:
أهلا بالمسافرين
رحلتي إلى جزيرة اللؤلؤ .. فرسان --> جنوب السعودية العام الماضي 1428
وبالتحديد في فترة الجو البارد ( إجازة الحج ) وهي أفضل فترة للسفر إلى فرسان
طبعا للناس اللي ما يحبون الحر والرطوبة العالية ..
كانت الرحلة مقسومة لقسمين .. قسم الشيّاب وقسم الشباب
الأهل ما يحبون يسافرون داخل المملكة إلا بالسيارة يستمتعون أكثر
بس احنا مجموعة الشباب كان خيارنا الطيارة طبعا ..
وعلى متن الخطوط السعودية .. الرحلة كانت في العصر تقريبا من مطار جدة إلى مطار جيزان
وصلنا بعد المغرب .. وكان في استقبالنا الوالد وصلوا قبلنا ..
الرحلة ما تاخذ أكثر من ساعة واحدة تقريبا
استقبلتنا الرطوبة عند خروجنا من المطار .. بس تعودنا جوها شبيه بجدة وإن كان جو جدة أخف بقليل
نزلنا في فندق اسمه ( الأوقات السعيدة ) على كورنيش جيزان ..
للأمانة الفندق نظيف لكن كان لنا ملاحظات على نظافة الحمامات ( أكرمكم الله )
كان الوالد حاجز في ( العبارة ) اللي هي متوفرة مجانا للمسافرين إلى الجزيرة
يقال بأنها مهداة من خادم الحرمين الشريفين ( الله يطول في عمره ) ويقال بأنها من أمير المنطقة
المهم أن الحجز لا بد أن يكون في اليوم اللي قبله ..
صحينا الفجر الساعة 5 تقريبا صلينا الفجر وبدت أنواع الرجة لأننا عيلة كبيرة ما شاء الله
المهم الوالد الله يحفظه عجول ويحب يكون قبل الموعد بفترة كافية يعني لو بكيفه الساعة 5 نكون خرجنا
هذي صورة العبارة وزي ما تشوفون اسمها ( فارس السلام ) تذكرت عبارة السلام المصرية
الله يرحم موتانا وموتى المسلمين ..
هناك صالة انتظار متواضعة ومكشوفة ( ليست مكيفة ) للنساء والرجال ..
بعد تقريبا نص ساعة قضيناها في الرطوبة العالية .. بدأوا يدخلون الركاب ..
فيه مكتب نسائي صغير تمر النساء منه قبل الدخول للعبارة ..
فارس السلام .. من الداخل متواضعة ولا بأس بها .. بس كنت أتوقع أفضل منها
بدأت الرحلة وانطلقت العبارة تشق طريقها في البحر ..
لم يمر الكثير من الوقت حوالي الساعة والربع وظهرت الجزيرة من بين الأمواج ..
ما سكنا في فندق .. الوالد يعرف ناس دلوه على بيت للإيجار ..
صحيح إنه شعبي وأول ما شفناه من الخارج جاتنا ضيقة في صدورنا
بس للأمانة نظيف جدا جدا جدا وهذا اللي هوّن علينا ..
طبعا ما كنا نعرف بوجود فندق فرسان .. وهو فندق جميل وتابع لمجموعة (كورال العالمية)
وحتى لو عرفوا الأهل كان البيت الشعبي وذكريات البيوت الشعبية مسيطرة عليهم .. بيعيشون الجو
عموما اليوم الأول .. كنا في غاية التعب والإرهاق .. جلسنا إلى وقت الغداء تغدينا ونمنا بعدها
:: الجزء القادم ::
زيارتنا لشاطئ جَنَابَة الرائع
انتظرونا
: