- احبائي السلام عليكم ورحمة الله وبركاته
- 2) لنكاوي 4 ليالي منتجع ويستن – One Bedroom Villa with Pool
- 3) كوالالمبور ليلتين رويال شولان- Premier Room
- طبعا السبب الرئيسي ان الايرانيين مايحتاجون تاشيرة دخول لماليزيا.
احبائي السلام عليكم ورحمة الله وبركاته
تحياتي العطرة وان شاء الله تكون كل اجازاتكم سعيدة. حبايبي عدت يوم الخميس الماضي 29 مارس من رحلة سريعة لمدة ثمان ليالي من ماليزيا مع الغالية أم خالد(رحلة لتجديد شهر العسل). الحمدلله الرحلة كانت رائعة وقسمناها كالتالي:
1) بورت ديكسون ليلتين- منتجع افيليون Premium Water Chalet
2) لنكاوي 4 ليالي منتجع ويستن – One Bedroom Villa with Pool
3) كوالالمبور ليلتين رويال شولان- Premier Room
هالحين نجي للزبدة. انا سكنت بفندق رويال شولان في شهر سبتمبر الماضي مع الأولاد بناءا على توصيات الأعضاء وكان الفندق رائع جدا ومميز. قلت يا الله نسكن فيه مرة ثانية يوم وصلنا ياعيني على اللي شفناه حسيت اني بفندق ثلاث نجوم بمكة الله يشرفها من زحمة الايرانيين بالفندق.
بدون مبالغة أكثر من 90% من النزلاء من ايران واللي مايشتري يتفرج. خليني أعطيكم بعض المواقف:
الفطور: الطاولات كلها مليانة والبوفيه عليه زحمة مهيب طبيعية والأكل يخلص بغمضة عين. والله ياجماعة انهم يجيبون معاهم علب بلاستك وأكياس يحطون فيها أكل وياخذون معاهم للغرف وهذا كلام العاملين بالمطعم مهوب كلامي الى درجة ان اليوم الثاني لي لقيتهم حاطين لوحات داخل المطعم باللغة الفارسية تقول لاتاخذون معاكم الأكل خارج المطعم.
قمة الازعاج بالفطور يعني الجلسين بالطاولة على يميني تكلمون مع اللي بالطاولة على يساري (حسيت اني بملعب كورة طائرة)
اللوبي: طبعا كلهم متسدحين باللوبي وبعضهم يتمدد على الكنب (ياحبيبي) ومايطلبون عصير أو اي شي يعني لو تبي تجلس مالك مكان. في باللوبي مكان اسمه Lanai فيه مشروبات واكل خفيف وجلسة رايقة طبعا تلفى اربعة أو خمسة جالسين وواحد بس اللي طالب شي يشربه والباقيين يتفرجون. والمصيبة الأعظم ان السعر اللي ماخذينه بلاش بلاش بلاش (بالثلاثة) حوالي 200 رنقت بالليلة لشخصين مع الفطور (والله قهر-حسب كلام واحد من العاملين)
التكاسي: أصحاب التكاسي يشتكون منهم مثلا ثمانية أشخاص بيركبون سيارة صغيرة والمشوار كله 10 رنقت وبعضهم مايدفع والثمن يكون مقايضة.
حسب كلام سائق التاكسي، ماليزيا أعدمت ثلاث ايرانيين قبل فترة بتهمة تهريب المخدرات بالاضافة الى مجموعة أخرى من المصايب اللي ارتفع عن ذكرها اكراما للقراء الاعزاء.
طبعا السبب الرئيسي ان الايرانيين مايحتاجون تاشيرة دخول لماليزيا.
الغرض من كل هذا هو التنبيه للمسافرين اللي بيروحون يقضون اجازاتهم او العرسان اللي رايحين يبون جو مريح نفسيا. النصيحة يا حبايبي الحرص ان الواحد يحجز بفندق عالمي مثل الويستن لأن هالفنادق تحترم نفسها وعمرها ماتعطي هالتخفيض بالاسعار حتى لو يبقى الفندق فاضي علشان يحافضون على نوعية النزلاء. بنفس الرحلة سكنت بفندق وستن لنكاوي والفندق كان مليان لكن تحس انك الوحيد بالمنتجع من جودة الخدمة ونوعية النزلاء الراقية.
أتمنى لكم اجازة سعيدة واعتذر عن الاطالة واي استفسار انا حاضر
اطيب تحياتي
أبو خالد
مشكور على التنبيه لكن تبقى هذه حالة إستثائية أما الفندق فهو رائع جداً بشهادة الجميع وبشهادتك أنت أيضا من خلال تجربتك الأولى فيه وأنا شخصياً سكنت فيه وهو رائع لكن ربما لسوء حظك أن تصادف حجزك مع القروب الإيرانيين
صحيح الفنادق الفخمة غير ولكن ليس كل الناس تستطيع السكن في فنادق فخمة كالويستن لأن أسعارها غالية جداً مقارنة بأسعار الرويال شولان التي تعتبر رخيصة خاصة والفندق 5 نجوم
شكرا لك مرة أخرى