السلام عليكم ورحمة الله
لأعضاء احلى منتدى
الاعضاء اللي ما اسافر سفره الا اعتمد على الله ثم عليهم
حبيت افيدكم بتجربتي في فندق Rose Rayhaan by Rotana - Dubai
عشان ما احد يغلط غلطتي ويحجز فيه
صراحه الفندق اسوء من سيء والله على ما اقول شهيد
ولاني ما اتمنى لكم الا كل خير
فنصيحة لا احد يحجز فيه ابدا
الفندق من سوءه احس خرب علي اجازتي
نبدأ نقطه نقطه
نحنا كنا حاجزين غرفتين كل وحده ديلوكس
وطالبينهم من البداية كنكت طبعا من يوم ما وصلنا طلعوا حاطيننا كل غرفه في دور وبعيد تماما عن الدور التاني
غير انه الغرف جدا ضيقه ومستوى النظافة اقل من متوسط
طبعا الفندق مكتوب انه على الطابع الاسلامي وانه اسلامي
لما وصلنا الفندق ما كان في فالحمام (شطاف) وهو اهم ما يناسبنا كا مسلمين
هاذا غير مستوى النظافه في الحمام اللي يعتبر جدا فقير في النظافه
طبعا اللي يدخل صفحة الفندق في اي موقع مكتوب عليه انه اطول عمارة او بنايه
طيب انا اش حا أستفيد من هاذا الطول لو ما في مصاعد تكفي النزلاء في هالعمارة الطويله جدا
طبعا البنايه عباره83 دور او بالضبط كم ماني فاكره
وبس 4 مصاعد في كل الاوتيل
طبعا نقعد نص ساعه الين يجيني المصعد ونص ساعه تانيه ونحنا جواه الين يمتلي بالنزلاء
بالنسبه للفطور فهو عادي او اقل بشوي من العادي بالنسبه للاصناف
بس المشكله في الزحمه لانه مكان الافطار مره صغير
وكل ما رحنا طلع ممتلي وحولنا على طابق تاني نفطر فيه من كتر الزحمه
يعني انا مو فاهمه هما ليش مو عاملين حساب لعدد النزلاء في هذه البنايه الكبيره
واخيرا نحنا حجزنا فيه لانه مكتوب انه بالقرب من دبي مول
والواقع انه ابدا مو قريب منه لما وصلنا قالولنا الاستقبال بعيد عن دبي مول 10 دقايق بالتكاسي
و 20 دقيقه بالارجل او اكتر وانه ما ينصحونا ناخذ المترو لانه حيوقف على كتير محطات قبل ما ينزلنا فيه
بالتالي كنا كل مره نروح دبي مول بالتكاسي ندفع 13 درهم روحه و 13 درهم رجعه
حبيت انبه الكل واحكيلكم تجربتي عشان ما حد يغلط غلطتي ويحجز فيه وبالذات انه اخاذ في الوكينق تقييم عالي جدا
والله على ما اقول شهيد