتنقل فيها من مدينه ومنطقه لاخري بتكون زحام شديد والسكن حاول تحجزه مسبقا قبل هاليومين
ورحله موفقه ابوي