Hmong Hilltribe Lodge Hotelاحذر من هذا الفندق ( تحذير للعوائل فقط وخصوصا اللي معهم أطفال )
أما الشباب اللي يحبون المغامرات فيروحون ويجربوا مع إني ما انصحهم!!!!!!!!
طبعاً أكيد تبي تسألون ليش ووش فيه ؟؟؟؟؟؟؟؟
السالفة وما فيها ..........
جمعت معلومات عن طريق ها لمنتدى عن تايلند من الألف إلى الياء
وطبعاً من ضمن ما جمعت معلومات عن الفنادق
ومن ضمن المعلومات اللي جمعت ها لفندق اللي في شنقماي
وهذا الكلام اللي قريته حرفياً عن ها لفندق:
" راح تستانسون من كل قلوبكم . موقع خيالي ما شفتوه من قبل . وطبيعة خلابة وقريب من الشلالات وهو على سفح جبل "
وان من يوم قريت ها لكلام وهو براسي ما نسيته
ويم قررنا الذهاب الى شنقماي ، رحت لذاك المكتب السياحي اللي في بوكيت وقلت له ماابي الاذاك الفندق
قال : ما نعرفه . قلت دور وتأكد . قال : لحظة . يوم اخذ شوي قال : ابشرك لقيناه .والله واضبط
ذاك الباكج مع الطيران لمدة يومين فيذاك الفندق ( كنت ناوي أربع أيام بس اشوى اللي خيرت وقلت يومين )
يوم وصلت المطار واروح لمكتب التكاسي واقول اسم الفندق , قالوا مانعرفه . والثاني واخذ لي حول
العشر دقايق لين قالوا : عرفناه وعطنا 800 بات . قلت وش دعوى انا أخبر ان المشوار من المطار
للمدينة مايتعدى 150 بات بالكثير . قالوا : كلامك صحيح بس هالفندق وينه ووين الديره
والله واخذ ذاك التاكسي . يوم ركبنا انا والمدام وعيالي الاثنين قال السواق وش اللي قالعك لهاالفندق
قلت : وش فيه ؟! قال: بعيد عن الديره ( حوالي ساعة ) والطريق جبلي مرتفع ( كنك طالع الهدا)
والجملة الخيرة تراي انا اللي قايلها . قلت توكل على الله بس ويا معين
والله وفعلاً السواق ما بالغ لدرجة انه بغى يضيع لولا انه سأل لين دل الطريق
بعد ساعة وقف وقال انزلوا . قلنا وش السالفة . قال وصلنا . والله ونتلفت يمين يسار وين الفندق
وين الناس ؟؟؟ قال اصبروا شوي وينزل لذيك الخرابات . وكلش مصكوك , يوم أخذنا شوي ويجي
ذاك التيلندي ويكلمه السواق ( طلع البيل بوي حق الفندق )قال وين فندقكم ؟ قال : نزلوا شناطكم
وامشوا معي . والله ونرقى مع ذاك الدرج . والله وش نشوف !!!!!
اكواخ ( كنك في فيلم كاوبوي ) . والتفت يمين يسار ادور نزلاء
ولا أشوف الا هالامريكية اللي جالسة لحالها وشكلها ياويلي تبسم لنا من الفرحة تقول ماعمرها شافت احد
ا ما موظفي الفندق فما شفت الا اثنين حامل الحقائب وموظف الاستقبال
واول ماوصلت الرسيبشن قلت ابشوف الغرف . قال تفضل
ويدخلنا ذاك الكوخ اللي اول مادخلته تذكرت الساونا
كاش خشب في خشب السقف والارضيات والجدران
والتكييف مافيه والشبابيك مفتحة والاضاءة خافتة ( كنك مولع سراج ) وانت في وسط الغرفة ماتسمع الا اصوات الغابة ( المعروفة للجميع )
قلت هذي غرفكم . قلت وش فيه خدمات حول الفندق من مطاعم اوبقالات اوحتى اكشاك . قال : ماحولك شي . واذا بغيت شي غير اللي موجود
عندنا لازم تنزل المدينة . قلت طيب فيه تكاسي من هنا . قال :لا واذا بغيت تاكسي تطلب من المدينة ويجيك
والله وانطلق للريسبشن واكلم السواق اللي جابني ( الحمدلله انه كان معطيني كرته ومعه جوال) واقول له ديور وارجع لنا
والله ويجي لنا ويضفنا على الديرة . ونسنع أمورنا بفندق ثاني . طبعاخسارتي كانت ليوم واحد , لأني كلمت المكتب اللي مسوي لي الحجز من
بوكيت وقلت له ابغير الفندق . قال تري هاليوم بيروح لأن وقت الحجز بداء ولانقدر نغيره , لكن بكرا بتكون الأمور تمام وماقصروا
لكن ما اخفيكم انها كانت تجربة مفيدة واستفدت منها دروس مثل :
1/ عدم الاعتماد على كل ماتقراءه في المنتديات وتحقق من الموضوع من اكثر من مصدر
2/ الصورة في الانترنت ليس كالواقع ولاتظهر العيوب
3/ اهم مافي الفندق هو موقعة وقربه من الخدمات السياحية
3/اللي ما يخطئ مايتعلم
ودمتم سالمين